Pavieličeńnie stavak i skaračeńnie lhot. Jakija padatkovyja źmieny čakajuć nas u 2023 hodzie
Padatkovyja novaŭviadzieńni, jakija mohuć pačać dziejničać z nastupnaha hoda, zakranuć amal kožnaha. «Naša Niva» pahladzieła, jakija asnoŭnyja źmieny nas čakajuć.
Pakul heta prajekt zakona. Kali jaho prymuć, źmieny pačnuć dziejničać z 1 studzienia 2023 hoda.
Jakija źmieny čakajuć IP
2023 hod dla IP moža prynieści šerah niepryjemnych źmien.
Papiaredni raz padatki dla IP i samazaniatych padymali z 1 studzienia 2022 hoda. Tady staŭki adzinaha padatku ŭ zaležnaści ad vidaŭ dziejnaści pavialičyli ŭ 2—4 razy, taksama z 5 da 6% padniali staŭku padatku pry vykarystańni sproščanaj sistemy padatkaabkładańnia (dalej SSP). Paralelna z hetym, mnohich IP pazbavili prava pracavać pa SSP. Tamu bolšaść z tych, chto da 2022 hoda mieŭ mahčymaść płacić padatki ŭ pamiery 5% ad abarotu, byli vymušany pierajści na padachodny padatak sa staŭkaj 16%.
Z nastupnaha hoda IP płanujuć całkam zabaranić pracavać z vykarystańniem SSP. Im prapanujuć pierajści na ahulnuju sistemu padatkaabkładańnia pa staŭcy 16%, jakuju z 2023 hoda mahčyma pavysiać da 20%, abo na adziny padatak. Staŭki adzinaha padatku z nastupnaha hoda taksama pavialičać. U zaležnaści ad vidu dziejnaści jany vyrastuć u 1,5—3 razy.
Naprykład, adziny padatak dla raspracoŭščykaŭ veb-sajtaŭ ź Minska płanujuć pavysić z 237 da 593 rubloŭ na miesiac. A dla tych, chto zajmajecca čystkaj i ŭborkaj pamiaškańniaŭ u stalicy, z nastupnaha hoda pamier adzinaha padatku płanujuć padniać sa 143 da 286 rubloŭ.
Adnačasova z hetym zvuzicca pieralik vidaŭ dziejnaści, pry ažyćciaŭleńni jakich IP maje prava vypłačvać adziny padatak. Što kankretna vypadzie ź pieraliku, pakul nieviadoma.
Pazbaviać ilhot
Z nastupnaha hoda skaračajecca śpis IP, jakija mieli lhoty pa adličeńniach u fond sacyjalnaj abarony nasielnictva. Sa śpisu vykraślać tych pradprymalnikaŭ, jakija paralelna pracavali na inšaj pracy, bo za ich unioski rabiŭ najmalnik. Z 2023 hoda takoj mahčymaści bolš nie budzie. Pamier uznosaŭ u FSAN — 35% ad minimalnaj zarabotnaj płaty. Minimalnaja suma adličeńniaŭ u FSAN za 2021 hod skłała 1705 rubloŭ.
Taksama z nastupnaha hoda płanujecca pavysić padatki dla jurydyčnych asob. Padatak na prybytak musić vyraści z 18 da 20%.
Što z samazaniatymi?
Pavyšeńnie padatkovaj nahruzki zakranie i samazaniatych. Dla ich u zaležnaści ad vidaŭ dziejnaści staŭki adzinaha padatku vyrastuć u 1,5—2,5 raza. Naprykład, dla žycharoŭ Minska padatak za repietytarskuju dziejnaść płanujuć pavysić z 82 da 164 rubloŭ, a za ramont mebli — da 224 rubloŭ zamiest raniejšych 149.
Taksama z nastupnaha hoda dla samazaniatych musić źjavicca padatak na prafiesijny prybytak. Płacielščykami takoha padatku stanuć fizičnyja asoby, nie zarehistravanyja ŭ jakaści IP, jakija atrymlivajuć prafiesijny dachod, vykarystoŭvajučy svaju majomaść, ale pry hetym jany nie pryciahvajuć inšych rabotnikaŭ pa pracoŭnych i (abo) hramadzianska-pravavych dahavorach i sami nie padparadkoŭvajucca nijakim pracadaŭcam.
Pakul niama jasnaści, jakija vidy dziejnaści patrapiać pad hetuju katehoryju. Adnak viadoma, što staŭka składzie 10% ad vyručki. Hetaja staŭka budzie prymianiacca tolki ŭ miežach 60 tysiač rubloŭ na praciahu kalandarnaha hoda. Kali vyručka pieravysić paroh u 60 tysiač rubloŭ, pryjdziecca vypłačvać padatak pa staŭcy 20%.
Jakija jašče źmieny
Praciahnuć dziejničać dadatkovyja miery pa kansalidacyi dachodaŭ biudžetu dla baraćby z COVID-19, pryniatyja ŭ 2021 hodzie. Pačatkova płanavałasia, što jany buduć dziejničać da 1 studzienia 2023 hoda, ale ich praciahnuć jašče na dva hady. Dziakujučy hetamu, zachavałasia prava abłasnych Savietaŭ deputataŭ uvodzić miascovy zbor za pierasiačeńnie transpartnymi srodkami dziaržaŭnaj miažy (zbor za vyjezd za miažu). Taksama heta praciahvaje dziejańnie staŭki padatku na prybytak u pamiery 30% dla apierataraŭ sotavaj elektrasuviazi. Da 1 studzienia 2021 hoda jany płacili 18%.
U 2023 hodzie płanujuć padniać padatak na pieravyšeńnie vydatkaŭ nad dachodami z 20 da 26%. Sioleta jaho ŭžo pavyšali z 16 da 20%. Jak padatkaviki vyjaŭlajuć tych, chto žyvie nie pa srodkach, možna pračytať tut.
Pašyrać śpis padakcyznych tavaraŭ, u jaho dadaduć elektronnyja cyharety. Staŭka — 2,72 rubla za štuku.
Paralelna raz u kvartał buduć padymać akcyznyja staŭki na zvyčajnyja cyharety. Akcyzy na ałkahol taksama vyrastuć.
Taksama płanujuć pavysić padatki na pieršuju kvateru. Dla Minska pryrost musić skłaści 11,1%.
Prajekt źmianieńniaŭ u Padatkovy kodeks praduhledžvaje pavyšeńnie padatkaŭ na sabak. Z 2023 hoda pamiery zboraŭ składuć 11,1 rubla zamiest 9,3 rubla. Za sabak ź liku patencyjna niebiaśpiečnych parod daviadziecca vykłaści 55,5 rubla zamiest ciapierašnich 46,5 rubla.
«Naša Niva» — bastyjon biełaruščyny
PADTRYMAĆČytajcie taksama:
Jak padatkaviki vyjaŭlajuć tych, chto žyvie nie pa srodkach? Raskazvaje supracoŭnik inśpiekcyi
