Pradstaŭnik Jeŭrakamisii anansavaŭ novy pakiet dapamohi hramadzianskaj supolnaści Biełarusi
U Jeŭrasajuzie «praź niekalki tydniaŭ budzie abvieščany novy pakiet padtrymki biełaruskaj hramadzianskaj supolnaści» na 100 młn jeŭra, paviedamiŭ Jerun Vilems z hienieralnaha dyrektarata Jeŭrakamisii ŭ pytańniach dobrasusiedstva i pašyreńnia, paviedamlaje Radyjo Svaboda.
Fota: AP Photo/Jean-Francois Badias
1 śniežnia čynoŭnik uziaŭ udzieł u anłajn-dyskusii ab ustojlivaści biełaruskaj hramadzianskaj supolnaści, arhanizavanaj ofisam biełaruskaha demakratyčnaha lidara Śviatłany Cichanoŭskaj i Oksfardskaj absiervatoryjaj pa Biełarusi.
Pavodle Vilemsa, u ES ličać važnym «inviestavać u ludziej, kab stvaryć stabilnuju hramadzianskuju supolnaść», a taksama «padtrymlivać niezaležnyja ŚMI».
Pradstaŭnik Jeŭrakamisii zaznačyŭ, što ŭ 2021 hodzie padtrymka biełaruskaj hramadzianskaj supolnaści była pavialičanaja. Razam z tym «jość žadańnie akazvać bolš ustojlivuju padtrymku arhanizacyjam i ludziam, kab jany praciahvali svaju dziejnaść».
Jon taksama padkreśliŭ
važnaść padtrymki roznych siektaraŭ, u tym liku biznesu ŭ vyhnańni, kultury i raźvićcia biełaruskaj nacyjanalnaj identyčnaści, adukacyi.
«My zachaplajemsia vašaj stojkaściu i baraćboj, niahledziačy na represii i pamianšeńnie prastory dla dziejnaści hramadzianskaj supolnaści, pracy ŭ takich składanych umovach, — padkreśliŭ jeŭračynoŭnik. — Biełarusy vielmi natchniajuć nas. My hatovyja praciahvać padtrymlivać ich stojkaść i supraciŭ. (…) Padtrymka biełaruskaha naroda ŭ samym centry našych namahańniaŭ».
Ciapier viadziecca pošuk arhanizacyj, jakija mahli b, budučy za miažoj, «dapamahać maleńkim inicyjatyvam unutry krainy, ale kab było bolš prajektaŭ, jakija mohuć paŭpłyvać na źmianieńnie situacyi».
