«Paśla 15 sutak jon vielmi mocna źmianiŭsia». Što viadoma pra eks-śledčaha, jakomu ciapier pahražaje 12 hadoŭ kałonii
Mikitu Staraženku, byłoha starejšaha lejtenanta justycyi, zatrymali ŭ Minsku 1 lutaha. Staraženka pracavaŭ u Śledčym kamitecie, ale ŭletku 2020 hoda zvolniŭsia. Ciapier pa jaho pryjšli: apublikavali pakajalnaje videa, HUBAZiK piša, što były śledčy moža sieści na 12 hadoŭ. Sabrali ŭsio, što viadoma na dadzieny momant pra Mikitu Staraženku i jaho spravu.
Mikita Staraženka, fota ź jaho staronki UKantakcie
Pra zatrymańnie Staraženki stała viadoma 2 lutaha. Spačatku źjaviłasia infarmacyja, što byłoha śledčaha abvinavačvajuć pa častcy 3 artykuła 130 KK «Raspalvańnie varožaści», pakarańnie ad 5 da 12 hadoŭ.
Ale ŭ toj ža dzień HUBAZiK vykłaŭ pakajalnaje videa, u jakim na tvary Staraženki bačnyja ślady, padobnyja da śladoŭ źbićcia.
Skrynšot ź videa, jakoje vykłaŭ HUBAZiK
U roliku były śledčy pryznajecca, što pieradaŭ kantakty dvuch supracoŭnikaŭ HUBAZiK i namieśnika načalnika SK pa Minsku adnamu z pratesnych telehram-kanałaŭ. Taksama HUBAZiK paviedamiŭ, što Staraženku vinavaciać u machlarstvie za supracoŭnictva z fondami salidarnaści i zboram hrošaj na pahašeńnie doŭhu za navučańnie ŭ Akademii MUS.
Što viadoma na siońniašni dzień?
Mikita Staraženka ŭradženiec Vietki, što na Homielščynie. Naradziŭsia ŭ 1993 hodzie, paśla škoły advučyŭsia ŭ Akademii MUS.
Jašče padčas vučoby, u 2016 hodzie, jon ažaniŭsia, paśla staŭ baćkam. Z 2017 hoda Staraženka pracavaŭ u Śledčym kamitecie: śledčym u Partyzanskim rajadździele staličnaha SK.
Tut i dalej fota ź instahrama Mikity Staraženki
Jak kažuć blizkija znajomyja Mikity, čałaviekam jon byŭ davoli zakrytym, navat skrytnym. Ale viadoma, što jašče da vybaraŭ 2020 hoda ŭ Staraženki ŭźnikali kanflikty na pracy.
«Za pieryjad svajoj słužby ŭ 3 hady pa im pravodziŭsia šerah słužbovych pravierak, paśla čaho jamu pakazali na dźviery. Byŭ zvolnieny ŭ červieni 2020 hoda z abaviazacielstvam kampiensacyi vydatkaŭ na jaho navučańnie i vypłat stypiendyi», — piša kanał HUBAZ pra Staraženku.
Znajomyja paćviardžajuć, što pravierki ŭ dačynieńni da Staraženki sapraŭdy pravodzilisia, ale padrabiaznaści jon nie raskazvaŭ.
«Ale viadoma, što jon mocna svaryŭsia sa svaim šefam, až da taho, što moh pasłać tam kahości na pracy», — kažuć znajomyja Mikity.
Što da zvalnieńnia, to tut znachodziacca supiarečnaści tamu, što śćviardžaje HUBAZiK. Bo sam Mikita kazaŭ, što sprabavaŭ zvolnicca jašče da vybaraŭ, ale nie atrymałasia.
Jon navat vykładvaŭ u svaim instahramie fota dakumienta za podpisam Siarhieja Pasko, načalnika USK pa Minsku (toj Pasko, jaki pierabłytaŭ «Biełsat» i «BiełaPAN», a taksama zajaŭlaŭ, što SK choča, kab demanstranty, za jakich fondy apłacili štrafy, zapłacili pa-novamu).
Dyk voś, u papiery Pasko paviedamlaje Staraženku, što rapart apošniaha ab zvalnieńni, napisany 22 lipienia 2020, razhledžany. Praviedzienaja pravierka, jakaja nie znajšła pryčyn, kab razarvać kantrakt ź im.
Nastupnuju zajavu na zvalnieńnie Staraženka napisaŭ užo paśla vybaraŭ — 17 žniŭnia.
«Jon skazaŭ, što jaho ŭsio dastała, usio zakałupała, što jon bačyć niespraviadlivaść. Ź siamjoj nie raiŭsia — prosta paviedamiŭ svaim, što zvalniajecca i na nastupny dzień nie pajšoŭ na pracu», — kaža blizki znajomy Staraženki.
20 žniŭnia 2020 hoda Mikitu narešcie zvolnili. Jaho abaviazali spłacić bolš za 14 tysiač rubloŭ: kampiensavać vydatki za navučańnie ŭ Akademii MUS. Pryčym unieści hrošy treba było ciaham dvuch miesiacaŭ.
Ale Staraženka zmoh raźličycca.
«Na spłatu pajšli adkładzienyja hrošy siamji, moža čymści dapamahli baćki, — kažuć jaho znajomyja. — Viadoma, što častku hrošaj dała jaho žonka — kala 8 tysiač rubloŭ. Jana nie była vielmi zadavolenaja tym, što adbyvałasia, prasiła Mikitu nie źviartacca ni ŭ jakija fondy, siadzieć cicha. Ci sapraŭdy jon prasiŭ dapamohi ŭ fondaŭ nieviadoma, Mikita byŭ vielmi zakryty».
Pacichu ŭ Mikity pačynalisia prablemy ŭ siamji, źviazanyja navat nie z hrašyma, a sa stasunkami z žonkaj. Niekatoryja znajomyja kažuć, što mužčyna byŭ padobny nie tolki na vielmi zakrytaha, ale i «vielmi dziŭnaha čałavieka».
«U krasaviku 2021 hoda Staraženka adsiadzieŭ 15 sutak «za niepadparadkavańnie». Paśla hetaha jon mocna źmianiŭsia, staŭ jašče bolš zamkniony i ciažki charaktaram. Što stała pryčynaj hetaha nieviadoma, pra toje, što adbyvałasia padčas adsidki jon nie raskazvaŭ», — kažuć znajomyja.
U vyniku žonka syšła ad jaho, paźniej jany raźvialisia. Ź lipienia 2021 hoda jany kančatkova raźjechalisia i pierastali padtrymlivać jakija-niebudź stasunki, kantaktavali tolki na temu vychavańnia dački.
U mai 2021 hoda Staraženku, jak i inšych byłych siłavikoŭ, nastrojenych suprać ułady, admysłovym ukazam pazbavili vajskovych zvańniaŭ. U tym ža śpisie byli pazbaŭlenyja zvańniaŭ eks-śledčy Jaŭhien Juškievič, były padpałkoŭnik HUBAZiK Alaksandr Azaraŭ i inšyja.
Apošnim časam Mikita Staraženka pracavaŭ jurystam. Pra jaho zatrymańnie siamja daviedałasia ad kaleh, kali na pracy Staraženki praviali pieratrus.
Paśla rodnym patelefanavaŭ advakat, jaki paviedamiŭ, što nie moža raskazać padrabiaznaści, bo daŭ padpisku ab nierazhałošvańni.
Ale, pa słovach znajomych Staraženki, taho sapraŭdy vinavaciać pa častcy 3 artykuła 130 KK «raspalvańnie varožaści, zdiejśnienaje hrupaj asob albo jakoje paciahnuła pa nieaściarožnaści śmierć čałavieka albo inšyja ciažkija nastupstvy». Pakarańnie — kałonija na termin ad piaci da dvanaccaci hadoŭ.
Čytajcie taksama: Da 19 hadoŭ kałonii asudzili padpałkoŭnika vajennaj raźviedki. Jon moža być datyčny da hučnych źlivaŭ
