Na scenu vyjšła rasijskaja «Nacyjanalnaja respublikanskaja armija», jakaja ŭziała na siabie adkaznaść za zabojstva Duhinaj
Pra toje, što padryŭ aŭtamabila z dačkoj Alaksandra Duhina ŭ Padmaskoŭi — heta partyzanskaja akcyja, zładžanaja jak supraciŭ kramloŭskamu režymu, zajaviŭ rasijski apazicyjanier Illa Panamaroŭ, jaki žyvie va Ukrainie. U efiry svajoj prahramy «Utro fievrala» jon raskazaŭ, što da jaho źviarnułasia tak zvanaja «Nacyjanalnaja respublikanskaja armija» (NRA), jakaja ŭziała adkaznaść za toje, što zdaryłasia, na siabie.
«Kamandzir uzvoda» «Nacyjanalnaj respublikanskaj armii», jaki ananimna vyjšaŭ u efir u prahramie Panamarova
U manifieście NRA, začytanym Panamarovym, havorycca, što ŭdzielniki ruchu — rasijskija aktyvisty, vajskoŭcy, palityki, «ciapier bajcy i partyzany». Jany abviaścili Uładzimira Pucina «uzurpataram ułady i vajskovym złačyncam, jaki złamaŭ Kanstytucyju, raźviazaŭ bratazabojčuju vajnu pamiž słavianskimi narodami i adpraviŭ rasijskich žaŭnieraŭ na dakładnuju i biessensoŭnuju śmierć», a čynoŭnikaŭ rasijskaha ŭrada i rehijanalnych administracyj, siłavikoŭ — «pamahatymi ŭzurpatara».
U NRA zajavili, što «pazbaŭlenyja prava hołasu, ludzi majuć prava na paŭstańnie suprać tyranaŭ». Taksama jany pryhrazili, što praciahnuć padobnyja akcyi, skiravanyja suprać pamahatych ułady, padkreśliŭšy, što pad pahrozaj buduć tolki jany: «My pravodzim akcyi tolki suprać asob hetaj ułady. My nie budziem atakavać hramadzianskija abjekty i mirnych hramadzian. Naša meta — spynić źniščeńnie Rasii i jaje susiedziaŭ, spynić dziejnaść kupki kramloŭskich działkoŭ, jakija prysmaktalisia da bahaćciaŭ našaha naroda i ździajśniajuć siońnia złačynstvy ŭnutry krainy i za jaje miežami. Śviet — nie vorah Rasii, a Rasija — nie vorah čałaviectvu, i my dakažam heta spravaj».
Illa Panamaroŭ taksama skazaŭ, što ŭ apošnija miesiacy ŭ Rasii NRA praviała «mnohija inšyja partyzanskija akcyi pramoha dziejańnia», adnak nie ŭdakładniŭ, pra jakija mienavita padziei havorka.
U vypusku taksama źjaviŭsia mužčyna ŭ vajskovaj formie. Jon schavaŭ svoj tvar i, nie nazyvajučy imia, pradstaviŭsia jak kamandzir uzvoda i skazaŭ, što Pucin «bolš za 20 hadoŭ rabuje narod Rasii, uciskaje pravy i svabody, pasyłaje na zaboj u raźviazanyja im ža vajny, pryjšoŭ čas pakłaści hetamu kaniec».
