U Drybinie haračuju vadu dajuć tolki ranicaj i viečaram, kruhłyja sutki — niavyhadna
Haračaja vada ŭ haradskim pasiołku Drybinie, rajonnym centry na Mahiloŭščynie, padajecca ŭ šmatkvaternyja žyłyja damy tolki ranicaj, z 6:00 da 9:00 (u niadzielu da 11:00) i viečaram z 17:00 da 23:00. Žychary paskardzilisia ŭ rajonku i atrymali adkaz ad miascovych načalnikaŭ.
Fota ilustracyjnaje
«Čamu my nie možam karystacca haračaj vadoj kruhłyja sutki, bo heta stvaraje niazručnaści, i asabliva tym, u kaho maleńkija dzieci, chvoryja pažyłyja ludzi?» — z takim pytańniem źviarnulisia žychary Drybina ŭ redakcyju miascovaj rajonnaj haziety «Savieckaja vioska».
Situacyju prakamientavaŭ načalnik kacielna-ciepłavoj i hazavaj haspadarki KPK «Žyłkamhas» Alaksandr Kuskoŭ:
«Hrafik padačy haračaj vady zaćvierdžany rajonnym vykanaŭčym kamitetam. Pieravieści na kruhłasutačny režym padaču haračaj vady kacielnia pakul nie maje techničnaj mahčymaści».
Namieśnik staršyni Drybinskaha rajvykankama Uładzimir Lasiak, u svaju čarhu, adznačyŭ, što kruhłasutačna padavać vadu ŭ šmatkvaternyja damy budzie niavyhadna, bo paciahnie vialikija zatraty elektraenierhii. A kali kamuści karystacca haračaj vadoj pa hrafiku nie padabajecca — chaj toj stavić sabie nahravalnyja sistemy:
«Haračaja vada ŭ šmatkvaternyja damy rajcentra padajecca z katłoŭ, jakija pracujuć na miascovych vidach paliva, heta značyć, pry spalvańni droŭ.
Pa zakanadaŭstvie ŭ nievialikich nasielenych punktach, takich, naprykład, jak Drybin, haračaja vada pavinna padavacca tolki pry spalvańni miascovych vidaŭ paliva, — tłumačyć čynoŭnik. —
Ustalavać dadatkova jašče adzin kacioł, jaki b padavaŭ bolšuju kolkaść haračaj vady, siońnia niama mahčymaści. Dla padačy haračaj vady vykarystoŭvajucca mahutnyja enierhazatratnyja pompy, a spažyvańnie vady atrymlivajecca nievialikaje, bo ludzi ŭ asnoŭnaj masie karystajucca haračaj vadoj ranicaj i ŭviečary.
Kali haračuju vadu padavać kruhłasutačna, to heta pryviadzie da vialikaha spažyvańnia elektraenierhii. A heta ekanamična niavyhadna i zatratna.
Tamu, kali spažyŭca nie zadavalniaje dziejny hrafik padačy haračaj vady, jon moža ŭstalavać indyvidualny elektranahravalnik abo hazavy nahravalnik vady».
