«Niezadavalniajučaje pakryćcio». Čamu ŭ Minsku źnikli viadomyja hrafici?
Niadaŭna ŭ Minsku źniščyli murał «Imhniennaść» homielskaha mastaka Uładzia Chvastova (KHVST), jaki byŭ stvorany pad mostam na skryžavańni praśpiekta Niezaležnaści i vulicy Babrujskaj i praisnavaŭ tam z 2019 hoda. Da hetaha na staličnaj vulicy Čyhunačnaj byŭ zafarbavany murał aŭtarstva Mici Piślaka. Vypadkovaść ci zakanamiernaść?
Fota: t.me/motolkohelp
U rajonnych administracyjach spačatku nie mahli razabracca, u kaho na bałansie most, pad jakim jašče niadaŭno było hrafici.
U vyniku ŭ adździele haradskoj haspadarki Kastryčnickaha rajona, kudy my patelefanavali jak fizičnaja asoba, nam patłumačyli, što, raz hrafici «Imhniennaść» znachodzicca pad mastom, za toj učastak adkazvaje pradpryjemstva «Horaŭtamost». Tam u svaju čarhu raspaviali, što na abjekcie praviali ramont:
«Ramont źviazany ź niezadavalnialnym pakryćciom».
Nakont taho, ci źjavicca na tym miescy znoŭ niejki malunak ci zastaniecca hołaja ściana, pradstaŭnik pradpryjemstva adkazaŭ nastupnaje: «Heta ŭžo ŭsio budzie ŭzhadniacca ŭ administracyi Maskoŭskaha rajona. I nakolki nam viadoma, jany źviazvalisia z mastakom, kab jon adnaviŭ murał, ale toj admoviŭsia».
Paćvierdzić takuju inicyjatyvu ŭ administracyi Maskoŭskaha rajona nam nie ŭdałosia, ale sam mastak Uładź Chvastoŭ skazaŭ, što nijakich padobnych prapanoŭ jamu nie pastupała.
«Nie viedaju, kamu jany pisali, ale nijakich listoŭ i prapanoŭ ad administracyi mnie nie prychodziła. Ale płanaŭ pa abnaŭleńni ŭ mianie i niama. Heta zanadta pracavydatkoŭna va ŭmovach padobnaha staŭleńnia da prac, jakija byli zrobleny pa papiarednim uzhadnieńni».
Fota: supołka Vulica Brasil u fejsbuku
Da taho, što murał adnojčy sydzie ŭ niabyt, Uładź byŭ hatovy daŭno: «Takija momanty nie radujuć, ale, uličvajučy padobnyja situacyi raniej, śpiecyfiku našaha asiarodździa i nie vielmi dobry stan toj ściany ŭ samym pačatku pracy — ja padśviadoma byŭ hatoŭ da takoha», — prakamientavaŭ mastak «Našaj Nivie».
Jak i «Imhniennaść» Uładzia Chvastova, murał-naciurmort Mici Piślaka pa vulicy Čyhunačnaj byŭ stvorany ŭ ramkach festa Vulica Brasil — praŭda, jašče raniej, u 2017 hodzie. Ciapier na jaho miescy — šeraja ściana z čyrvona-zialonym ściaham u kucie. Haradskija ŭłady admovilisia kamientavać hety vypadak pa telefonie, prapanavaŭšy napisać aficyjny zvarot. Ale ličycca, što malunak nie padabaŭsia kamuści ź miascovych i na jaho skardzilisia.
Murał Mici Piślaka da likvidacyi. Fota: citydog.io
«Asobnym čynoŭnikam pieršapačatkova nie padabalisia ŭvohule ŭsie murały, zroblenyja ŭ miežach Vulica Brasil», — kažuć abaznanyja krynicy.
Pracy Chvastova i Piślaka — nie pieršyja ŭ śpisie mastactva vulic, jakoje Minsk zhubiŭ. Žychary vulicy Rabkoraŭskaj, 21 mohuć zhadać serca na domie, namalavanaje niekali arhiencinskim mastakom u miežach Urban Myths, a žychary Varanianskaha 13/1 — «Čałavieka biez tvaru» aŭtarstva hrečaskaha mastaka iNO. Na bietonnym moście kala stadyjona «Dynama» taksama niekali byŭ jarki murał. I heta tolki častka prykładaŭ, jakija ciapier zastalisia tolki na fotazdymkach.
Zafarboŭvańnie murała «Čałaviek biez tvaru». Malunak apynuŭsia ŭ dziasiatcy lepšych vuličnych hrafici śvietu za kastryčnik 2015 hoda, ale minskaj mastackaj kamisii ŭ vyniku nie spadabaŭsia. Fota: TUT.BY
Va ŭpraŭleńni kultury Minharvykama adznačyli, što ŭsie novyja murały ŭ lubym vypadku pa aficyjnych praviłach uzhadniajucca mastacka-ekśpiertnaj radaj pa manumientalnym i manumientalna-dekaratyŭnym mastactvie pry Minharvykankamie paśla etapu ŭchvaleńnia miascovaj administracyjaj i rajonnymi architektarami. Praŭda, kali hety praces zapuskajecca samimi ŭładami ci BRSM, to ruchajecca, vidavočna, praściej.
Tak, niadaŭna pad pryhladam ideołahaŭ u Minsku źjavilisia hrafici «Simvały majoj krainy» z vałoškami na fonie aficyjnaha čyrvona-zialonaha ściaha i «Ja pamiataju, ja hanarusia» ŭ pamiać ab pieramozie ŭ Vialikaj Ajčynnaj vajnie.
Fota: administracyja Maskoŭskaha rajona Minska
Čytajcie taksama:
«Nie viedaju, jak namalavać Mikałaja Statkieviča». Mastačka prydumała vyšyvać palitviaźniaŭ — i ciapier heta ž robiać sotni ludziej
Mastak Micia Piślak — pra źniščany murał, Minsk i žyćcio ŭ ZŠA: Amierykancy ličać, što biełarusy płaciać u termin, trymajucca dedłajnaŭ i nie pjuć
«Va ŭłońni aŭtazaka naradžajecca hramadzianin». 10 aŭtaraŭ biełaruskaha dyzajnu časoŭ supracivu
«Jany nie prajšli adbor». Arhanizatary vystavy «Art-Minsk» prakamientavali, čamu źniali karciny dziasiatkaŭ mastakoŭ
