Rasiju i Biełaruś vyklučyli sa śpisa viaščalnikaŭ na čatyry najbližejšyja Alimpijady
Mižnarodny alimpijski kamitet pieradaŭ ekskluziŭnyja miedyjapravy na Alimpijskija hulni 2026-2032 hadoŭ u Jeŭropie Jeŭrapiejskamu viaščalnamu sajuzu (EBU) i Warner Bros. Discovery, paviedamlajecca ŭ pres-relizie MAK. U śpisie na viaščańnie — 49 krain i terytoryj, uklučajučy Vatykan, adnak Biełarusi i Rasii ŭ im niama.
Sumiesnaja zajaŭka EBU i Warner Bros. Discovery na nabyćcio ŭsich miedyjapravoŭ na 49 terytoryjach Jeŭropy dla najbližejšych alimpijad pieramahła ŭ tendary, abvieščanym MAK.
Havorka idzie pra tranślacyi spabornictvaŭ zimovaj Alimpijady-2026 u Miłanie, Alimpijady-2028 u Łos-Andželesie, zimovaj Alimpijady-2030, Alimpijady-2032 u Bryśbienie, a taksama ŭsich Junackich Alimpijskich hulniaŭ u pieryjad 2026-2032 hadoŭ.
Pačynajučy z 2026 hoda, EBU budzie vałodać pravami na biaspłatnaje viaščańnie na telebačańni i ličbavych płatformach. Kožny člen EBU budzie tranślavać bolš za 200 hadzin letnich Alimpijskich hulniaŭ i nie mienš za 100 hadzin zimovych Alimpijskich hulniaŭ pa telebačańni, z šyrokim śpiektram radyjotranślacyj, žyvych tranślacyj i repartažaŭ praź internet, mabilnyja prahramy i płatformy sacyjalnych sietak.
Biełaruś u Jeŭrapiejskim viaščalnym sajuzie raniej pradstaŭlała Biełteleradyjokampanija, adnak u kancy maja 2021 hoda vykanaŭčy saviet EBU pryniaŭ rašeńnie ab prypynieńni jaje členstva.
