Jakija hrupy ludziej schilnyja zavyšać svoj IQ?
Vajca Džanuł, sacyjołah ź Jeŭrapiejskaha ŭniviersiteta Kipra, vyvučaje, jakija hrupy ludziej schilnyja pieraaceńvać svoj uzrovień intelektu, piša Phys.org. Daśledavańnie apublikavana ŭ časopisie Brain and Behavior.
Fota: Vecteezy
Na pačatku sacyjołah źviartaje ŭvahu, što intelekt čałavieka ciažka aceńvać, bo isnujuć roznyja jaho formy. Jana taksama adznačaje, što ŭ dadatak da kožnaha typu intelektu, jaki časta atajasamlivajecca z peŭnymi stereatypami, jość jašče toje, što možna nazvać emacyjnym intelektam. Upłyvać na ŭzrovień intelektu mohuć i inšyja faktary — naprykład, pamiać. Takim čynam, reziumuje Džanuł, acenka ŭzroŭniu IQ pavinna ŭličvać i hetyja dadatkovyja asablivaści.
Daśledčyca praviała test, jaki pakazaŭ, jakija ŭzrostavyja hrupy ličać siabie bolš razumnymi, niezaležna ad taho, tak heta nasamreč ci nie. Kab vyśvietlić heta, jana źviarnułasia da dźviuch hrup ludziej: u adnoj ź ich byli ludzi, jakim było mienš za 65 hadoŭ (90 žančyn, 69 mužčyn), u druhoj — tyja, kamu było bolš za 65 hadoŭ (93 žančyny, 59 mužčyn).
Kožny z dobraachvotnikaŭ uziaŭ udzieł u apytańni, u jakim sam aceńvaŭ svoj intelekt i bolš daviedvaŭsia pra inšyja charaktarystyki, što datyčać samaacenki, u tym liku pra pamiać i emacyjnuju stałaść. Dalej kožny ŭdzielnik prajšoŭ niekalki standartyzavanych testaŭ, pryznačanych dla vymiareńnia IQ.
Paraŭnoŭvajučy samaacenku intelektu kožnaha ŭdzielnika z vynikami testa na IQ, Džanuł vyjaviła, što svaje zdolnaści pieraacanili dźvie padhrupy — i adna ź ich akazałasia davoli niečakanaj.
Tak, davoli pradkazalna atrymałasia, što svoj IQ schilnyja pieraaceńvać maładyja mužčyny — u siarednim na 5—15 bałaŭ. Heta, darečy, paćviardžajuć i inšyja daśledavańni.
Ale vyśvietliłasia taksama i toje, što svoj intelekt schilnyja pieraaceńvać pažyłyja žančyny — asabliva tyja, jakija ličyli siabie bolš pryvabnymi. Na dumku Džanuł, heta moža śviedčyć pra toje, što ŭ pažyłych žančyn acenka ŭłasnaha intelektu źviazanaja sa stupieńniu ŭpeŭnienaści ŭ sabie.
