Fota i videa z Bučy analizuje sudmiedekśpiertka. Voś što jana pabačyła na strašnych kadrach
Paśla źjaŭleńnia žachlivych zdymkaŭ z Bučy rasijskaja i łukašenkaŭskaja prapahanda pačała jenk: heta nie my! Rasijskija žurnalisty, błohiery, čynoŭniki vykručvajucca: chtości kaža, što trupy «śviežyja», a chtości dapuskaje, što heta ŭvohule nie trupy. «Naša Niva» paprasiła sudmiedekśpiertku praanalizavać kadry z Bučy.
Aściarožna, u tekście jość šakujučyja fota!
Buča paśla sychodu rasijskich sałdat — heta piekła. Prosta na vulicach lažać cieły zabitych ludziej, niekatoryja abharełyja, bo ich sprabavali spalić. Cieły ŭ brackich mahiłach, cieły ŭ kalektarach, cieły raskidanyja pa dvarach i darohach.
Śviedčańni z Bučy šakavali ŭvieś śviet, akramia Rasii. Tam prynialisia «analizavać» fota i videa zabitych ludziej, kab apraŭdać svaich vajskoŭcaŭ.
«Asablivuju zakłapočanaść vyklikaje toje, što ŭsie cieły ludziej, vyjavy jakich apublikavanyja kijeŭskim režymam, pa skančeńni minimum čatyroch dzion nie zdranćvieli, nie majuć charakternych trupnych plamaŭ, a ŭ ranach nie zapiakłasia kroŭ, — paviedamlaje Minabarony Rasii. — Usio heta nieabvieržna paćviardžaje, što fatahrafii i videakadry z Bučy — čarhovaja pastanoŭka kijeŭskaha režymu dla zachodnich ŚMI».
«U haračcy vajennaha času dokazami siabie nichto nie turbuje, źjaŭlajucca skinutyja ŭ studni cieły sa źviazanymi rukami. Tolki stan hetych ciełaŭ kaža pra toje, što jany byli zabityja samaje poźniaje — učora. Ja viedaju, jak vyhladajuć trupy, jakija pralažali na vulicy niekalki dzion. Tut zusim inšaja karcina», — piša vajenkar «Komsomolskoj pravdy» Alaksandr Koc.
Na rasijskim partale Topwar uvohule padazrajuć, što ludzi na fota — žyvyja:
«Usie trupy na kadrach z Bučy całkam vidavočna byli zabityja adzin-dva dni tamu ci navat u dzień zdymak. Pra heta śviedčać śviežyja siniaki, adsutnaść trupnaha zdranćvieńnia i razłažeńnia. Kali heta naohuł trupy, a nie zapeckanyja vałanciory, što pasłuchmiana vykonvajuć roli lalek na darozie i ŭ padvałach.
Śpiecyjalistam ukrainskaj prapahandy varta pahladzieć kadry +18 z Maryupala i Danbasa, dzie štabielami lažać cieły ŭkrnacystaŭ. Kantent nie dla słabaniervnych, ale jon dazvalaje zrazumieć, što adbyvajecca z pareštkami za tydzień i bolš. Koler trupaŭ užo nie adroźnić ad miascovaha šeraha łandšaftu. A Buča była pad kantrolem rasijskich vojskaŭ bolš za miesiac. Tamu za realistyčnaść pastanoŭki ćviordaja dvojka».
I heta tolki niekatoryja z mnohich «analitykaŭ». Vialikaja kolkaść rasijskich čarnasociencaŭ raptam akazałasia ekśpiertami pa trupnych plamach i inšych bijałahičnych pracesach.
Ale što skaža sapraŭdny śpiecyjalist?
Fota i videa z Bučy praanalizavała sudova-miedycynskaja ekśpiertka Nadzieja Hurmančuk.
«Na prahledžanych mnoj fotazdymkach i videazapisach z horada Buča bačnyja trupy ludziej roznaha połu, uzrostu, niekatoryja zakapanyja ŭ hrunt z farmiravańniem mahił (brackich mahił), niekatoryja raskidanyja ŭzdoŭž daroh. Vyznačyć pryčyny śmierci pa fotazdymkach i videazapisach niemahčyma, ale ŭsio ž možna adkazać na niekatoryja pytańni.
Na toje, što heta trupy, moža pakazvać najaŭnaść trupnych źmienaŭ. U zaležnaści ad daŭnaści (času) nastupleńnia śmierci trupnyja źmieny mohuć być dvuch vidaŭ: rannija i paźniejšyja, — tłumačyć Hurmančuk. —
Rannija trupnyja źmieny — heta trupnyja plamy (učastki paśmiarotnaha pramočvańnia kryvioju tkanin na nižejlehłych učastkach cieła); najaŭnaść trupnaha zdranćvieńnia (uščylnieńnie i fiksacyja častak cieła trupa, jakoje raźvivajecca praz 2—4 hadziny ad momantu nastupleńnia śmierci i prachodzić u siarednim na 2-3 sutki paśla śmierci; astudžeńnie trupa; trupnaje vysychańnie (vypareńnie vadkaści na adkrytych učastkach cieła, jakoje pryvodzić da ŭščylnieńnia i paciamnieńnia hetych učastkaŭ cieła).
Poźnija trupnyja źmieny — heta hnijeńnie, mumifikacyja, tłuščavosk, tarfianoje dubleńnie, škiletavańnie i inšaje. Hnijeńnie raźvivajecca ŭ vyniku ŭździejańnia na arhanizm mikraarhanizmaŭ z razbureńniem tkanin, utvareńniem šyrokaha śpiektru chimičnych rečyvaŭ, što i vyznačaje charakterny vyhlad, koler trupa i inšyja prykmiety. Prykmietami hnijeńnia źjaŭlajucca: utvareńnie hniłasnaj vianoznaj sietki, afarboŭvańnie skury ŭ brudna-zialony koler, raźvićcio hniłasnaj emfizemy, utvareńnie hniłasnych burbałak i inš. Pieršyja prykmiety hnijeńnia možna nazirać u siarednim praz 3—4 sutak ad momantu nastupleńnia śmierci i pry spryjalnych umovach jano moža zaviaršacca da 3—4 tydniaŭ. Mumifikacyja trupa raźvivajecca ŭ vyniku vypareńnia vilhaci ŭ suchoj miascovaści, jakaja dobra pravietryvajecca. Pry hetym trup pamianšajecca ŭ abjomie, uščylniajecca i ciamnieje. Pry spryjalnych umovach mumifikacyja moža raźvicca praz 4—6 miesiacaŭ».
Usie pracesy trupnych źmianieńniaŭ zaležać ad mnostva faktaraŭ — navakolnaha asiarodździa, pryčyn śmierci, stanu čałavieka pierad śmierciu i hetak dalej.
«Kali pryčynaj śmierci źjaŭlajecca traŭma, jakaja supravadžajecca vialikaj strataj kryvi, to trupnyja plamy mohuć być słaba zaŭvažnymi ci navat adsutničać. Havoračy ab navakolnym asiarodździ: nizkaja tempieratura zapavolvaje pracesy raźvićcia trupnych źmianieńniaŭ, u svaju čarhu, vysokaja tempieratura da peŭnaha momantu paskaraje hetyja pracesy, — kaža ekśpiertka. —
Tut varta adznačyć, što ŭ Bučy ŭ sakaviku 2022 hoda tempieratura navakolnaha asiarodździa ŭ siarednim vahałasia ad 0 da 5 hradusaŭ Celsija, što ŭ značnaj stupieni zamarudziła raźvićcio trupnych źmianieńniaŭ ciełaŭ, jakija zachoŭvajucca ŭ naturalnych umovach.
Havoračy pra cieły ludziej u Bučy. Na toje, što heta trupy, u pieršuju čarhu pakazvaje bledna-šeraje adcieńnie skuranych pakrovaŭ niekatorych ź ich. Na mnohich možna prasačyć najaŭnaść i trupnych plam na učastkach cieła, raźmieščanych bližej da pavierchni sudatyknieńnia. Na niekatorych trupach takija ŭčastki nie prasočvajucca, ale, jak i havaryłasia vyšej, takoje budzie naziracca, kali pryčynaj śmierci źjaŭlajecca traŭma, jakaja supravadžajecca vialikaj strataj kryvi. Na mnohich trupach možna vyznačyć učastki padsychańnia, raźmieščanyja na adkrytych častkach cieła (na kiściach ruk, u vobłaści vusnaŭ, nosa)».
Na fota vyšej na niekatorych ciełach bačnyja słaba vyjaŭlenyja, blednyja trupnyja plamy, źviartaje ŭvahu Nadzieja Hurmančuk.
Na fota vyšej — učastki padsychańnia na kiściach, źviartaje ŭvahu ekśpiertka.
Taksama majucca trupy z pačatkovymi prykmietami mumifikacyi:
«Skurnyja pakrovy i miakkija tkaniny ŭščylnienyja, z karyčnieva-šerym adcieńniem, vočy zapałyja ź vidavočnymi prykmietami padsychańnia vočnych jabłykaŭ, končyk nosa i vusny padsochłyja — usio heta pačatkovyja prykmiety mumifikacyi», — kaža Hurmančuk.
Jana tłumačyć:
«U miescach paškodžańniaŭ trupaŭ majucca ślady ciomna-čyrvonaj kryvi na skurnych pakrovach, učastki pramočvańnia kryvioju na vopratcy. Takija ŭčastki na niekatorych trupach padsochłyja, na niekatorych — u vyhladzie vadkavatych nakładańniaŭ. Charaktar hetych nakładańniaŭ budzie zaležać ad umoŭ znachodžańnia (zachoŭvańnia) trupa. U vilhotnym asiarodździ, kroŭ i ŭčastki paškodžańniaŭ mohuć tak i nie nabyć padsochły vyhlad. U zvyčajnych umovach, viadoma, kroŭ padsychaje i nabyvaje vyhlad suchich ciomna-čyrvonych nałažeńniaŭ. Varta adznačyć, što zapiakańnie kryvi — heta pryžyćciovy praces pracy sistemy hiemastazu dla prypynieńnia kryvacioku i pačatku hajeńnia paškodžańniaŭ. Takim čynam, hety praces z charakternymi dla jaho prykmietami adsutničaje ŭ paškodžańniach trupaŭ z Bučy, što taksama pakazvaje — heta nie žyvyja asoby».
Pra fota z brackaj mahiły z tryma ciełami Hurmančuk adznačaje: trup žančyny maje paškodžańni ŭ vobłaści tvaru, nałažeńni kryvi na skury, učastki pramočvańnia kryvioju adzieńnia i prylehłaha hruntu.
Na hetym zdymku bačnyja trupy sa źviazanymi rukami za śpinaj i ŭčastkami pramočvańnia prylehłaha hruntu ciomnaj kryvioju.
«Voś hetyja fota taksama pakazalnyja — heta trupy z padvała dziciačaha łahiera. U mužčyny na tvary cialesnyja paškodžańni i trupnyja plamy (siniušna-ružovaja afarboŭka skury ŭ vobłaści tvaru), — źviartaje ŭvahu Nadzieja Hurmančuk. — Kab dakładna vyznačyć daŭnaść nastupleńnia śmierci, treba kompleksna aceńvać usie najaŭnyja trupnyja źjavy: plamy, zdranćvieńnie, tempieraturu cieła i tempieraturu navakolnaha asiarodździa, trupnaje vysychańnie i inšyja.
Trupnyja plamy źjaŭlajucca adrazu paśla nastupleńnia bijałahičnaj śmierci, pieražyvajuć šerah stadyj raźvićcia i źnikajuć (a dakładniej, nie vyznačajucca, ich niemahčyma dyfierencyravać) z raźvićciom paźniejšych trupnych źmien.
Paźniejšyja źmieny pačynajuć raźvivacca aryjencirovačna nie raniej za 4—7 dzion z momantu nastupleńnia śmierci, heta pry zvyčajnych umovach: pakajovaja tempieratura kala 20 hradusaŭ Celsija. Pry bolš nizkaj tempieratury navakolnaha asiarodździa raźvićcio trupnych źmianieńniaŭ zapavolvajecca.
Nahadaju, u Bučy ŭ sakaviku tempieratura navakolnaha asiarodździa 0—5 pa hradusaŭ Celsija: heta jak u chaładzilnaj kamiery, mienavita tamu trupy mohuć i nie mieć paźniejšych hniłasnych źmienaŭ.
Pry hetym adsutnaść trupnaha zdranćvieńnia ŭ takich cieł i kaža pra toje, što daŭnaść nastupleńnia ich śmierci bolš, čym troje sutak (bo mienavita praz troje sutak pry zvyčajnych umovach jano i zakančvajecca, a kali ŭličyć bolš nizkuju tempieraturu zachoŭvańnia, to možna vykazać zdahadku, što daŭnaść ich śmierci bolšaja za tydzień).
Plus dastatkova vyražanyja ŭčastki padsychańnia śviedčać ab tym, što heta niaśviežyja trupy, z daŭnaściu nie 1—3 dni, a bližej da tydnia i bolš».
Patłumačyła ekśpiertka i pra mahčymaści analizu trupnaha zdranćvieńnia pa fota i videa.
«Pry prahladzie videa, u niekatorych cieł možna zaŭvažyć adsutnaść trupnaha zdranćvieńnia. Heta moža śviedčyć ab tym, što prajšoŭ dastatkovy pramiežak času dla jaho zakančeńnia z momantu nastupleńnia śmierci. Heta značyć, što daŭnaść nastupleńnia śmierci da momantu praviadzieńnia videazdymki bolš za 2—3 sutak. Albo heta moža śviedčyć pra toje, što heta adubieńnie mahło być razburanaje paśla ŭźniknieńnia miechaničnym šlacham, naprykład pry pieramiaščeńni trupa sa źmianieńniem suadnosin častak jaho cieła ŭ termin da 2—3 sutak», — kaža sudmiedekśpiertka.
Vyznačyć najaŭnaść albo adsutnaść trupnaha zdranćvieńnia vyklučna pa fatahrafijach uvohule niemahčyma», — padkreślivaje Nadzieja Hurmančuk.
«Padvodziačy vynik, dakładna ŭstalavać daŭnaść i pryčyny nastupleńnia śmierci ludziej pa najaŭnych fatahrafijach i videazapisach niemahčyma, ale ich vyhlad nie supiarečyć tamu, što śmierć mahła nastupić padčas akupacyi rasijskimi vojskami horada Buča. Dakładna adkazać na hetyja pytańni zmohuć sudova-miedycynskija ekśpierty Ukrainy paśla poŭnaha daśledavańnia zahinułych», — padsumoŭvaje ekśpiertka, razburajučy arhumienty rasijskaj prapahandy.
