U Biełarusi lehalizujuć šery impart dla abychodu sankcyj. Raźbirajemsia, što heta značyć
Vice-premjer Mikałaj Snapkoŭ anansavaŭ lehalizacyju paralelnaha impartu ŭ Biełarusi. Što heta i ci nie rabili tak raniej?
Što takoje paralelny (šery) impart?
Pa sutnaści, heta nieaficyjny ŭvoz tavaraŭ niejkaha brenda ŭ treciuju krainu. Zvyčajna jon vykarystoŭvajecca, kali lehalny ŭvoz tavaru niemahčymy, naprykład, z-za sankcyj. Pry hetym sam brend nie niasie za heta adkaznaści — bo jon pradaje tavar inšamu pastaŭščyku ŭ inšaj krainie, absalutna lehalna. Usia adkaznaść kładziecca na tuju firmu, jakaja reekspartuje tavar i na dziaržavu, jakaja heta dazvalaje.
Heta nie toje samaje, što kantrabanda. Da prykładu, kali biełaruskija tytuniovyja zavody praz trecich asobaŭ uvoziać biezakcyznyja cyharety ŭ Rasiju ci ES — heta kantrabanda. Abo, skažam, kali ŭvozicca kantrafaktny tavar, to-bok, kopija ci padrobka aryhinała.
Ale kali firma syšła ź Biełarusi praz sankcyi, a tavar zaviezieny ŭ Biełaruś praź niejkija schiemy abychodu — heta ŭžo šery impart.
U Biełarusi šery impart ciapier farmalna niezakonny, na luby ŭvoz novych tavaraŭ dla prodažu ŭ vialikich maštabach patrabujecca dazvoł pravaaŭładalnika tavarnaha znaku. Za parušeńnie praduhledžanaja administracyjnaja adkaznaść pa č.2 art. 10.5 KoAP — ad 10 da 30 bazavych štrafu z kanfiskacyjaj tavaru abo bieź jaje.
Jak pracuje šery impart?
Zvyčajna ŭ treciaj krainie rehistrujucca firmy-adnadzionki, jakija farmalna lehalna nabyvajuć tavary ŭ aficyjnaha dylera. Paśla jany niejkim čynam dastaŭlajuć jaho ŭ krainu, kudy aficyjny impart tavaraŭ brendu zabaronieny — časta vielmi składanymi šlachami.
Kali vyśviatlajecca, što firma zajmajecca nielehalnym pieraprodažam tavaraŭ, to dyler pierastaje ź joj pracavać.
U Rasii ciapier dazvolili šery impart tavaraŭ usich brendaŭ, jakija syšli z krainy z-za vajny, a taksama tavaraŭ stratehičnych halinaŭ pramysłovaści — ad sielskaj haspadarki da atamnaj enierhietyki. Zhodna z zakonami Biełarusi, pryvozić ich siudy zaraz budzie nielehalna, jak i ŭ Kazachstan.
Jakija prablemy heta vykliča?
Pa-pieršaje, vyrastuć ceny. Tavar, uviezieny praz trecija krainy, zaŭždy budzie daražejšy, bo mocna pavialičvajecca łancuh pastavak. Ceny mohuć vyraści da 50%. Akramia inšaha, šmat techniki raniej źbirałasia ŭ Rasii — ciapier usie hetyja zavody začynienyja.
Pa-druhoje, nie buduć zrazumiełyja terminy i abjomy pastavak. Ciapier zachodnija brendy pilna sočać za tym, kab nie trapić pad vielmi žorstkija sankcyi, uviedzienyja suprać Biełarusi i Rasii. Takim čynam, budzie vielmi ciažka naładzić ustojlivyja kanały bujnych pastavak techniki. Ź ES taksama ničoha nie pryviazieš — bo miaža dla hruzaŭ faktyčna začynienaja.
Asabliva ciažka pryjdziecca bujnoj pramysłovaści, bo tam karystalisia vialikimi partyjami aficyjna ŭviezienych kampanientaŭ i detalaŭ.
Pa-treciaje, uźniknuć prablemy dla biznesu. Źmienšycca imaviernaść nabyć aryhinalny tavar. Da prykładu, niejkaja kampanija zamoviła ŭ zachodniaj firmy partyju techniki. Paśla akažacca, što technika nie aryhinalnaja — ale viarnuć jaje budzie niemahčyma, bo niama sensu skardzicca, kali ty parušaješ zakony inšaj krainy.
Taksama pastaŭščyki mohuć zavyšać ceny i ihnaravać patrabavańni bujnych pakupnikoŭ, bo jany buduć dyktavać praviły kupli-prodažu. Nie buduć abaronienyja i sami pastaŭščyki — bo ŭ luby momant partyju tavaru ŭ ich mohuć kanfiskavać, a heta ryzyka.
Ci zdoleje Biełaruś takim čynam efiektyŭna abychodzić sankcyi?
Heta mocna zaležyć ad taho, jak krainy, jakija ŭviali sankcyi, buduć reahavać. Bo adsačyć takija schiemy mahčyma, ale hetym treba metanakiravana zajmacca.
Da prykładu, surjoznyja brendy patrabujuć harantyjny list pra toje, što tavar nie budzie ŭviezieny ŭ Rasiju ci inšuju krainu pad sankcyjami. Niezrazumieła, ci buduć ryzykavać dylery, tolki kab zadavolić patreby našaha ci navat rasijskaha rynka.
Viadoma, što častka padsankcyjnych tavaraŭ trapić u Biełaruś. Ale jakaja častka — skazać składana.
Ci rabiła tak Biełaruś raniej?
Miarkujučy pa najaŭnaj infarmacyi, rabiła. Da prykładu, padčas zabarony tavaraŭ ź ES jany nie źnikli z palic, a niekatoryja navat nie padaraželi. Jany častkova reekspartavalisia z Rasii, ale heta farmalna było zabaroniena.
Akramia hetaha, jak i ŭ Rasii, šmat šeraha impartu faktyčna sankcyjanavali dziaržaŭnyja orhany. Naprykład, dla abaronnaj pramysłovaści. Bo Biełaruś navat u momanty, kali nie była pad sankcyjami, nie mahła całkam lehalna ŭvozić elektroniku i kampanienty, jakija siertyfikavałasia na Zachadzie jak prydatnyja dla vajennych abo kaśmičnych metaŭ.
Ale biełaruskija abaronnyja pradpryjemstvy vypuskali, da prykładu, spadarožniki abo vysokadakładnyja kompleksy radyjoelektronnaj baraćby.
Pakul Ministerstva antymanapolnaha rehulavańnia i handlu tolki abmierkavała ź biznesam pieralik tavaraŭ dla paralelnaha impartu. Što ŭ jaho ŭvojdzie, nie paviedamlałasia.
