«Ciapier ja b na heta nie pajšoŭ». Biełarus kupiŭ učastak ziamli na Zanzibary, ale akazałasia, što jość niuansy
Vydańnie CityDog pahavaryła ź biełarusam Alaksiejem, jaki šmat padarožničaŭ pa Afrycy, a potym zachacieŭ kupić sabie ŭčastak ziamli na vostravie Zanzibar. Praŭda, praces kupli ŭ jaho raściahnuŭsia na čatyry hady. Čamu tak?
Čamu Zanzibar: «Tut sapraŭdny raj»
Alaksiej ŭžo kala 15 hadoŭ žyvie ŭ Maskvie. Kaža, što imkniecca čaściej padarožničać i vielmi šmat jeździŭ pa Afrycy — pryčym na hramadskim transparcie. Dvojčy jahonyja padarožžy zakančvalisia na Zanzibary.
«Adzin raz ja pajechaŭ u padarožža z poŭdnia — z PAR praź Zimbabve, Mazambik, Zambiju, Małavi da Tanzanii. Tady ja pieršy raz trapiŭ na Zanzibar, i heta było 9 abo 10 hadoŭ tamu. Paźniej ja jechaŭ užo z poŭnačy Afryki, ź Jehipta, i znoŭ pajezdka skončyłasia na Zanzibary.
Mnie na vostravie vielmi spadabałasia, tam sapraŭdny raj — i milhanuła dumka, što možna było b tam niešta rabić».
Praca: razasłaŭ prapanovy pa hatelach — zaprasili barmienam
Praz paru hadoŭ historyja z Zanzibaram praciahnułasia. Niezadoŭha da svajho adpačynku ŭ studzieni Alaksiej razasłaŭ pa ŭpadabanych hatelach prapanovu papracavać u ich biaspłatna — za žyllo i ježu. Adhuknulisia adrazu niekalki haścinic, i adna ź ich była na Zanzibary.
«Ja vybiraŭ demakratyčnyja, moładzievyja hateli pa ŭsim śviecie. Hladzieŭ prosta vodhuki na TripAdvisor ci LonelyPlanet i ŭ miescy, jakija padabalisia, dasyłaŭ listy. Prapanovy prychodzili navat z Łacinskaj Amieryki i Paŭdniovaj Karei. Z Zanzibara u tym liku — jaho ja i vybraŭ. Kupiŭ kvitok i prylacieŭ».
Cikava, što barmienskaha vopytu ŭ Alaksieja nie było, «tolki tydni z try kursaŭ u Maskvie». Ale na Zanzibary niejkija asablivyja navyki i nie patrabavalisia — «tut usio jašče ŭ zarodkavym stanie».
«Žyŭ ja ŭ dobrym numary, praca była prosta pa fanu. Ranicaj narazali sadavinu dla śniadanku, u abied dapamahali na kuchni, viečaram užo nalivali napoi na bary, — raspaviadaje Alaksiej. — Vialiki plus takoj pracy ŭ tym, što ja za toj miesiac zavioŭ šmat znajomstvaŭ. Da hetaha času padtrymlivaju suviazi sa znajomymi z Hiermanii, Šviejcaryi, jakija tady pryjazdžali jakraz kuplać učastki».
Učastak: za 4 hady jaho košt vyras
Učastak ziamli na Zanzibary Alaksiej vyrašyŭ kupić čatyry hady tamu. Praŭda, aformili jaho pieršapačatkova «pa kryvoj schiemie», tamu praces zaciahnuŭsia.
«My nie viedali, jak tut što adbyvajecca, a nam skazali, što dla afarmleńnia patrebien miascovy partnior. My zaklučyli partniorskaje pahadnieńnie, pa jakim u nas z žonkaj — 95%, a ŭ partniora — 5%. I jon pavinien byŭ zajmacca afarmleńniem ŭsich papier. Ale potym vyśvietliłasia, što partnior tak ničym i nie zajmaŭsia, a dva hady tamu pamior. Adrazu pryjechać z-za pandemii my nie zmahli, tamu voś tolki ciapier razhrabajem usie pytańni. U adnoj jurydyčnaj kampanii nam paabiacali paspryjać, tamu pry dobrym raskładzie ŭžo praz paŭhoda ŭčastak narešcie budzie našym. A pakul u nas tolki damova kupli-prodažu, papiera z paznačeńniem miežaŭ učastka i słupki, jakimi my abharadzili ziamlu try hady tamu.
Tady jašče my najmali miascovych, jakija ačyścili ŭčastak ad kustoŭ i travy, ale za hety čas usio zarasło jašče bolš. Nu a pakul učastak da kanca nie aformleny, budavać na im my ničoha nie chočam. A tak u nas jość niekalki varyjantaŭ raźvićcia padziej: pa-pieršaje, ziamlu možna pradać (jaje košt za hety čas užo vyras); pa-druhoje, možna pabudavać mini-haścinicu i zaniacca biznesam — praŭda, dla hetaha pryjdziecca pierajechać na Zanzibar, a my pakul da hetaha nie hatovyja; i pa-treciaje, tut možna pabudavać lecišča i pryjazdžać samim abo zdavać.
Za ŭčastak na pieršaj bierahavoj linii, darečy, zapłacili 20 000 dalaraŭ. Ale jon nabyvajecca nie va ŭłasnaść (zamiežnikam nielha), a afarmlajecca ŭ lizinh na 33 hady z mahčymaj prałanhacyjaj.
Afryka «znutry»: kali zapłaciŭ avans, možna zabycca — nichto ničoha rabić nie budzie
«Pracuje tut usio žudasna: African style u poŭnaj krasie. Ludzi, jakija ŭžo pačali vieści biznes na vostravie, kažuć, što heta ciažka: ź piersanałam, ź ich staŭleńniem da pracy, z paŭsiudnaj karupcyjaj i h. d., kali iści zakonnym šlacham, budzie doŭha i nie fakt, što naohuł mahčyma. Kali niezakonnym, budzie chutčej, ale vielmi kryva. Plus da ŭsiaho dla ciabie jak dla zamiežnika budzie zusim inšy košt pasłuh. A jašče inšaja kultura, inšaje razumieńnie pryhažości.
Miascovyja na Zanzibary žyvuć adnym dniom. Kali abmalavać im pierśpiektyvu — maŭlaŭ, ciapier ty zrobiš hetuju pracu, potym my razhorniemsia i pracy (a adpaviedna hrošaj) budzie bolš, — heta naohuł nie pranikaje ŭ ich hałavu. Tolki tut i ciapier. Kali zapłaciŭ niejkija hrošy avansam, možna pra ich zabycca — niejkaja praca, moža, i budzie zroblenaja, ale tolki napałovu, a potym i naohuł zakinutaja.
Uzrovień žyćcia ŭ miascovych vielmi nizki. Vioski — hniatlivaje vidovišča. Jany tam žyvuć u niejkich skrynkach biez škła, pracujuć u poli, niešta vyroščvajuć, hladziać svaich chudych kuryc i karoŭ. Kali b nie turyzm, jaki prynosić i hrošy, i pracu, ja naohuł nie ŭjaŭlaju, jak by jany tut žyli. Akramia śpiecyj, vostraŭ ničoha nie vyrablaje.
Viza: na try miesiacy staviać pa prylocie
Kali jechać u Zanzibar nie pakietnym turam, a samastojna, Alaksiej usio roŭna raić spyniacca ŭ hateli. Kaža, što prynamsi tam budzie hatovaja ježa niadrennaj jakaści. U advarotnym vypadku pryjdziecca zakuplacca na rynkach — a heta časta brud, antysanitaryja i voś heta voś usio. Niejkija ŭniviersalnyja kramy z praduktami na vostravie taksama jość, ale ceny tam na paradak vyšejšyja, bo takija miescy pieršapačatkova aryjentavanyja na pryjezdžych. «A ŭ Afrycy kali ty bieły čałaviek, to aŭtamatyčna ŭ ciabie jość hrošy».
Zahadzia rabić vizu na Zanzibar nie treba: jana stavicca pa prylocie na try miesiacy i kaštuje 50 dalaraŭ. Potym možna vyjechać na dzianiok i znoŭ viarnucca. A kali pačynajecie svoj biznes na vostravie, to na dva-try hady afarmlajecca rezidenctva — paśla možna padoŭžyć.
Paśla kavidu: ceny vyraśli niekrytyčna, valuta stabilnaja
«Kali ja pryjechaŭ na Zanzibar pieršy raz, na poŭnačy vostrava było cichaje, spakojnaje miesca ź minimumam haścinic. I litaralna hady try tamu tut zdaryŭsia turystyčny bum, aktyŭna stali budavacca hateli, palacieli turysty, jašče i miascovy aeraport staŭ prymać mižnarodnyja rejsy (a nie tolki łakalnyja, jak było raniej) — i na toj ža poŭnačy zaraz šumnaja tusoŭka.
Praz kavid ja nie byŭ na Zanzibary try hady, ciapier prylacieli z žonkaj — usio zabudoŭvajecca. Ceny krychu vyraśli, ale nie tak krytyčna, jak u Biełarusi ci Rasii. Valuta stabilnaja — kurs miascovaha šylinha amal takim i zastaŭsia. Tak što svoj učastak na Zanzibary — niadrenny zapasny varyjant (ci mała što budzie ŭ bližejšy čas u Biełarusi i Rasii). A na vostravie pa fakcie možna i ŭ niejkim bunhała biez škła žyć — nadvorje tut kruhły hod vydatnaje».
A navošta naohuł lacieć na Zanzibar?
«Zanzibar — heta plažny adpačynak. Płavańnie, snorklinh, ekskursii na inšyja astravy, delfiny. Možna ŭziać safary na kantynient i viarnucca nazad. A niechta robić uzychodžańnie na haru Kilimandžara, a potym jedzie na Zanzibar adpačyvać. Ničoha inšaha tut niama. Mnie na Zanzibary dobra.
Na emocyjach i było pryniata rašeńnie kupić tut učastak — prosta paryŭ dušy. Kali b ja viedaŭ, što ŭsio heta raściahniecca na taki doŭhi čas, to, napeŭna, nie kuplaŭ by. Tady heta bačyłasia bolš prostym i chutkim. Ale, moža, heta tolki nam tak nie pašancavała. Viedaju ludziej, jakija kupili ŭčastak 4 hady tamu, pabudavali haścinicy — i ciapier u ich užo ŭsio pracuje».
Čytajcie taksama:
«Iržavy» most cieraź Śvisłač nie adpracavaŭ i miesiac
«Najlepšaja vulica» ŭ Minsku zakryłasia ŭsiaho praz paru miesiacaŭ paśla adkryćcia
