«Jeść usio, nie moža nabyć tualetnuju papieru». Jak ciapier žyvie Mikoła Aŭtuchovič — palitviazień z rekordnym palityčnym prysudam
Jak žyvie ciapier u hrodzienskaj turmie vaŭkavyski pradprymalnik Mikoła Aŭtuchovič, jakomu dali 25 hadoŭ za nibyta «akt teraryzmu» i «žadańnie zabić Łukašenku», daviedałasia Radyjo Svaboda.
Mikoła Aŭtuchovič u 2014 hodzie
Mikoła Aŭtuchovič 20 kastryčnika čarhovy raz trapiŭ u karcar na 7 dzion. U vieraśni jon užo pravioŭ 10 dzion u karcary za toje, što padčas jahonaha dziažurstva pa kamiery ŭ sukamiernika znajšli zabaronieny pradmiet.
Padobna, što palitviazień amal całkam viarnuŭsia da svajho zvyčajnaha badzioraha stanu paśla praciahłaha haładavańnia. Adnak u jaho jašče zdarajucca acioki. Cukar u kryvi na vierchniaj miažy normy, adrazu paśla haładoŭki jon byŭ mocna padvyšany.
Jahonyja listy da svajakoŭ pačali dachodzić. Mikoła ahułam nie skardzicca blizkim na zdaroŭje, piša, što adčuvaje siabie dobra. Pieradaje padziaku ŭsim ludziam, jakija jaho padtrymlivajuć.
Aŭtuchovič dosyć chutka viarnuŭsia da narmalnaha charčavańnia, spažyvaje ŭsie pradukty, časta prosić pieradać sała i cybulu, pieradaje, što ŭžo nie patrebnyja dziciačyja fruktovyja piure, jakija dapamahli jamu vychodzić z haładoŭki. Jamu dachodziać pasyłki poštaj, pieradajuć pieradačy.
«Jamu zaŭždy darečy dasyłać arechi, suchafrukty, miasnyja čypsy, suchuju i vialenuju rybu, vialenyja miasnyja vyraby, cybulu, časnok, čystyja paštoŭki», — kažuć blizkija.
Apošnim časam da Aŭtuchoviča nie prychodzić čałaviek z «atavarki», tamu palitviazień sam nie moh nabyć tualetnuju papieru i vadu z turemnaj kramy, choć mieŭ hrošy na svaim turemnym rachunku.
Ciapier blizkija źbirajuć Aŭtuchoviča na etap u kałoniju, płanujuć pierad etapam zabrać niepatrebnyja rečy ź SIZA. Pakul jamu pieradali termabializnu i ciopłyja rečy.
