Žychara Dokšyckaha rajona asudzili na 4,5 hoda kałonii i dali vialiki štraf
Siarhieju Hryboviču ź vioski Sitcy Dokšyckaha rajona prysudzili 4,5 hoda kałonii za kamientaryi i kala 7000 rubloŭ štrafu.
Sud nad 54-hadovym mužčynam pačaŭsia jašče ŭ listapadzie ŭ Viciebskim abłasnym sudzie. Siarhieja Hryboviča zatrymali na pačatku sakavika 2021 hoda i pieršapačatkova vystavili abvinavačańnie pa dvuch artykułach: art. 130 Kryminalnaha Kodeksa (raspalvańnie rasavaj, nacyjanalnaj, relihijnaj abo inšaj sacyjalnaj varožaści) i art. 361-3 Kryminalnaha Kodeksa (udzieł na terytoryi zamiežnaj dziaržavy va ŭzbrojenym farmavańni abo ŭzbrojenym kanflikcie, vajennych dziejańniach, viarboŭka abo padrychtoŭka asob da takoha ŭdziełu). Zatym u sudzie ahučyli ŭžo 5 artykułaŭ:
— art. 369 (abraza pradstaŭnika ŭłady),
— art. 368 (abraza prezidenta Respubliki Biełaruś),
— art. 130 (raspalvańnie varožaści),
— art. 367 (paklop u dačynieńni da Łukašenki),
— art. 361-3 (udzieł ci padrychtoŭka hramadzianina Respubliki Biełaruś na terytoryi zamiežnaj dziaržavy ŭ vajennych dziejańniach biez upaŭnavažańnia dziaržavy.
Taksama nieŭzabavie paśla zatrymańnia na adnym z praŭładnych kanałaŭ vyjšła «pakajannaje videa», dzie Siarhiej Hrybovič kazaŭ, što vykazaŭ žadańnie vajavać va Ukrainie. Dla hetaha jon zapoŭniŭ ankietu ŭ Telegram, adhuknuŭšysia na zaklik byłoha restaratara i aktyvista Vadzima Prakopjeva, jaki 5 sakavika abviaściŭ nabor trochsot biełarusaŭ u bataljon dobraachvotnikaŭ, kab baranić Ukrainu ad rasijskaj ahresii.
Sud nad palitviaźniem prachodziŭ u zakrytym režymie.
