Financial Times: Href i Nabiulina nie zmahli pierakanać Pucina nie pačynać uvarvańnie va Ukrainu
Kiraŭnik Śbierbanka Hierman Href i staršynia CB Elvira Nabiulina sprabavali adhavaryć prezidenta Rasii Uładzimira Pucina ad vajny, vynikaje z łonhryda, apublikavanaha hazietaj Financial Times.
Hierman Href. Fota: Pavel Bednyakov, Sputnik, Kremlin Pool Photo via AP
Za miesiac da taho, jak Rasija pačała poŭnamaštabnaje ŭvarvańnie va Ukrainu, davieranyja asoby Pucina pa ekanamičnych pytańniach naviedali jaho rezidencyju ŭ Nova-Aharovie, kab prainfarmavać jaho pra mahčymyja nastupstvy zachodnich sankcyj, piša vydańnie, spasyłajučysia na svaje krynicy.
Pavodle ich źviestak, Href vystupiŭ pierad Pucinym z 39-staronkavaj prezientacyjaj, papiaredziŭšy rasijskaha prezidenta ab katastrafičnych nastupstvach, jakija mohuć nastać, kali napružanaść vakoł Ukrainy, jakaja ŭžo tady dasiahnuła apahieja, jašče bolš abvostrycca.
Vydańnie nazyvaje Hrefa blizkim sajuźnikam Pucina jašče z časoŭ pracy ŭ meryi Pieciarburha ŭ 1990-ch, kali budučy kiraŭnik Śbierbanka mieŭ reputacyju samaha libieralnaha čalca pašyranaha atačeńnia Pucina — i vykazvaŭ svajo mierkavańnie.
Nabiulina, «pavažany kiraŭnik CB», i niekatoryja inšyja padzialali aściarohi Hrefa i dapamahli padrychtavać prezientacyju, vynikaje z publikacyi.
Prezientacyja ž papiaredžvała, što «strohija sankcyi» za Ukrainu mohuć vyklikać paniku na finansavych rynkach i adkinuć rasijskuju ekanomiku na dziesiacihodździ nazad (a jakaść žyćcia rasijan budzie adstavać navat ad uzroŭniu krain, jakija raźvivajucca).
Sa słoŭ niekalkich ludziej, znajomych z hetym pytańniem, pakul Href raspaviadaŭ pra mahčymyja nastupstvy, Pucin pierapyniŭ jaho i spytaŭ, što Rasija pavinna zrabić, kab paźbiehnuć horšych z sankcyj, havorycca ŭ artykule.
«Zanadta niaśmiełyja, kab pieraścierahčy Pucina ad vajennaj eskałacyi, u technakrataŭ nie było vyraznaha rašeńnia: i jany nie mahli prymusić siabie skazać Pucinu, što jamu pahražaje hieapalityčnaja katastrofa», — piša Financial Times. Jany pakinuli sustreču, tak i nie daviedaŭšysia, što mienavita Pucin płanavaŭ — i ci ŭličyŭ jon ich paviedamleńnie, śćviardžaje vydańnie.
«Jany byli dosyć advažnyja, kab paprasić ab sustrečy. Ale jany nie zmahli davieści svoj miesiedž», — skazaŭ adzin z surazmoŭcaŭ haziety.
Niazdolnaść Pucina prysłuchacca da papiaredžańniaŭ spustošyła technakrataŭ. «Ja nikoli nie bačyŭ [Hrefa] takim. Jon byŭ zusim razhubleny, u stanie poŭnaha šoku», — skazaŭ čałaviek, jaki bačyŭ Hrefa ŭ pieršyja dni vajny.
