6 biełaruskamoŭnych jutub-kanałaŭ, jakija vy mahli prapuścić
Biełaruski jutub raście, ale ž kanałaŭ na rodnaj movie ŭ im usio jašče niašmat. Što rabić tym, chto choča hladzieć videa pa-biełarusku? Zrabili dla vas nievialikuju padborku cikavych kanałaŭ.
Skrynšot: videa z kanała «Hodna»
CHADANOVIČ | CHADANOVIČ (7,6 tysiačy padpisčykaŭ)
Paet, pierakładčyk i litaraturaznaŭca Andrej Chadanovič zavioŭ svoj kanał u krasaviku 2022 hoda. U situacyi, kali biełaruskaja kultura pakutuje praz represii i kryzis u krainie, Chadanovič uziaŭ na siabie zadaču raskazvać pra ajčynnuju i zamiežnuju litaraturu, što ciapier aktualnaja dla biełarusaŭ.
Jamu cikavyja, viadoma, biełaruskija aŭtary, tamu Chadanovič zdymaje pra Kupału, Bykava i Karatkieviča, ale nie zabyvaje raspavieści i pra Znaka, Fiadutu i Alaksandrava jak aŭtaraŭ sučasnaj litaratury za kratami. A jašče pieraasensoŭvaje Puškina jak impierca, raskazvaje pra Biełaruś vačyma Stanisłava Ježy Leca, zhadvaje pra «Vosień patryjarcha» (blizkaja da siońniašniaj Biełarusi historyja) i šukaje suviazi pamiž Hierbiertam Uełsam i biełaruskim hramadstvam. Karaciej, adna intelektualnaja asałoda.
Hodna (47,1 tysiačy padpisčykaŭ)
Hramadskaja kampanija «Hodna» robić bujny pa biełaruskich mierkach jutub-kanał, dzie bahata karysnaha kantentu. Kali adčuvajecie siabie ŭ rodnaj movie niaŭpeŭniena, prahledźcie, naprykład, moŭnaje šou «Homan» z 12 častak, jakoje jaho aŭtary nazyvajuć sapraŭdnym anłajn-kursam pa vyvučeńni rodnaj movy. Ci źviarnicie ŭvahu na videaprajekt «Hodnaja Biełaruś», što raspaviadaje pra toje, čym biełarusy ździŭlali śviet i što my jamu dali, abo zacanicie videavandroŭki pa biełaruskich rehijonach. Kantent dla dziaciej, darečy, u «Hodna» taksama jość.
U apošnija miesiacy kanał byŭ nie nadta aktyŭny, ale niekalki tydniaŭ tamu na im znoŭ pačali źjaŭlacca novyja videa. Apošniaje ź ich — pra biełaruskuju łacinku, na jakuju apałčylisia biełaruskija prapahandysty, i pra toje, jak navučycca čytać i pisać biełaruskaj łacinkaj.
Budźma biełarusami! (4,6 tysiačy padpisčykaŭ)
Heta staronka jašče bolš stałaj hramadskaj inicyjatyvy — «Budźma biełarusami!». Ciapier na kanale aktyŭna vychodziać videa z rubryki «Historyja za 5 chvilin»: tut i zvykłyja sa školnych časoŭ asoby nakštałt Jeŭfrasińni Połackaj i Usiasłava Čaradzieja, i bolš niestandartnyja historyi — naprykład, pra pieršuju biełaruskuju mietałurhiju ci Padlašša.
«Budźma!» vučyć pa-biełarusku hatavać kačynyja nožki, vieraščaku i kałačyki z hrybnym načyńniem, a taksama prapanuje svaju čytanku dla małych pa-biełarusku. Časam tut raskazvajuć pra technałahičnyja vynachodnictvy ŭ duchu elektrakaraŭ ci dapoŭnienaj realnaści. Adznačym i novaje na kanale: mienš za tydzień tamu na im vyjšaŭ pieršy epizod sieryjała «Tryzub i Pahonia» ź viadoŭcaj Kaciarynaj Vadanosavaj, jakaja raskazvaje pra tysiaču hadoŭ ahulnaj historyi biełarusaŭ i ŭkraincaŭ.
Tradycyja / Belarusian Traditional Culture (3,75 tysiačy padpisčykaŭ)
Stvaralniki hetaha kanała ŭmiejuć pryhoža pakazać biełaruskija abrady i stroi. Častka kantentu ŭ ich dublujecca pa-anhlijsku, jość i roliki dla dziaciej.
Cikavaja rubryka — majstar-kłasy, na žal, jana nie nadta raźvitaja. Ale ž i mima taho, što ŭžo na kanale, prachodzić nie varta: tut vy znojdziecie majstar-kłasy pa vycinancy, stvareńni kaladnaj zorki i kaladnaj maski Kazy. Čym nie nahoda pasprabavać zrabić što-niebudź z hetaha samastojna?
Vozhyk (3,7 tysiačy padpisčykaŭ)
Aŭtar resursu Vozhyk pierakładaje na biełaruskuju movu z anhiłjskaj i niamieckaj humarystyčnyja roliki, ale nie abminaje i surjoznych temaŭ. Ź viasiołaha adznačym pierakład frahmientaŭ animacyjnaha sieryjała Awkward Puppets ci, naprykład, roliki «Kali ciabie nie zaŭvažajuć u restaranie» i «17 sposabaŭ kinuć dziaŭčynu» (kantent 18+ tut taksama jość).
Surjoznaha kantentu tut niašmat, prykład — biełaruskamoŭny trejler filma «Matryca: Uvaskrašeńnie». Hledziačy pa apošnich videa, aŭtar sprabuje pierakładać na biełaruskuju stendap — atrymoŭvajecca niabłaha!
Tutejšy Šlachcič (7,9 tysiačy padpisčykaŭ)
Kanał błohiera Usiasłava Paškieviča źjaviŭsia jašče ŭ 2015 hodzie, ale nikoli videa ŭ im nie vychodzili tak intensiŭna, jak ŭ apošnija miesiacy. Paškieviča zbolšaha cikaviać histaryčnyja temy: tak, jon razvažaje pra antysaviecki supraciŭ u Biełarusi i historyju Jaŭhiena Žychara, pra toje, ci źjaŭlajecca biełaruskim Smalensk, chto taki Suvoraŭ i jakimi byli raniejšyja paŭstańni na Biełarusi.
Raniej chłopiec sprabavaŭ zakranać i inšyja pytańni. Tak, Usiasłaŭ dzialiŭsia svaim šlacham da biełaruskaj movy i hutaryŭ z vykładčycaj ź Ispanii Anchiełaj Eśpinosaj, jakaja razmaŭlaje pa-biełarusku.
«Naša Niva» — bastyjon biełaruščyny
PADTRYMAĆSiem padkastaŭ pa-biełarusku dla tych, chto choča słuchać svajo
Chočacie na rodnaj movie? Voś piać resursaŭ, dzie možna pahladzieć kino pa-biełarusku
Čarlz, Karł, Karal? Jak nazyvać novaha brytanskaha manarcha pa-biełarusku
