«Usie spravy razhladała narmalna, a tut łykam upierłasia». Novy šakujučy źliŭ — jak milicyja kamanduje sudździami
Novy źliŭ abjadnańnia chakieraŭ pra toje, jak pracuje sudovaja sistema. Kanviejer niespraviadlivych prysudaŭ bieź jakich-niebudź dokazaŭ i padstaŭ. Pryznačanyja śviedki ŭ pahonach, jakija nie bačyli i nie mahli bačyć čałavieka, jakoha jany adpraŭlajuć na 15 sutak albo na štraf — časam vielizarnyja hrošy dla siamiejnaha biudžetu. Sudździ, vydatna ŭsio razumiejučy, vynosiać tyja prysudy, jakija im skažuć. A adna spraviadlivaja admova zavodzić spravu padymaje na vušy ŭsiu «pravaachoŭnuju» sistemu.
Milicyja na pratestach u Maładziečna, 9 žniŭnia. Skryn ź videa
Na pieršym aŭdyjo hučyć hołas, jaki kibierpartyzany identyfikujuć jak hołas Vitala Kazłova, pieršaha namieśnika načalnika UUS Minharvykankama (u «Našaj Nivy» niama mahčymaści pravieryć heta). Hołas druhoha surazmoŭcy pakul nie apaznany.
Hołas, padobny da Kazłova telefanuje nieviadomamu milicyjantu.
— Što pa Maładziečnie?
— Dakładvaju pa Maładziečnie. Razhladaje pratakoł… Strach, 1958 hoda naradžeńnia (čałaviek, u dačynieńni da jakoha składzieny pratakoł, — Red.).
Sudździa spyniła administracyjnuju spravu.
Hrupa dakumientavańnia — učastkovy inśpiektar milicyi i druhi udnoviec (mahčyma, inśpiektar pa spravach niepaŭnahadovych, — Red.) — afarmlała dakumienty na hetaha hramadzianina.
Sudździa paličyła, što raz hetyja dva supracoŭniki nie byli na płoščy, nie byli ŭ momant zatrymańnia, nie bačyli fakt niepadparadkavańnia. A sam hramadzianin admaŭlaje, i kaža, što tam nie byŭ, byŭ zusim u inšym miescy, pryniała rašeńnie ab spynieńni.
Na nastupny dzień hetuju administracyjnuju spravu zapatrabavaŭ Minski abłasny sud na vyvučeńnie.
«A ŭ nas APP bačyć, jakija pratakoły ŭ nas jašče nie razhledžanyja z 9 čysła? — kaža hołas, padobny da hołasa Kazłova. — Jość tablica? My adsočvajem hetyja pratakoły? Nu kali načalniki milicyi nie razumiejuć i nie ŭsmoktvajuć, adpravili nach*j u sud i zabylisia bł*ć. Čamu my bł*ć nie bačym? Karaciej bł*ć, padymajcie tablicu, što ŭ nas nie razhledžana i na jakim my śviecie.
Kožny pratakoł trymajcie na kantroli».
Druhaja razmova, pavodle kibierpartyzanaŭ, adbyvajecca pamiž tym ža Vitalom Kazłovym i Vadzimam Pryharaj, načalnikam Maładziečanskaha RAUS.
Hołas padobny da hołasa Pryhary, razmaŭlaje z hołasam, padobnym da hołasa Kazłova, šukaje načalnika UUS Minharvykankama dla dakładu, jak možna zrazumieć, mienavita pa hetaj administracyjnaj spravie, adzinaj, što nijak nie ŭzbudžajecca.
Hołas, padobny da hołasa Kazłova aburany tym, što tak mahło atrymacca.
«Ja prosta nie viedaju, jak ty moh paśla sielektara siońniašniaha nie prakantralavać razhlad…» — kaža jon.
«Dyk voś hetaja Jožyk (nieviadoma, ci sapraŭdnaje heta proźvišča sudździ, — zaŭv. «NN»), jana čakaje ŭkazu, heta pa majoj sakretnaj infarmacyi, — havoryć hołas, padobny da hołasa Pryhary. — Nu naohuł jana zvalniajecca. I ŭ jaje takija dovady… Siońnia ranicaj sa staršynioj razmaŭlali…. nu z vykonvajučaj abaviazki staršyni.
250 pratakołaŭ takich ža razhledzieli, a jana ŭpierłasia ŭ hety pratakoł…
«Dobra, čamu tady, kali viedajecie, što palityčnaja sprava, bł*ć, joj adpisvajuć… Niachaj jana zvalniajecca», — kaža pieršy hołas.
«Nu jana ž usie astatnija spravy razhladała narmalna, a tut łykam upierłasia i vyniesła takoje rašeńnie, nie paraiłasia ni z kim. Ja z prakuroram razmaŭlaŭ. Prakuror zaŭtra vyvučyć spravu, kali što vyniesuć pratest.
Nu tut sapraŭdy zrazumieła, što dva supracoŭniki, jakija nibyta śviedki… adzin supracoŭnik jon tut znachodziŭsia ŭ nas… składaŭ…» — kaža hołas, padobny da Pryhary.
«Dy nich*ia heta nie zrazumieła, bł*ć!» — praciahvaje hołas, padobny da hołasa Kazłova.
«Ale ŭsie ž pratakoły takija razhledžanyja, pravilna?» — havoryć hołas, padobny da Pryhary.
«Nu ŭsio zrazumieła, što jany razhledžanyja inšymi sudździami. Ci joj taksama?» — pytajecca pieršy hołas.
«Nu jana taksama razhladała, bł*ć», — zaklučaje druhi hołas.
Pavodle kibierpartyzanaŭ, zapis razmovy byŭ zrobleny 3-ha vieraśnia 2020 hoda. Jak vynikaje sa źlivu, da taho dnia ŭ adnym tolki sudzie nievialikaha Maładziečna było 250 administracyjnych prysudaŭ pa palityčnych spravach.
Nahadajem, što MUS dahetul nie prakamientavaŭ źlivy, jakija apubličvali abjadnańnie chakieraŭ i byłych siłavikoŭ. Jak tolki źjavicca kamientar, my jaho apublikujem.
«Vielmi ambicyjny, choča trapić u hienierały». Chto taki Vital Kazłoŭ, hołas jakoha časta traplaje na źlivy chakieraŭ
Syšoŭ u adstaŭku sudździa, jaki admoviŭsia sudzić palitviaźnia pa spuščanym źvierchu artykule. Padrabiaznaści
«Jany idejnyja». Čarhovy źliŭ: milicejski načalnik zahadvaje znajści kampramat na žycharoŭ Novaj Baravoj
