«Prablemy pačalisia z troch hadzin nočy». Što jašče viadoma pra zboj u pracy čyhunki?
Siońnia na siervierach Biełaruskaj čyhunki adbyŭsia zboj. Tak, naprykład, niemahčyma nabyć kvitki anłajn. Ale prablema nie tolki z braniravańniem u internecie.
U stačkamie čyhunki «Našaj Nivie» kažuć, što prablemy pačalisia z troch hadzin nočy.
Nie pracuje nie tolki anłajn-siervis pakupki kvitkoŭ, ale i mnohija ŭnutranyja sistemy. Pa ich infarmacyi, minski vuzieł kirujecca ciapier u ručnym režymie.
Pasažyry paviedamlajuć taksama, što nie mohuć udakładnić raskład.
«Nie pracuje mabilny dadatak i tabło na niekatorych stancyjach», — zaŭvažyŭ adzin z pasažyraŭ.
My telefanavali ŭ pres-słužbu čyhunki, kab udakładnić situacyju i pryčyny zboju, ale nichto nie źniaŭ trubku.
Raniej abjadnańnie chakieraŭ uziało na siabie adkaznaść za zboj u pracy Biełčyhunki. Jany śćviardžajuć, što zašyfravali asnoŭnuju častku siervieraŭ, baz danych Biełaruskaj čyhunki «z metaj zapavolić i parušyć pracu darohi».
Jany dadajuć, što aŭtamatyka i sistemy biaśpieki nie byli zakranutyja, kab nie stvarać na čyhuncy avaryjnych situacyj. Kab viarnuć pracu ŭ štatny režym, abjadnańnie vystaviła ŭmovy: vyzvaleńnie 50 palitviaźniaŭ, jakim patrebnaja ekstranaja mieddapamoha, i spynieńnie prasoŭvańnia rasijskich vajskoŭcaŭ pa terytoryi Biełarusi.
Čytajcie taksama: Abjadnańnie chakieraŭ ŭziało na siabie adkaznaść za zboj u pracy Biełčyhunki. Jany vysunuli svaje patrabavańni
