«Słužbovym asobam pryjdziecca adkazvać i pierad zakonam, i pierad ludźmi» — doktar Mikita Sałaviej pra admienu masačnaha režymu
Viadomy infiekcyjanist Mikita Sałaviej u svaim fejsbuku prakamientavaŭ admienu Minzdaroŭjem abaviazkovaha masačnaha režymu ŭ miescach masavaha zboru ludziej.
«Patłumaču čałaviečaj movaj. Padčas pandemii COVID-19, jašče, chutčej za ŭsio, navat nie na piku zachvorvańnia, kali palikliniki i stacyjanary ŭstanoŭ achovy zdaroŭja ŭsich rehijonaŭ krainy zachłynajucca ad pacyjentaŭ z COVID-19, niedachopu kisłarodu, lekavych srodkaŭ, kali prypyniena akazańnie dapamohi pacyjentam praktyčna z usioj płanavaj patałohijaj, kali mnohich pacyjentaŭ navat z vostrymi zachvorvańniami daktary vymušanyja adpraŭlać lačycca dadomu, bo fizična niama kudy špitalizavać, nie padviarhajučy ryzycy infikavacca jašče i kavidam, admianiajecca abaviazkovy masačny režym u miescach masavaha zboru ludziej.
Mianie nie ździŭlaje pazicyja čynoŭnikaŭ MZ RB. Tam daŭno ŭsio zrazumieła.
Asnoŭnaja meta hetaha «ministerstva» ŭžo daŭno — vysłužycca pierad vyšejšymi čynoŭnikami, i dakładna nie kłopat ab ludziach, usio paśladoŭnyja dziejańni ad falsifikacyj statystyki pa zachvorvańni i śmiarotnaści ad kavidu da dziŭna «taktyčnych» rašeńniaŭ pra heta jaskrava śviedčać.
Słužbovym asobam u niedalokaj budučyni za heta jašče daviadziecca adkazać pierad zakonam i biełaruskim narodam. Precedent Brazilii vam u dapamohu [Sienat krainy abvinavaciŭ prezidenta Bałsanaru ŭ parušeńni sanitarnych zachadaŭ i falsifikacyi dakumientaŭ — «Naša Niva»].
Mianie ździŭlaje pazicyja vielmi mnohich maich kalehaŭ.
Niaŭžo ŭ sanitarna-epidemijałahičnaj słužbie, infiekcyjnaj słužbie, aniestezijałohii i reanimatałohii, inšych halinach siarod štatnych i pazaštatnych śpiecyjalistaŭ nie zastałosia sapraŭdnych daktaroŭ, dla jakich zdaroŭje i dabrabyt ułasnaha naroda značna važniejšyja za imhnienny dabrabyt kupki čynoŭnikaŭ?
Kolki jašče treba sotniaŭ śmierciaŭ pacyjentaŭ u dzień, kab vy dastali svaje jazyki z adnaho miesca i narešcie pačali rabić usio mahčymaje dla spynieńnia varjactva, jakoje robicca z kavidam?
U tym liku ŭpłyvajučy na klučavyja rašeńni pa praduchileńni dalejšaha raspaŭsiudžvańnia pandemii. Napeŭna, heta rytaryčnaje pytańnie. Ale, moža, choć niechta jašče zmoža zadumacca…
Darahija pacyjenty! Miedyki nie panikujuć. Jany z apošnich sił, akazvajučy dapamohu na domie, u paliklinikach i stacyjanarach, robiać usio mahčymaje, kab vy vyjšli z katastrofy z COVID-19 ź minimalnymi stratami.
Na žal, nie ŭsio zaležyć ad nas samich.
Ja jašče raz zaklikaju jak maha chutčej vakcynavacca ŭsich, chto hetaha jašče nie zrabiŭ, vykarystoŭvać maski choć by ŭ transparcie i miescach masavaha zboru ludziej, admianić nieabaviazkovyja pachody ŭ kramy, handlovyja centry, na zabaŭlalnyja mierapryjemstvy, kłapacicca nie tolki pra siabie, ale pra ludziej pobač z vami, jakija čaściakom mohuć być bolš uraźlivyja za vas. Tolki razam my zmožam spravicca!» — napisaŭ jon.
