«Rasija pajšła va-bank». Padalak raskazaŭ, što čakaje žycharoŭ Danbasa i Kryma
Rasija apošnija tydni abstrelvaje ŭsiu terytoryju Ukrainy. Bjuć pa infrastruktury, kab pazbavić hramadzian krainy elektryčnaści, vady i ciapła. Čaho damahajecca Rasija masavymi abstrełami? Ci moža heta prymusić Kijeŭ pahadzicca na stratu poŭdnia krainy? Jak Ukraina bačyć kaniec vajny i što budzie z prarasijskim Krymam? Pra heta daradca kiraŭnika Ofisa prezidenta Ukrainy Michaił Padalak raspavioŭ jutub-kanału Majkła Naki.
Fota: AR
Novaja taktyka Rasii — masiravanyja abstreły hramadzianskaj, enierhietyčnaj infrastruktury. Maskva i sama hetaha nie chavaje, što maje na mecie prymusić Ukrainu admovicca ad akupavanych terytoryj. Nakolki płan Kramla zdolny spracavać?
Padalak kaža, što hety płan nie spracuje.
Pavodle jaho, chacia pačynała Rasija vajnu z farmalnaha patrabavańnia pra nieŭstupleńnie Ukrainy ŭ NATA, ciapier jaje farmalnyja patrabavańni inšyja. Maskva choča atrymać i Chiersonskuju vobłaść, i usio Zaparožža, jakija Rasija zaniesła ŭ svaju Kanstytucyju.
Ale heta nie ŭsio.
«Jany chočuć, kab my sieli za stoł pieramovaŭ, i ciapier iduć va-bank, tamu što ličać, što kali jany hetaha dabjucca, to tady nie budzie jurydyčnaj adkaznaści za vajennyja złačynstvy. Ty ž nie prajhraŭ vajnu, heta značyć, ciabie nichto nie pasadzić u miežach śpiectrybunała. Rasija skaža: hladzicie, my ž padpisali mirnaje pahadnieńnie, va Ukrainy da nas niama pretenzij. Takim čynam Rasija sprabuje syści ad adkaznaści», — kaža Padalak.
Pavodle jaho, hetyja ŭdary pa enierhietyčnaj infrastruktury rasijanie mohuć rabić z prostaj i «takoj absalutna adkrytaj nianaviści da Ukrainy».
«Z ulikam taho prynižeńnia, jakoje adčuvaje Rasija»
«Važna, hruba kažučy, realizavać svaju voś hetuju nazapašanuju nianaviść, jakaja jašče i maštabavałasia za hetyja 9 miesiacaŭ, z ulikam taho prynižeńnia, jakoje adčuvaje Rasija», — miarkuje Padalak.
Jon kaža, što tamu Rasija pajšła va-bank. «Albo ty vyjhraješ, i tady ty za heta praktyčna adkazvać nie budzieš, albo ty prajhraješ, a tady jakaja roźnica, jaki abjom złačynstvaŭ my ździejśnili», — tłumačyć łohiku rasijan Padalak.
Pa jaho słovach, dla Ukrainy vidavočna, što ŭ vypadku projhryšu «ŭsia terytoryja Ukrainy budzie na niejki čas adziny bučanski les». Rasijanie zachočuć adpomścić za toj supraciŭ, jaki akazała Ukraina.
«Kali my chočam zachavacca ŭ pramym fizičnym sensie (užo navat nie jak kancepcyja dziaržavy, niejkaje ideałahičnaje supraćstajańnie rasijskaj impierskaj dziaržaŭnaści, a prosta fizična jak ludzi), u nas niama inšaha varyjanta, akramia jak vyjhrać», — upeŭnieny jon.
Padalak nie bačyć nijakaha pola dla kampramisu.
«U nas kampramis vielmi zrazumieły, jon vyznačajecca nastupnymi pazicyjami: vyvieli vojski z terytoryi [Ukrainy], zabylisia pra toje, što vy ŭpisali niešta ŭ svaju Kanstytucyju (heta vaša prablema, mižnarodnaje prava nie dazvalaje niešta ŭ adnabakovym paradku kudyści ŭpisvać), i za stałom pieramovaŭ vyrašyli dźvie rečy: jak vy budziecie apłačvać usie razbureńni i pakuty, jakija vy prynieśli krainie, i jak vy budziecie vydavać svaich vajennych złačyncaŭ», — havoryć jon.
Jon miarkuje, što kali nie budzie rašeńnia, chto vyjhraŭ hetu vajnu, budzie narastać uzajemnaja nianaviść i revanšyzm.
«Čym chutčej Rasija prajhraje, tym mienš razburalnym buduć dla śvietu nastupstvy vajny, śviet zmoža chutka zahaić rany, adnavić mižnarodnaje prava», — ličyć Padalak.
Što budzie z Krymam
Padalak kaža, što ŭ ramkach mižnarodnaha prava, kali Saviecki Sajuz raspaŭsia, było terytaryjalnaje raźmierkavańnie. Krym — heta terytoryja Ukrainy, «choča hetaha chtości ci nie».
«Hetyja praviły prydumanyja dla taho, kab nie było chaosu (kali ty macniejšy, pryjšoŭ i niešta zabraŭ). Heta pryncypovaja mahčymaść isnavać vaśmi miljardam nasielnictva ŭ śviecie jak takim», — kaža jon.
Padalak adznačaje, što Rasija zachapiła Krym, kali Ukraina była asłablenaja ŭnutranym pracesam transfarmacyi. «Heta niapravilna. Heta razburaje hałoŭnaje — razburaje stabilnaść śvietu jak takoha».
Adnaŭleńnie zakonnaści jon bačyć prosta. Rasijanie, jakija zajšli ŭ Krym, zachapili majomaść ukraincaŭ, pavinny buduć «viarnuć narabavanuju majomaść i syści tudy, adkul pryjšli».
Hramadzianie, jakija padzialajuć kaštoŭnaści Rasii, a nie kaštoŭnaści Ukrainy, «mohuć žyć u RF».
«Ty nie možaš u siłu taho, što ty chočaš kulturna być bližejšy da Rasii, klikać siudy ŭzbrojenych ludziej, kab zabivali ŭkraincaŭ».
Dzie žyć — heta vybar kožnaha čałavieka, kaža Padalak, «ale kali čałaviek praciahnie, umoŭna kažučy, zaklikać da adździaleńnia terytoryi — heta kankretny jurydyčny artykuł, jak u luboj krainie».
«Jość praviły, pa jakich vy pavinny žyć. Heta nie značyć, što vy pavinny zabić u sabie amatara Dastajeŭskaha, ale heta nie značyć, što vy pavinny zaklikać aŭtamatčykaŭ, kab zabić tych, chto choča čytać Katlareŭskaha. Umieńnie žyć u supolnaści — heta ŭmieńnie žyć pa praviłach, arhumientavana tłumačyć, što vy chočacie niešta atrymlivać dadatkova, ale nie zabivać za toje, što vy nie možacie rastłumačyć, što vam treba».
