Što ciapier u novym hateli, jaki adkryŭsia na miescy 2-j haradskoj balnicy
U dalokim 2016 hodzie terytoryja byłoj 2-j haradskoj balnicy pačała mianiacca: na placoŭku ŭ centry horada zajechała budaŭničaja technika, startavaŭ znos. Praŭda, razbureńniu padvierhlisia nie ŭsie budynki: tyja, što majuć status historyka-kulturnaj spadčyny, zachavali i źbiralisia restaŭravać. Naohuł, hetamu ŭčastku, raźmieščanamu na skryžavańni Bahdanoviča i Kupały, abiacali vialikuju budučyniu: tam pavinien byŭ źjavicca šmatfunkcyjanalny kompleks z haścinicaj, restaranam, kramami i ofisami. I voś praz 6 hadoŭ tut adkryŭsia hatel The Basilian Minsk, jaki naležyć sietcy Hilton, piša Onliner.by.
Sama nazva adsyłaje da historyi Minska: kaliści na hetym miescy stajaŭ žanočy manastyr ordena bazyljanaŭ. Pieršapačatkova jon byŭ pabudavany z dreva ŭ 1630 hodzie. Potym pieražyŭ pažar i paŭstaŭ z popiełu ŭžo kamiennym. Ułasna, hetyja budynki naohuł mnohaje bačyli. Mienavita tamu i zapatrabavali surjoznaj rekanstrukcyi.
— Byŭ praviedzieny vialiki abjom rabot, jaki zaniaŭ niekalki hadoŭ. Umacoŭvalisia ścieny, zamianialisia kamunikacyi… Pry hetym treba było zachavać aŭtentyčnaje źniešniaje abličča. Naohuł, adnaŭleńnie budynkaŭ — heta kudy składaniej, čym budaŭnictva z nula, — udakładnili pradstaŭniki The Basilian Minsk.
Haścinica zajmaje dva budynki. Jany złučanyja pamiž saboj pierachodnaj šklanoj halerejaj. Interjer možna adnieści da «nieakłasiki»: mołdynhi na ścienach i pazałota spałučajucca tut ź plitkaj-kabančykam i sučasnym aśviatleńniem. Za košt vysokich trochmietrovych stolaŭ i prastornych kalidoraŭ stvarajecca adčuvańnie, što hatel i numary ŭ im bolšyja, čym jany jość nasamreč.
— Z hatela adkryvajucca pryhožyja vidy na horad, pryčym absalutna ŭsio roŭna, ź jakoha boku znachodzicca numar, — heta budzie albo vulica Bahdanoviča ź jaje histaryčnaj zabudovaj, albo Śvisłač.
U adnoj častcy kompleksu na pieršym paviersie raźmiaščajecca zona resiepšien i łobi. Tut ža jość nievialikaja «krama», dzie možna ŭ luby čas nabyć usiakija drobiazi — pradmiety hihijeny, lohki pierakus, vadu.
Usiaho ŭ The Basilian Minsk 39 numaroŭ, jakija pa svajoj sutnaści nahadvajuć kvatery. Farmataŭ žylla šeść: jość nievialikija studyi, jość apartamienty z adnoj i dvuma spalniami roznaha ŭzroŭniu kamfortnaści (standartny i deluxe). U pieršuju čarhu jany adroźnivajucca svajoj płoščaj (samaja maleńkaja — 35 «kvadrataŭ», a samaja vialikaja — 130), a taksama funkcyjanalnym napaŭnieńniem.
Naprykład, u adnapakajovych numarach kuchnia abstalavana tolki mikrachvaloŭkaj, chaładzilnikam i elektračajnikam. U apartamientach da ich dadajecca varačnaja panel, duchoŭka, posudamyjku i navat kapsulnaja kavamašyna. A ŭ dvuchspalnych, akramia hetaha, praduhledžana asobnaja harderobnaja i niekalki sanvuzłoŭ.
Košt pražyvańnia ŭ tym ci inšym varyjancie zaležyć ad zahružanaści hatela, pary hoda, kankretnaj daty. Ale ŭ siarednim košt za adnu noč varjirujecca ad $150 da $570 pa kursie.
Daražej za ŭsio abyjdziecca apartamient Basilian, u jakim moža raźmiaścicca vialikaja kampanija siabroŭ ci dźvie siamji ź dziećmi: tam i spalni dźvie, i haścioŭniaŭ z sanvuzłami stolki ž.
— Taksama ŭ nas jość adzin numar, praduhledžany dla ludziej z abmiežavanymi mahčymaściami. Jon abstalavany dadatkovymi vyhodami — trymalnikami, ručkami, knopkami vykliku piersanału. Plus tam bolš svabodnaja płaniroŭka i šyrokija prajomy, kab čałaviek moh pierasoŭvacca na vazku.
A jašče hetaja haścinica pet friendly: za nievialikuju dadatkovuju płatu tut možna raźmiaścicca sa svaim chatnim hadavancam.
Dla haściej The Basilian Minsk kruhłasutačna adkryta trenažornaja zała, jaki ŭklučaje ŭ siabie zonu kardya i siłavych praktykavańniaŭ. Usio abstalavańnie — ad viadomaha vytvorcy Techno Gym.
Akramia taho, u hateli jość svoj restaran the Refectory (raniej tak nazyvalisia manastyrskija trapieznyja). Składajecca ź dźviuch załaŭ, aformlenych u roznaj stylistycy i kalarovaj hamie. U pieršaj zvyčajna padajuć śniadanki, a druhaja bolš padychodzić dla abiedaŭ i viačeraŭ. Jaho ŭ tym liku zdajuć u arendu dla arhanizacyi śviataŭ — pahatoŭ navat asobny ŭvachod z vulicy majecca, tak što pastajalcaŭ haścinicy i prosta naviedvalnikaŭ restarana mohuć nie pierasiakacca.
U mieniu — stravy jeŭrapiejskaj kuchni i krychu biełaruskaj u aŭtarskim pračytańni. Košty takija: za supy paprosiać 11-16 rubloŭ, za sałaty-15-29 rubloŭ, za haračaje — 16-27 rubloŭ.
— Da kanca hoda spadziajemsia adkryć dźvie pierahavornyja, jakija možna budzie arandavać dla biźnies-sustreč. Raźličanyja jany buduć na 10-20 čałaviek.
The Basilian Minsk znachodzicca pa adrasie vulica Bahdanoviča, damy №2/2 i №2/3.
