«U cełym novaŭviadzieńnie vielmi zručnaje». Jak pracuje novaja sistema rehistracyi pry padačy na polskuju vizu
Z 28 listapada dla biełarusaŭ źmianilisia praviły padačy dakumientaŭ na polskija vizy. Ciapier pierad hetym treba prajści anłajn-vieryfikacyju pa asabistym identyfikacyjnym numary ŭ Mižbankaŭskaj sistemie identyfikacyi (MSI). «Zierkało» daviedałasia, jak ciapier biełarusy zapisvajucca ŭ vizavyja centry, što źmianiłasia i na što ŭpłyvaje vieryfikacyja praź MSI.
«Učora asabista ŭ mianie prablem nie było»
28 listapada Illa dapamahaŭ z padačaj na vizu znajomaj i jaje baćkam. Tamu ŭ tym, jak ciapier pracuje rehistracyja, jon razabraŭsia.
Zapisacca na padaču dakumientaŭ na vizu ŭ Polšču možna nastupnym čynam. Pierš za ŭsio treba prajści vieryfikacyju na płatformie MSI. Tam nieabchodna ŭvieści asabisty numar pašparta i numar telefona. Na jaho prychodzić SMS z kodam, jaki treba ŭvieści na sajcie MSI.
«Paśla hetaha vy atrymlivajecie markier (kažučy prostaj movaj, śpiecyjalny kod. — Zaŭv. red.). I voś jaho treba ŭvodzić u ankietu pry padačy dakumientaŭ na sajcie vizavaha centra, tam jość asobnaje pole. Za ŭvieś učarašni dzień asabista ŭ mianie prablem z partałam MSI nie było, ale ŭ toj ža čas u niekatorych ludziej (u asnoŭnym z mabilnaha internetu) partał pracavaŭ praz raz», — tłumačyć Illa.
Ale dadaje, što z ranicy 28 listapada pracavaŭ ź pierabojami i sajt vizavaha centra. Naprykład, vydavaŭ pamyłku, što ŭviedzienyja niekarektnyja źviestki, choć usio było dakładna. Da abiedu prablemu likvidavali.
Zarehistravacca na atrymańnie polskaj vizy zaŭsiody było składana z-za vialikich čerhaŭ. Ale naš surazmoŭca zmoh spakojna zrabić heta i zaŭvažyŭ šmat svabodnych miescaŭ.
«Paśla 14.00 stali źjaŭlacca novyja daty, — kaža jon. — Naprykład, u Homieli prapanoŭvali varyjanty z 1 da 23 śniežnia, na čas padačy z 8 da 11. Možna było spakojna vybrać. Bližej da 16-j źjaviłasia akienca na nacyjanalnuju vizu ŭ Mahilovie i Minsku, u bolšaści byŭ dastupny zapis z 1 pa 23 śniežnia. Homiel u dostupie pravisieŭ u ahulnym liku try hadziny, Mahiloŭ prykładna stolki ž, a voś Minsk razabrali chutčej. A dalej usio jak zvyčajna — na poštu prychodzić list z paćviardžeńniem zapisu na padaču dakumientaŭ».
«Ułady zmohuć bačyć fakt rehistracyi ŭ vizavy centr»
Pra novaŭviadzieńni my pahavaryli ź vizavym kansultantam Alaksandram, jaki zajmajecca manitorynham vizavaj situacyi ŭ Biełarusi. Jon adznačaje, što z uviadzieńniem vieryfikacyi spračacca pra toje, ci traplajuć źviestki zajaŭnikaŭ da dziaržaŭnych orhanaŭ, bolš niama sensu:
«U MSI jość 5-7 sposabaŭ vieryfikacyi, ale dla zapisu ŭ vizavy centr vykarystoŭvajecca identyfikacyjny numar i numar telefona. Bolš za toje, apošni dazvalaje «bačyć» karystalnika jašče i fizična, my viedajem, jak lohka heta robicca. Ale nie fakt, što hetaja situacyja moža niejak naškodzić zajaŭnikam».
Tak vyhladaje ŭvachod u MSI dla vieryfikacyi pierad padačaj na vizu. Fota: skrynšot sajta
U cełym novaŭviadzieńnie surazmoŭca aceńvaje jak vielmi zručnaje. Pavodle jaho słoŭ, za paŭtara dnia vielizarnaja kolkaść ludziej zapisałasia na patrebny im typ viz. Časam byli składanaści z atrymańniem SMS ad MSI i braniravańniem miescaŭ, ale prablemy ŭdavałasia vyrašyć, paŭtaryŭšy zapyt.
«Časam u čałavieka nie atrymlivałasia prajści vieryfikacyju ŭ MSI z pryčyny zakančeńnia dapuščalnaha terminu z daty apošniaj identyfikacyi, i dla aktualizacyi nieabchodna źviartacca ŭ adździaleńnie banka. Nie zaŭsiody atrymlivałasia adpravić list z zapytam pradastaŭleńnia daty padačy dla dziaciej. Ale surjoznych zbojaŭ u pracy, mnie zdajecca, nie było», — kaža Alaksandr.
A voś rabić vysnovy i davać niejki prahnoz ciapier nielha, upeŭnieny vizavy kansultant. U pierśpiektyvie najbližejšyja 2-4 miesiacy daduć zrazumieć, nakolki apraŭdana było ŭviadzieńnie vieryfikacyi:
«Vidavočna, što ciapier atrymać słot stała značna praściej, a kalandar zapisu adkryŭsia na ŭvieś śniežań, raniej možna było zapisacca tolki na tydzień napierad.
Ale, uličvajučy paraŭnalnuju statystyku vydadzienych viz za apošnija čatyry hady, možna mierkavać, što kolkaść kvot na pryjom ludziej vidavočna nie zadavolić uvieś popyt, jaki vychodzić nie za tysiačy, a za dziasiatki tysiač achvotnych».
Čytajcie taksama:
«Mienš čym za sotku z rejsa ŭ Polšču nichto nie pajedzie». Što pieravoziać i kolki zarablajuć čaŭnaki i kantrabandysty
«Na ŭsiu siamju zapłacili 500 dalaraŭ». Jak biełarusy ciapier atrymlivajuć vizy
Źmianiŭsia paradak zapisu na polskuju vizu, pasiarednikam stanie ciažej
