Ksiondz Barok daŭ intervju Miełkazioravu: «Nielha paraŭnovać Łukašenku z Satanoj»
U prajekcie «Žyćcio-malina» vyjšła hutarka Mikity Miełkaziorava ź Viačasłavam Barkom — adnym z samych viadomych katalickich śviataroŭ. Sabrali hałoŭnyja momanty hetaha vostraha intervju.
«Zielcera katalickaje bahasłoŭje apraŭdvaje»
«Kali čałaviek skaža praŭdu — jon akažacca na Akreścina. Bo za što siadziać ludzi? Tolki za toje, što jany zachacieli praŭdy, spraviadlivaści, — skazaŭ Viačasłaŭ Barok. — I Chrystos siońnia taksama b akazaŭsia na Akreścina, bo dla praŭdy ŭ biełaruskim hramadstvie siońnia miesca niama».
«Jezus viedaŭ, što jaho pryšeście ŭ śviet spravakuje kravapralićcie. Jon razumieŭ, što žyćcio na ziamli nie maje sensu, kali nie maje svabody», — pracytavaŭ Barka viadučy i ŭdakładniŭ, ci nie namiok heta na siłavoje rašeńnie biełaruskaha pytańnia.
Barok adkazaŭ tak: «Svaboda — kaštoŭnaść bolšaja za žyćcio. Jana vartaja taho, kab žyćcio za jaje addać».
Jon padkreśliŭ: nie zaŭsiody mahčyma vyrašać prablemy mirna, i kaścioł aficyjna praduhledžvaje ŭzbrojeny supraciŭ, kali niama inšaha vychadu.
«Ja b nie chacieŭ brać zbroju ŭ ruki, i nie budu tym pieršym čałaviekam, jaki heta zrobić. Ale nielha nazyvać złačyncam taho, chto ŭziaŭ zbroju, baroniačy svajo žyćcio. Zhadajem Zielcera — katalickaje bahasłoŭje jaho apraŭdvaje. Jon mieŭ na heta prava», — kaža ksiondz.
«Nielha paraŭnoŭvać Łukašenku z Satanoj»
Krach dziaržavy ŭ Biełarusi ŭžo adbyŭsia, na dumku Barka, bo 90% biełarusaŭ nie adčuvajuć biaśpieki.
Ale być biełarusam siońnia vielmi kruta — bo my zaraz vyrašajem los nacyi na stahodździ napierad. «I my razumiejem, što siła ŭ praŭdzie, u našaj kultury, u našaj samabytnaści», — adznačyŭ śviatar.
U Biełarusi kali nie bolšaść, to vielmi šmat «pravasłaŭnych ateistaŭ», biazbožnikaŭ, «bo Pravasłaŭnaja carkva vykarystoŭvajecca jak palityčny instrumient dla prasoŭvańnia intaresaŭ režymu», — skazaŭ Barok. Jon zaŭvažyŭ:
«Biełaruski režym — antyludski, ale hetaje zło prymityŭnaje. Tamu nielha paraŭnoŭvać Łukašenku z Satanoj — bo Satana chitry i intelihientny, jon viedaje, što robić».
«Ja adčuvaŭ sabačy podych»
U śniežni 2020 hoda Barok atrymaŭ 10 sutak za publikacyju malunka dyzajniera Ceślera, dzie miełasia čyrvona-zialonaja svastyka. Sudzili jaho ŭ Rasonach.
«Mianie sudzili pakazalna, — zhadvaje Barok. — Kali my pryjšli ŭ sud, zała była ŭžo zapoŭnienaja: ja tam ubačyŭ rabotnikaŭ vykankama, RAUS. Ja ździviŭsia, što tak šmat hledačoŭ, i ŭ pieršuju čarhu padziakavaŭ im, što jany pryjšli mianie padtrymać. A biskupa, jaki pryjechaŭ na sud, u zału tak i nie puścili».
Taksama ksiondz raskazaŭ, jak ź im abychodzilisia ŭ viciebskim SIZA:
«Heta było niepaŭtorna. Padychodziać achoŭniki, cudoŭnyja chłopcy, i pačynajecca. Pačali harkać, kryčać na mianie, pastavili da ściany.
Chodziać vakoł mianie z aŭtamatami, pastavili na raściažku, sabak nackoŭvajuć. Ja adčuvaŭ až sabačy podych. Sabaki brešuć, a achoŭniki kryčać hramčej, čym tyja sabaki. Tak što śpiektakl byŭ dobry.
Potym mianie raspranuli, dahladali, padčas čaho źnievažali, ale heta byŭ cisk maralny, fizičnaj škody nie było.
U majoj kamiery byŭ čałaviek, jaki pałovu žyćcia pravioŭ pa zonach — 27 hadoŭ. U jaho vačach było adekvatnaści bolš, čym u achoŭnikaŭ. Jon viedaŭ, što zakon musić być, jon pryznavaŭ, što vinavaty, što zrabiŭ złačynstva, za što musiŭ adsiedzieć. Jon žyvie pa zakonie. A tyja, chto jaho pilnujuć, žyvuć nie pa zakonie, a pa paniaćciach».
«Pradstaŭnikam carkvy niama čaho rabić na UNS»
Čamu, kali Boh jość, u Biełarusi adbyŭsia žnivień 2020 hoda, spytaŭ Miełkazioraŭ.
«Kryzisnaja situacyja — heta błasłavieńnie ad Hospada, kali kožny moh pakazać, chto my nasamreč: ci sapraŭdnyja ludzi, ci bydła, źviary. I niekatoryja nie prajšli hetaha ispytu»,
— adkazaŭ Barok.
Pra ŭdzieł katalickaha pradstaŭnika va Usiebiełaruskim narodnym schodzie Barok skazaŭ, što šmat katalikoŭ kazali, što nie treba tudy iści, pytalisia, navošta heta było.
«Ale ŭ adkaz — maŭčańnie, u adkaz — cišynia. Heta niapravilna. U kaściole musić być jasnaść — kali pastyr niešta robić, vierniki musiać razumieć, navošta jon toje robić.
Na maju dumku, pradstaŭnikam Carkvy niama čaho tam rabić. Tam, dzie źbirajucca ludzi, jakim nie da zakonaŭ — viernikam niama čaho rabić», — padzialiŭsia mierkavańniem ksiondz.
Taksama jon padkreśliŭ: carkva musić pierachodzić na matčynu movu. Kali jana nie robić toje, to hrašyć pierad Hospadam.
Čamu sami biełarusy nie havorać siońnia na biełaruskaj? Jany nie zmohuć patłumačyć, u ich niama adkazu na hetaje pytańnie, ŭpeŭnieny Viačasłaŭ Barok.
«Ja vučyŭsia u ruskamoŭnaj škole, ale pierajšoŭ na biełaruskuju kłasie ŭ 8 ci 9. Pačaŭ dziońnik zapaŭniać na biełaruskaj. Kłasny kiraŭnik pytaŭsia: «Čamu tak? Čamu ty adziny vyrašyŭ, što heta takoje?» A što, ja nie maju prava? Ja biełarus», — zhadaŭ Barok.
«Katolik nie moža być kamunistam»
Barok paviedamiŭ, što ličyć fašyzm i kamunizm amal adnym i tym ža.
«Tak ličyć aficyjnaje vučeńnie Kaściołu katalickaha. Bo heta jahadki z adnaho pola, tatalitarnyja režymy.
A kožny tatalitarny režym kiepski, niama siarod ich lepšaha ci horšaha.
Papy Rymskija vydavali dakumienty, dzie kazali, što katolik nie moža być kamunistam. Adzinaje, u što moža transfarmavacca kamunizm — heta ŭ teraryzm», — kaža ksiondz.
Jon adznačyŭ, što treba, kab kamunistyčny režym byŭ asudžany, kab źnikli pomniki Leninu, Kalininu, Dziaržynskamu ź biełaruskich vulic.
«Tak, heta častka historyi. Ale ŭjavicie sabie: vas zhvałcili i paśla partret hvałtaŭnika paviesili ŭ vašaj chacie na ścianie. Maŭlaŭ, heta ž častka vašaj historyi, — tłumačyć Barok. — U mianie niama nianaviści da savieckich dziejačaŭ, ale ja chaču, kab hetyja pomniki źnikli i sučasnyja biełarusy pierastali im pakłaniacca. Kab my adnaznačna skazali: toje, što jany prapanavali, toje było zło».
Viačasłaŭ Barok raskazaŭ, što nie źbiraŭsia źjazdžać ź Biełarusi. Ale im pačali cikavicca z prakuratury Viciebska, Rasonaŭ i Haradka. Kali źjaviłasia pastanova ab kanfiskacyi jaho kampjutara i telefona, ksiondz vyrašyŭ usio ž pakinuć krainu.
«Ja nie moh dazvolić, kab u mianie zabrali techniku, bo ź jaje dapamohaj prapaviedavaŭ Božaje słova na Jutubie, u Instahramie, u Fejsbuku. Kab techniku zabrali, mianie b pazbavili hołasa. Ja na heta nie pajšoŭ», — rastłumačyŭ jon.
Ale Barok kaža, što absalutnaja idylija dla jaho — viarnucca ŭ svaje Rasony, u svoj chram, na svajo miesca.
«Ja chaču, kab Biełaruś viarnułasia da žyćcia pa zakonach, kab ułada była padzielenaja na zakanadaŭčuju, vykanaŭčuju i sudovuju. Chaču, kab ludzi nie byli vymušanyja ŭciakać z krainy, a tyja, chto ŭciok, mahli viarnucca. A ja budu malicca i dziakavać Bohu, što heta adbyłosia, — skazaŭ jon.
Čytajcie taksama:
«Łukašenka tak chacieŭ utrymacca va ŭładzie, što achviaravaŭ svaim narodam». Koratka pierakazvajem film Dudzia pra biełarusaŭ, ad jakoha mnoha chto płača
Cichanoŭskaja acaniła paraŭnańni svajho muža z Łukašenkam i prakamientavała vypady Sańnikava
