U Kijevie zatrymali biełaruskuju pravaabaroncu Anisiju Kaźluk. Čym skončyłasia historyja?
Pravaabaroncu Anisiju Kaźluk zatrymali siońnia ŭ Kijevie za nielehalnaje znachodžańnie va Ukrainie. Pra heta Anisija napisała na svajoj staroncy ŭ Fejsbuku. Da vyrašeńnia spravy dałučyŭsia ofis Cichanoŭskaj. Ukrainskija čynoŭniki zapeŭnili pradstaŭnika ofisa ŭ tym, što Kaźluk nie departujuć.
«Ja siadžu ŭ Kijevie, u adździaleńni palicyi. Mianie zatrymali za nielehalnaje znachodžańnie va Ukrainie. Ciapier u mianie zabrali pašpart, kab ja «nie zhubiłasia». 23 lutaha ja atrymała piačatku ab praciahnieńni terminu lehalnaha znachodžańnia va Ukrainie. Z tych časoŭ i da červienia dakumienty nie prymali. Kožny z vas bačyŭ što biełarusaŭ ciapier imknucca vydvarać z Ukrainy, pahladzim čym skončycca moj kiejs», — napisała Anisija Kaźluk u siabie ŭ Fejsbuku.
Dziaŭčynie pahražali štraf ci navat departacyja z krainy.
Va Ukrainie Kaźluk aktyŭna zajmajecca vałanciorskaj dziejnaściu.
Chutka situacyju prakamientavaŭ daradca Śviatłany Cichanoŭskaj Franak Viačorka. Jon paviedamiŭ, što jany sočać za spravaj Anisii i ŭžo vyrašajuć pytańnie z uładami Ukrainy.
Paźniej Kabiniet pradstaŭnikoŭ Cichanoŭskaj paviedamiŭ, što vyjšaŭ na suviaź z Anisijaj, paśla čaho kiraŭnik pradstaŭnictva Ofisa ŭ Kijevie Valer Kavaleŭski źviazaŭsia z MUS Ukrainy i staršyniom kamiteta pa pravach čałavieka Viarchoŭnaj Rady. Jaho zapeŭnili, što departacyi Anisii nie budzie. Vyznačanyja dalejšyja kroki pa vyrašeńni incydentu.
21-hadovaja vałanciorka «Viasny» Anisija Kaźluk trapiła ŭ top-30 pierśpiektyŭnych maładych ludziej Jeŭropy. Chto heta?
