«Zamiest OK16 adkryjuć tanny supiermarkiet». Što stała z kultavymi tusovačnymi miescami Minska
Navin pra toje, što ŭ Minsku znoŭ začyniłasia niejkaje lubimaje ŭsimi miesca ciapier amal niama, tamu što začyniłasia amal usio. A što potym adbyvajecca z hetymi łakacyjami? The Village Biełaruś parazmaŭlaŭ ź minčankaj, jakaja dobra znajomaja ź losam Kastryčnickaj i «Korpusa» paśla represij i daviedaŭsia, dzie ciapier tusujucca minčanie i jakaja ŭvohule atmaśfiera ŭ hetych miescach.
«Dobra, što ŭ «Korpus» nie pryjšli jabaćki viaršyć svaje beeresemnyja spravy»
— Ja nazirała, jak mianiaŭsia «Korpus». Spačatku toj stary «Korpus» doŭhi čas byŭ prosta začynieny na ramont — heta značyć, nie zakryvaŭsia aficyjna, ale tam ničoha i nie adbyvałasia. Kali 9 krasavika začynilisia «Dźvie žaby», mnie asabista stała zrazumieła, što taho «Korpusa» ŭžo nie budzie.
«Korpus» zakryŭsia ŭ červieni, ja dobra pamiataju momant, jak tudy pryjechali nieznajomyja mnie ludzi, roznyja rabočyja i pačali kapitalny ramont. Pamianiali ŭsie vokny na škłopakiety, padłohu, pierafarbavali ścieny ŭ bieły koler i tualety (zafarbavali ŭsie nadpisy, pamianiali ŭnitazy, rukamyjniki i lusterki, mužčynski tualet pafarbavali ŭ błakitny koler, a žanočy — u ružovy), prybrali z vulicy skulpturu z łazy, nasaroha, postary Karaliny Palakovaj — uvohule, prybrali ŭsie znakavyja štuki, zastaŭsia tolki «tron Chimiery» i akno sa stykierami, jakoje pa-raniejšamu ŭsich čakaje.
Potym u «Korpus» zajechali novyja chłopcy i adkryli tam ustanovu z morapraduktami Heart for art kitchen i halereju sučasnaha mastactva Heart For Art. Na bary pracujuć chłopcy ź pieršaha składu «Vieršaŭ», za halerejnuju prastoru taksama adkazvaje adekvatny čałaviek.
Zrazumieła, što taho «Korpusa» ŭžo nie budzie, tamu što atmaśfiera ŭ cełym pamianiałasia va ŭsioj krainie, horadzie, tvorčaj tusoŭcy. Ale nielha skazać, što ŭ «Korpus» pryjšli niejkija jabaćki viaršyć svaje beeresemnyja spravy. U halerei prachodziać dobryja vystavy. Ja dumaju, što hetaje miesca, jakoje raniej było mahnitam dla ŭsiaho cikavaha i novaha, i dalej budzie raźvivacca prykładna ŭ hetym klučy.
«U OK16 adkryjuć rasijski dyskaŭntar»
— Na Kastryčnickaj sapsavalisia «Vieršy»: pieršy skład kamandy syšoŭ, sapsavałasia ježa, praktyčna pierastała pracavać halereja — vystavy tam bolš nie pravodziać.
U cełym z dobraha na Kastryčnickaj ciapier — heta maleńkija kaviarni nakštałt Dreva. Jašče mnie vielmi padabajecca tam prastora Dandy Land, u jakoj niadaŭna adkryłasia kłasnaje kaviarnia Red Coffee Store — tam utulna i časta prachodziać usiakija art-štuki, možna pamalavać, čamuści pavučycca, pracujuć klovyja ludzi. Lublu Dandy Land u tym liku i za toje, što jany ŭvieś čas akulturvajuć svaju prastoru niadaŭna pakłali plitku na zadnim dvary, robiać novyja malunki.
U cełym, Kastryčnickaja z boku raki mianie raduje bolš — uletku tam vielmi ŭtulna, niama mašyn i starońnich ludziej.
Z dvuch bakoŭ Kastryčnickaj ciapier vielmi časta patruluje milicyja i źbirajucca ŭstalavać videanazirańnie — heta ŭžo dakładna.
A jašče na miescy OK16 chutka źjavicca — vy nie pavierycie — «Śvietofor» (rasijskaja razdrobnaja sietka žorstkich dyskaŭntaraŭ, jakija tradycyjna adkryvajuć u pramzonach za vielizarnych placoŭkach — The Village Biełaruś). Na hetaj placoŭcy ŭžo idzie ruch — chłopcy rychtujucca da adkryćcia.
