Na cyrymonii anieksii Pucin vystupiŭ z vysakaparnaj, ale niekankretnaj pramovaj. Budzie kurs na procistajańnie z Zachadam, ale čyrvonyja linii nie vyznačanyja
Uładzimir Pucin na cyrymonii ŭ Kramli padpisaŭ damovy, pavodle jakich Rasija anieksuje zachoplenyja terytoryi Ukrainy. U skład Rasii, pavodle hetych damoŭ, musiać uvajści terytoryi samaabvieščanych «DNR» i «ŁNR», a taksama Chiersonskaja i Zaparožskaja vobłaści. Z boku anieksavanych terytoryj dahavory padpisali, adpaviedna, Dzianis Pušylin, Leanid Pasiečnik, Uładzimir Salda i Jaŭhien Balicki. Źviarnuła ŭvahu adsutnaść patryjarcha Kiryła. Pa aficyjnaj viersii, jon zachvareŭ na kavid.
Pierad padpisańniem damovaŭ Pucin vystupiŭ sa zvarotam u Hieorhijeŭskaj zale Kramla. Jon nahadaŭ, što na akupavanych terytoryjach, maŭlaŭ, prajšli «refierendumy», na jakich žychary zrabili svoj vybar.
Źviartajučysia da ŭkrainskich uładaŭ, Pucin skazaŭ, što Rasija hatovaja da pieramovaŭ ab miry, ale abmiarkoŭvać «vybar» hramadzian čatyroch rehijonaŭ nie budzie. «Ludzi, jakija žyvuć u DNR, ŁNR, Chiersonie i Zaparožžy, stanoviacca našymi hramadzianami. Nazaŭždy», — zajaviŭ Pucin.
Zatym Pucin abvinavaciŭ Zachad u tym, što toj choča asłabić i razvalić Rasiju. Jon paabiacaŭ, što Rasija abaronić svaje kaštoŭnaści: «Zachadu nie patrebnaja Rasija, ale jana patrebnaja nam». Taksama Pucin pryhadaŭ jadziernyja ŭdary pa Chirasimie i Nahasaki, bambardziroŭki Drezdena i inšych niamieckich haradoŭ padčas Druhoj suśvietnaj vajny, a taksama raźviazanyja vojny ŭ Karei i Vjetnamie.
Taksama jon uspomniŭ pra niadaŭnija vybuchi na hazapravodach «Paŭnočny patok» i abvinavaciŭ u hetym «anhłasaksaŭ». Zakančvajučy temu Zachadu, Pucin skazaŭ, što Rasija ciapier viadzie ź im bitvu za svaju budučyniu: «Los paklikaŭ nas na pole bitvy za naš narod. Za vialikuju histaryčnuju Rasiju».
Pierad hetym 17-23 vieraśnia na akupavanych terytoryjach prajšli «refierendumy», na jakich žycharoŭ pytalisia, ci zhodnyja jany z tym, kab ich rehijony ŭvajšli ŭ skład Rasii. Pavodle źviestak śpiešna stvoranych miascovych CVK, pieravažnaja bolšaść prahałasavała «za».
Prezident Ukrainy Uładzimir Zialenski jašče da zakančeńnia «refierendumaŭ» nazvaŭ ich fiktyŭnymi i dadaŭ, što kali Rasija anieksuje ŭkrainskija terytoryi, to nijakich pieramovaŭ jon vieści nie budzie. Inšyja suśvietnyja lidary taksama zajavili, što nie pryznajuć vyniki «refierendumaŭ».
Maskoŭskaja fondavaja birža adreahavała na toje, što pramova Pucina była niekankretnaj, rostam akcyj.
