Chočacie na rodnaj movie? Voś piać resursaŭ, dzie možna pahladzieć kino pa-biełarusku
«Naša Niva» raskazvaje pra płatformy, dzie jość kino na rodnaj movie.
«Kinakonh»
Hetaja inicyjatyva — lehienda biełaruskaj kinaahučki. «Kinakonh» nie tolki pierakładaje zamiežnyja filmy na rodnuju movu, inicyjatyva jašče i zładziła ŭ ramkach prajekta «Biełaruskija ŭikendy» niamała kinapakazaŭ biełaruskamoŭnych filmaŭ u kinateatrach. Kolkaść naviednikaŭ — bolš za 50 tysiač čałaviek.
Zaraz «Kinakonh» robić aficyjny dublaž multfilmaŭ ad Disney na biełaruskuju movu: niadaŭna, naprykład, pradstavili multfilm «U pošukach Nema». Znajści stužki ad «Kinakonha», jak i sačyć za novymi relizami, možna na stryminhavym resursie VOKA, treba prosta vybrać pry pošuku filmaŭ biełaruskuju movu ci prajści pa spasyłcy. A tut vy znojdziecie jutub-kanał «Kinakonha», na jakim kamanda prajekta vykładaje biełaruskamoŭnyja trejlery da stužak.
«Havarun»
Prajekt «Havarun» uźnik u 2016 hodzie jak chobi minčan Natalli i Paŭła Byčkovych. Pierakładali jak bolš darosły kantent (naprykład, karotkamietražki, filmy dy sieryjały), tak i pradukcyju dla dziaciej.
Sajt prajekta moža akazacca karysnym dla baćkoŭ, što žadajuć vychavać dzicia pa-biełarusku. Tut vam i biełaruskamoŭnyja multy ad amierykanskaha «Miki Maŭsa» da ispanskaha «Pakajo» i karejskaha «Rabakara Poli», i aŭdyjaknihi (znojdziecie Vasila Vitku i «Muchu-Cakatuchu»), pieśni, videaroliki i videakomiksy (u tym liku znakamity «Puchnaty patrul»).
Dapamahać resursu prapanujuć praz štomiesiačnuju padpisku ź sistemaj bonusaŭ. Mahčyma aformić uniosak pamieram ad 5 da 1000 rubloŭ, bonusy zbolšaha źviazanyja z roznaha kštałtu padziakami za dapamohu, ale prapanujuć i paŭdzielničać u ahučcy multfilma.
Sajt prajekta znachodzicca tut, dziciačy jutub-kanał šukajcie pa hetaj spasyłcy, darosły — pa hetaj.
«Łahodny cmok»
Hety amatarski prajekt źjaviŭsia ŭ krasaviku hetaha hoda. «Łahodny cmok» paŭstaŭ z byłoj inicyjatyvy «Kukumba», jakaja dva hady da taho pracavała nad ahučkaj kino, sieryjałaŭ i anime pa-biełarusku. U «Łahodny cmok» pierajšła častka staroj kamandy «Kukumby».
Pierakładčyk dublaža prajekta Alaksiej «Vožyk» raspaviadaŭ žurnalistam, što pieravažna abiraje dla pierakładu humarystyčny kantent. I sapraŭdy, siarod pierakładzienych «Łahodnym Cmokam» stužak jość humarystyčnyja multy nakštałt «Paŭdniovaha parka» i «Simpsanaŭ» i trochi kamiedyjnych tvoraŭ — naprykład, kryminalnyja «Vialiki Laboŭski» ci «Formuła 51».
Nie hladzicie takoje? Tady vy znojdziecie na sajcie prajekta fantastyčnyja «Vyžyvuć tolki zakachanyja» i «Zorny šlach». Jość tut i chity kinaprakatu: adznačym, naprykład, «Dziunu» i «Hulniu ŭ kalmara». Ale budźcie ŭvažlivyja, bo nie ŭsie sa stužak pradstaŭlenyja mienavita ź biełaruskaj ahučkaj, u niekatorych vypadkach u vašym rasparadžeńni buduć tolki subtytry na rodnaj movie.
Padabrać dla siabie kino ad «Łahodnaha cmoka» možna pa spasyłcy.
ANIBEL
Kancepcyja prajekta — pierakład na biełaruskuju movu anime i manhi, i budźcie ŭpeŭnienyja — na sajcie ANIBEL vy znojdziecie dastatkova takich stužak, kab vybrać niešta na viečar.
Ale, kali vy nie amatar japonskaj kultury, nie śpiašajciesia hartać dalej. ANIBEL taksama zajmajecca i adaptacyjaj dla biełaruskamoŭnaha hledača vialikich filmaŭ i sieryjałaŭ. Praŭda, u bolšaści vypadkaŭ jany pradstaŭlenyja na sajcie prajekta nie ź biełaruskaj ahučkaj, a z subtytrami, ale čym nie mahčymaść krychu ŭdaskanalić viedańnie anhlijskaj movy?
Z poŭnamietražnych karcin ad ANIBEL adznačym, kaniešnie, znakamity «Tytanik», a taksama «Zabojstva va «Ŭschodnim ekspresie» i fantastyčny bajevik «Ekvilibryum». Što da sieryjałaŭ, źviarnicie ŭvahu na daścipnyja «Dobryja pradvieści» i cikavy multsieryjał «Suśvietnaja zmova». Niečakany siurpryz — češskaja kazačnaja drama «Try areški dla Papiałuški» 1973 hoda vypusku.
Šukajcie ŭsiu hetuju pryhažość tut.
Belmovie
Hety prajekt u bolšaści skiravany na sieryjały, ale ŭ płanach stvaralnikaŭ jość i praca z poŭnym mietram. Taksama nastrojciesia na toje, što Belmovie prapanuje stužki ź biełaruskimi subtytrami, a nie z ahučkaj.
Pierakładzienyja sieryjały stvaralniki prajekta vykładajuć u svaim telehram-kanale. Ź cikavych varyjantaŭ adznačym brytanskija kamiedyi «Dziesiać pracentaŭ» i «Pad ščaślivaj zorkaj», a taksama amierykanski bajavik «Stary» z Džefam Brydžesam. Samyja staryja sa stužak vypuščanyja ŭ 2021 hodzie, a bolšaść i ŭvohule sioletnija, tak što ad trendaŭ u sieryjalnym śviecie vy nie adstaniecie.
«Naša Niva» — bastyjon biełaruščyny
PADTRYMAĆSiem padkastaŭ pa-biełarusku dla tych, chto choča słuchać svajo
Servis Slounik.org abnaviŭ dyzajn i zajmieŭ mabilnuju viersiju
słoŭniku - v ja d z m a k