«Rasčyščaješ darohu dla kałanizataraŭ». Talerčyk zaklikaŭ nacyjanalna aryjentavanych čynoŭnikaŭ nie sychodzić ź sistemy
Zajava byłoha prakurora Aleha Talerčyka vyklikała sprečki ŭ studyi pieradačy «Mnie taksama nie padabajecca».
Skryn videa z kanała «Mnie taksama nie padabajecca»
Aleh Talerčyk kaža, što pakidać sistemu mieła sens u 2020 hodzie, kab pakazać, što narodny pratest padtrymlivajecca elitami. Ciapier situacyja inšaja. «Na siońnia, kali jość pahroza niezaležnaści, suvierenitetu Respubliki Biełaruś, ja zaklikaju tych śviadomych biełarusaŭ, jakija jašče znachodziacca ŭ sistemie, kali jany nie ździajśniajuć złačynstva, zastavacca tam.
Ludzi, jakija biełaruskaaryjentavanyja … jakija za niezaležnaść, jany pavinny być unutry, pavinny trymać ruku na pulsie, kab kali pryjdzie toj momant (ja ŭsio ž taki vieru, što hety momant nadydzie, kali my zmožam viarnuć sabie svaju krainu), kab jany byli tam i apieratyŭna mahli dapamahać vyrašać tyja pytańni, jakija treba budzie vyrašać».
Na jaho dumku, kali ŭ nas zaraz prosta ŭsie čynoŭniki vyjduć ź sistemy, rasijan «pryviazuć paravozam z Rasii».
Alena Žyvahłod ź inicyjatyvy «Sumlennyja ludzi», pierapytała: a ci jość ciapier u sistemie jašče tyja, jakija dziejničajuć u intaresach hramadzian?
— Chiba heta nie tyja ludzi, jakija prosta buduć pieraabuvacca ŭ skačku? 2020 hod byŭ, jany nie vyjšli ź sistemy, jany nie vyjšli, kali vajna pačałasia. My kažam, jany nie ździajśniajuć złačynstva. A ničoha nie rabić — heta nie spryjać złačynstvu?
— Kožny na svaim miescy niešta robić [karysnaje], — adkazaŭ Talerčyk.
Jon pryvodzić prykład, što, navat kali prachodzić zakonaprajekt, čałaviek «moža pastavić kosku abo prybrać kosku. A načalstva ciapier vybirajecca pa prykmiecie addanaści biaskoncaj, jano durnoje, i voś čałaviek, maleńki čałaviek, u tym liku, voś na takim učastku moža rabić dla krainy toje, što jon robić».
Talerčyk kaža, što ŭ jaho bytnaść u orhanach rabili mienavita takoje, kab zakonaprajekt słužyŭ ludziam.
Jon kaža, što ŭ svoj adras jon taksama čuŭ abvinavačvańni, maŭlaŭ, pracavaŭ u sistemie, značyć ździajśniaŭ złačynstvy.
— Kali ja byŭ u sistemie, na svaim miescy ja zrabiŭ šmat, kab heta voś biezzakońnie, jakoje raspłyłosia ŭ dvaccatym hodzie, kab jano nie nadyšło raniej. Jaki vybar? Vyjści ź sistemy i zhinuć? U 2020 hodzie była mahčymaść — ludzi nie advažylisia.
Ciapier modna kazać pra «vyvučanuju biezdapamožnaść», jana da čynoŭnikaŭ jašče bolš dastasoŭnaja, čym u cełym da biełaruskaha naroda.
Surazmoŭcy ŭ studyi nie pahadzilisia, što prosta zastavacca na svaim miescy ŭ sistemie — heta dastatkova.
— Ja liču, što naohuł nie majuć značeńnia tyja ludzi, jakija ciapier zastalisia, jany nastolki iniertnyja, jany ničoha nie zrabili ŭ 2020 hodzie, ničoha nie zrobiać i ŭ budučyni.
Jany piarojduć na bok ci niešta zrobiać, kali zrazumiejuć, što sistema kałapsuje. Kali čałaviek upeŭnieny, što jon hatovy rabić niešta dla budučyni, to, napeŭna, maje sens rabić heta ŭžo ciapier, pačynać pracavać znutry sistemy, pieradavać infarmacyju, stanavicca insajdaram. I takija ludzi jość, tak, — skazaŭ były dypłamat Pavieł Śluńkin.
Talerčyk udakładniŭ, što źviartajecca mienavita da patryjotaŭ, jakija chočuć zachavać niezaležnaść Respubliki Biełaruś. Na jaho dumku, pamyłka — «pakidać sistemu, kali ty prosta rasčyščaješ darohu dla kałanizataraŭ, i ciabie zamienić bolš durny i jašče inšarodny elemient. Ciapier pahroza straty suvierenitetu — jak nikoli vysokaja».
Skryn videa
— Składana paśla sta hadoŭ rabstva (ja tak nazyvaju hety kamunizm, hetuju revalucyju Kastryčnickuju i dalejšaje) čakać ad ludziej śmiełaści… Tak, u dvaccatym hodzie prajavilisia śmiełyja ludzi, ich akazałasia vielmi šmat, ale niedastatkova, kab źmianić krainu, — skazaŭ Talerčyk.
Jon ličyć, što režym pad ciskam Kramla vyčyščaje ŭsio nacyjanalnaje ŭ Respublicy Biełaruś, kab padrychtavać hlebu dla ŭvachodžańnia ŭ RF i dla poŭnaj rusifikacyi krainy.
Talerčyk kaža, što, akramia kalehaŭ, jakija jamu kazali: kudy ty lezieš, my siaredniaje źviano, my budziem patrebnyja zaŭsiody, byli kalehi, jakija kazali: «Aleh, a chto budzie Radzimu abaraniać, kali Rasija napadzie?»
— Dla tysiač — heta takoje apraŭdańnie zručnaje, što ja ciapier rablu niešta dobraje, tamu što zamiest mianie chtości pryjdzie jašče horšy. A kudy horš? Jany zaŭsiody buduć dziejničać u intaresach taho, na čyim baku siła, — adkazała Žyvahłod.
Pavieł Śluńkin taksama zaŭvažyŭ, što situacyja tolki horšaje.
«Ja bajusia, što z takoj łohikaj dojdzie da taho, što ŭ nas buduć kancłahiery, i jany buduć u pieč z čarhi čałavieka advodzić i ličyć, što heta ničoha, zatoje my zmahary, my patryjoty», — skazaŭ jon.
«Inšych ludziej u nas niama», — reziumavaŭ Talerčyk.
