Piać sposabaŭ vykarystać lišniuju kavavuju hušču

Šmat chto lubić pačynać ranicu z kubka ciopłaj duchmianaj kavy. Kali my jaje vypili, zvyčajna my vykidajem kavavuju hušču ŭ śmietnicu, ale nasamreč heta niepravilna. Što jašče možna zrabić z huščaj?

Fota: pixabay.com

Ačyścić joj posud

Kavavaja hušča maje abraziŭnyja ŭłaścivaści, tamu jana dobra spraŭlajecca z zasochłym tłuščam. Prosta naniasicie troški huščy na hubku dla myćcia posudu i aściarožna patrycie posud, i vy ŭbačycie vynik. Nie turbujciesia, što hušča paškodzić posud, bo jana duža miakkaja, piša obcasy.pl.

Prybrać niepryjemnyja pachi

Chtości lubić mocny pach kavy, a kamuści ad jaho drenna. Ale ž dakładna viadoma, što hety pach dapamahaje maskiravać inšyja i mienš pryjemnyja pachi.

Kali ŭ vas u chaładzilniku drenna pachnie, vysypcie na talerku abo misku kavavuju hušču i pastaŭcie jaje tudy. Taksama možna krychu padsmažycie kavavaje ziernie na patelni, kab u vas va ŭsim domie pryjemna pachła lubimym napojem. Kali ž u vas drenna pachnuć ruki — naprykład, paśla hatavańnia stravaŭ z rybaj ci časnakom — dadajcie krychu huščy ŭ vadkaje myła i vymyjcie im ruki.

Vykarystać jak uhnajeńnie dla raślin

Kab chatnija raśliny byli zdarovyja, źmiašajcie hlebu ŭ vazonach z kavavaj huščaj. Hetak vy i palepšycie adychod vady ŭ vazonie, i adpužniecie nasiakomych. Taksama takaja hleba budzie dobraj krynicaj minieralnych rečyvaŭ nakštałt fosfaru, kaliju i azotu, jakija zvyčajna ŭvachodziać u skład uhnajeńniaŭ. Ale nie varta sypać u vazon zanadta šmat huščy, i nie zabyvajcie, što jana nie zdoleje całkam zamianić śpiecyjalnyja ŭhnajeńni.

Ci jak kaśmietyčny pilinh

Kavavy pilinh — papularny sposab dobra ačyścić skuru i stymulavać u joj kryvatok. Taksama jon dapamahaje ŭ baraćbie z celulitam i pavyšaje pruhkaść skury. Vy možacie vykarystać dla pilinhu kavavuju hušču ź nievialikaj kolkaściu vady, a taksama dadać tudy trochi aliŭkavaha aleju, kakosavaha masła ci karyčnievaha cukru. Jakaja b sumieś u vas nie atrymałasia, treba ŭcierci jaje ŭ skuru i zmyć, a potym nanieści na cieła krem.

Pałaskać kavavaj huščaj vałasy

U kavie jość rečyvy, jakija dapamahajuć zrabić ciomnyja vałasy jašče ciamniejšymi, tamu pałaskańni vałasoŭ huščaj spryjajuć lepšamu koleru i blasku vašaj pryčoski. Dla błandynak hetaja pracedura nie padydzie, ale kali ŭ vas ciomnyja vałasy, trymajcie recept. Źmiašajcie vykarystanuju kavavuju hušču i vadu ŭ praporcyi 1:4, nahrejcie sumieś da kipieńnia i astudzicie. Pracadzicie sumieś i pałaskajcie vałasy vadkaściu, što ŭ vas atrymałasia, 3 razy na tydzień.