Jašče 10—15 kiłamietraŭ, i ŭkrainskaja armija razreža chiersonskuju hrupoŭku napałam
Ukrainskaja armija praciahvaje pastupova pašyrać płacdarm na levym bierazie Inhulca. Adnačasova z paŭnočnaha frontu paviedamlajecca pra toje, što ŭkraincy farsiravali Askoł kala Baravoj.
Miarkujučy pa paviedamleńniach rasijskich frantavych błohieraŭ, jašče 10—15 kiłamietraŭ, i ŭkrainskaja armija razreža chiersonskuju hrupoŭku napałam.
Ukrainskaja armija praciahvaje pastupova pašyrać płacdarm na levym bierazie Inhulca. Rasijski błohier «Rybaŕ» paviedamiŭ, što rasijskim vojskam udałosia adbić siońniašni šturm. Tym nie mienš, vyhladaje, što ŭkrainski klin užo ŭrezaŭsia ŭ rasijskuju abaronu na pałovu hłybini. Da horada Bierysłaŭ ukraincam zastajecca 10—15 kiłamietraŭ. A z padzieńniem ci błakadaj Bierysłava pravabiarežnaja hrupoŭka rasijskaj armii budzie raśsiečanaja.
Na poŭnačy, pad Kryvym Roham, pahroza akružeńnia navisła nad rasijskimi abaroncami Archanhielskaha.
Pa poŭdni praciahvalisia ź pieramiennym pośpiecham bai miž Pasad-Pakroŭskim i Kisialoŭkaj.
Na paŭnočnaj častcy frontu praciahvajecca zmahańnie za Liman i pasiołki na zachad i ŭschod ad jaho. U toj ža čas
rasijski błohier Reverse Side of the Medal piša, pra «paśpiachovaje farsiravańnie Uzbrojenymi siłami Ukrainy raki Askoł u rajonie pasiołka Baravaja, dzie jany zdoleli nazapasić istotnyja siły». Kali hetaja infarmacyja paćvierdzicca, heta aznačaje, što ŭkraincy raźvivajuć svoj nastup u tył Limana i ŭ kirunku Svatava.
Baravaja — pasiołak haradskoha typu na levym bierazie raki Askoł. Da vajny tam žyło 5300 čałaviek. U Baravoj skryžoŭvajucca darohi Kupiansk-Liman i Izium-Svatava.
U toj ža čas rasijskija błohiery paviedamlajuć pra ŭziaćcie rasijskimi siłami Mikałajeŭki II-j kala Bachmuta i pra abmien artyleryjskimi ŭdarami ŭzdoŭž usioj linii frontu miž Zaparožžam i Danieckam.
