Znajści
Ałharytmičny łacinski varyjant
09.10.2021 / 09:37RusŁacBieł

«Nichto z mužčyn nie razumieje dvuchsensoŭnaści». Jak vyjści zamuž za ajcišnika i nie raźvieścisia

Pra biełaruskuju maru «zamuž za ajcišnika», pieražyvańni mužčyn pry rasstavańni i toje, čamu prahramisty razvodziacca sa svaimi žonkami. Zadali niajomkija pytańni pra adnosiny psichołahu ŭ IT Cimafieju Bimbadu.

«Častaje pytańnie paśla razryvu: jak chadzić na spatkańni?»

Cimafiej Bimbad: Tak užo vyjšła, što da mianie prychodziać u asnoŭnym mužčyny, źviazanyja ź IT, dla taho kab pieražyvać rasstavańnie — jakoje voś-voś zdarycca ci ŭžo zdaryłasia. Heta asnoŭnyja zapyty, ź jakimi ja pracuju apošnija šeść hod.

«Naša Niva»: Dziŭna čuć, što mužčyny pieražyvajuć rasstavańnie. Zvyčajna zdajecca, što žančyna pakutuje, a mužčyna ź siabrami adznačaje status «svabodny».

CB: Ja b skazaŭ, što ŭsio naadvarot pracuje. Bo žančyny jakraz našmat efiektyŭniej pieražyvajuć rasstavańnie ź siabroŭkami, atrymlivajuć bolš padtrymki ad ich. A mužčyny źbirajucca ŭ barach ź siabrami, na viečarynkach. Hetyja siabry paśla i adpraŭlajuć ich da mianie, bo razumiejuć, što ničym nie mohuć dapamahčy.

Cimafiej Bimbad

«NN»: Čamu mužčynam byvaje tak ciažka pieražyć razryŭ?

CB: Paśla razryvu źjaŭlajucca absalutna supraćlehłyja pačućci da partniora. Z adnaho boku ludzi vielmi sumujuć, a ź inšaha — nienavidziać za toje, što čałaviek źnik ź ich žyćcia. Adčuvajuć niejkuju vinu ci soram za toje, što zrabili ci nie zrabili. Bližej da kanca pieražyvańniaŭ źjaŭlajecca šmat udziačnaści, bo dobryja momanty taksama byli.

Taksama mužčyny adčuvajuć stres ad adaptacyi ŭ novym statusie — časta paśla razryvu adnosin čakaje jašče i pierajezd, nanoŭ treba naładžvać byt, inakš pradstaŭlacca ŭ supolnaści. Častaje pytańnie: jak chadzić na spatkańni? Ludzi zabyvajucca, jak heta robicca, asabliva paśla niekalkich hod adnosin.

Adzinym pastajannym dla mužčyn zastajecca ich praca. I ŭ 70% vypadkaŭ (heta vybarka tych ajcišnikaŭ, ź jakimi ja ŭzajemadziejničaju) jany pačynajuć bolš pracavać. U ofisie jość ludzi, i možna nie zastavacca ŭ adzinocie. Druhi momant — chłopcy pačynajuć hulać u hulni. Heta sposab paźbiahańnia svaich pieražyvańniaŭ. Z-za hulniaŭ mužčyny časta kładucca pozna spać, źbivajuć svoj hrafik. Kali niedasypańnie ciahniecca miesiac, hetaha dastatkova, kab pačać adčuvać pieršyja simptomy depresii.

«NN»: Da vas źviartalisia ŭ depresii paśla rasstavańnia?

CB: Tak. U takoj situacyi ja paśla pieršaj sustrečy adpraŭlaju da psichijatra dla dyjahnostyki depresii. Pa praŭdzie kažučy, jašče ni razu nie było, kab ja pamyliŭsia. Kali heta depresija ŭ pačatkovaj formie, to dastatkova majoj kansultacyi i parad mianiać styl žyćcia, pryčym terminova, bo paśla budzie paharšeńnie. A kali čałaviek doŭha ŭ takim stanie žyŭ, to patrebna miedykamientoznaja padtrymka, bo bieź jaje vielmi pavolna idzie prahres našaj pracy.

Kaniečnie, usie bajacca psichijatraŭ i antydepresantaŭ. I časta ŭ mianie sychodzić paru miesiacaŭ, kab pakazać, što heta narmalna, heta dapamoža siabie lepš adčuvać.

«NN»: Vy raspracoŭvali mabilny dadatak — hulniu-sieryjał, jaki dapamahaje spravicca z razryvam adnosin. Nakolki chłopcam zachodzić taki farmat?

CB: Ščyra, nie viedaju. Heta vialiki ekśpierymient. Ja patłumaču, čamu vyrašyŭ hetym zajmacca ŭ takim vyhladzie. Ja znajšoŭ amierykanskaje daśledavańnie na temu biblijaterapii. Tam pravodzili prostyja ekśpierymienty: ludziam z posttraŭmatyčnym stresavym rasstrojstvam u vyniku apieracyi davali čytać niejkuju knihu pra pakuty, sum. «Džejn Ejr», naprykład, davali ludziam, jakija daviedvalisia, što ŭ ich rak, i jany znachodzilisia ŭ špitali.

Ad čytańnia ich uzrovień stresu padaŭ na 40% adnosna tych, chto nie čytaŭ. I daśledčyki ličyli, što efiekt źviazany z tym, što kniha adpaviednaja. Adbyvajecca adlustravańnie pieražyvańniaŭ čytača, i jamu tady našmat praściej pahłybicca ŭ svaje emocyi i niejak ich pierapracavać.

My, sychodziačy z hetaha, vybrali farmat.

Skrynšoty mabilnaha dadatku EX ME

Knih pra rasstavańnie šmat, ale jany ŭsie žanočyja. A ja na svajoj praktycy baču, što mužčynam taksama drenna. Kali ja raskazvaŭ, što za dadatak my źbirajemsia rabić, mužčyny kazali: «A, heta jak hulnia «Romance Club», ja bačyŭ, ale mnie nie spadabałasia». Nie spadabałasia, bo čytać pra «ŭ łožku ź nieznajomcam» im nie vielmi cikava. Tamu ŭ mianie jość hipoteza, što mužčynam, jakija rasstalisia, historyja rasstavańnia chłopca, jaki heta pa-roznamu pieražyvaje, budzie zachodzić.

«Maładyja ajcišniki, jakija pabudavali paśpiachovuju karjeru, nie mohuć znachodzicca bolš sa svaimi pałovami»

«NN»: Biełaruskaja mara — zamuž za ajcišnika. Dziaŭčatam, jakija marać pra heta, da čaho treba być hatovymi?

CB: Składanaje pytańnie: ajcišniki vielmi roznyja. Ja sutykaŭsia sa stereatypami pra ajcišnikaŭ, napeŭna, niejkija ź ich majuć miesca, ale ŭ bolšaj častkaj ja nie zhodny. Naprykład, u psichaterapieŭtyčnaj supolnaści doŭhi čas ličyłasia, što ajcišniki — vielmi zamknionyja ludzi, jakija nie lubiać kamunikavać ni z kim, siadziać u svaich kampjutarach. Mnie zdajecca, heta było źviazana z tym, što tolki takija dachodzili da psichaterapieŭtaŭ. Ale ŭ ofisie ja takich sustrakaŭ mała. 

Jak praviła, zamknionymi byvajuć bek-end raspracoŭščyki, jakija pracujuć z abstraktnymi paniaćciami, z kodami. Taki skład charaktaru sapraŭdy spryjaje tamu, kab doŭha apieryravać abstraktnymi rečami.

Usie astatnija ŭ IT — vielmi navat havarkija chłopcy, asabliva tyja, kamu davodzicca šmat pracavać z zakazčykami. Dyzajniery, front-end raspracoŭščyki, prodžekt-mieniedžary, biznes-analityki. Jany dakładna nie traplajuć u hetu hrupu. Chacia niejkaja zamknionaść nieabchodna jak navyk, kab doŭha hladzieć u ekran i zastavacca zasiarodžanym.

Ja viedaju, što niekatoryja žonki doŭhi čas nie razumieli, što robiać ich mužy za kampjutarami. Asabliva padčas pandemii, kali chłopcy pracavali z doma. Niekalki čałaviek raskazvali, što žonkam zdavałasia, što jany prosta ŭ kampjutar hulajucca, a jany pracujuć i stamlajucca bolš, čym na vytvorčaści, dzie byli raniej. Pisać kod — heta intelektualna składanaja zadača. 

Tamu spadarožnicy ajcišnika treba być hatovaj, što ŭviečary čałaviek stomleny i ŭ stresie, choć farmalna siadzieŭ na miescy i hladzieŭ u ekran.

Druhaja prablema — kali maładyja ajcišniki, 25-27 hod, jakija paśpieli žanicca i pabudavać paśpiachovuju karjeru, nie mohuć znachodzicca bolš u adnosinach sa svaimi pałovami. Bo za čas pracy ŭ ich źjavilisia jeŭrapiejskija kaštoŭnaści, a žonki, nijak z hetaj śfieraj nie źviazanyja, zastalisia tam ža, dzie pačynali.

Naprykład, žonka — umoŭnaja miedsiastra, biez ambicyj, a ŭ muža za piać hod u IT pastajanna novyja kursy, rost zarobku ŭ 4-5 razoŭ. U jaho bolš niama mary prosta pabudavać kvateru: bo jaki ŭ hetym sens, kali tańniej zdymać? Navošta kuplać mašynu, kali niama dziaciej i jana nie patrebna štodzień, i možna karystacca karšerynham? Kaštoŭnaści milenijałaŭ, jakija iduć u razrez z kłasičnymi, pryniatymi ŭ hramadstvie.

«NN»: A što žančynie rabić u takim vypadku?

CB: U mianie jość adkaz, ale nie ŭpeŭnieny, što jon karektny. Z taho što ja baču — pobač zastajucca dziaŭčyny, jakija taksama ŭ niečym raźvivalisia. Takoj prablemy ŭ adnosinach niama ŭ ambicyjnaj doktarki. U situacyi, kali žančyna chodzić na kursy anhielskaj, lubić padarožničać ci malavać, udzielničaje ŭ hramadskich inicyjatyvach, usio ŭ paradku. Ale heta majo bačańnie.

«Mužčyny ź IT ekanomiać, bo tak pryvykli»

«NN»: Pra muža-ajcišnika marać, bo jon dobra zarablaje. Jakoje staŭleńnie da hrošaj u tych, chto pracuje ŭ hetaj śfiery, nakolki jany hatovy kuplać futry svajoj žančynie?

CB: Roznaje staŭleńnie — ad sknaraŭ da tranžyr, jakija ŭ daŭhach. Ale čaściej ja sutykajusia z kiejsam, kali davodzicca padšturchoŭvać ludziej inakš rasparadžacca hrašyma. Paśla rasstavańnia ŭ ich adbyvajecca pieraacenka kaštoŭnaściaŭ: jany razumiejuć, što šmat zarablajuć, ale hetyja hrošy nie prynosiać im, asabliva budučy adzinokimi, zadavalnieńnia, bo jany ich nie traciać. U mužčyn, jak praviła, jość dobry kampjutar, zvyčajny telefon, nie apošniaj madeli, i siaredniaha kłasu mašyna. 

Jany ekanomiać, bo tak pryvykli. Kali pačynali sustrakacca sa svajoj pałovaj, jany vučylisia na apošnim kursie, było nie tak šmat hrošaj, i jany praciahvajuć vieści toj ža žyćciovy styl.

A kali hrošaj stanovicca bolš, čym možna patracić, ludzi pierastajuć pracavać. Dla śfiery heta drenna, bo pryvodzić da dehradacyi prafiesii, hublajucca navyki, technałohii.

Zaŭvažyŭ, što mužčynam u pryncypie časta składaniej kupić niešta sabie, čym žoncy. 

«NN»: Jość stereatyp, što ŭ ajcišnikaŭ nie nadta raźvita intuicyja i jany nie ŭmiejuć sčytvać žanočyja emocyi, dvuchsensoŭnaść. Nakolki heta praŭda?

CB: Absalutnaja praŭda, ja taksama, kali ščyra, nie ŭmieju. Ja nie ŭmieju flirtavać u čatach, bo baču tekst, jaki patencyjna moža nieści nie adzin-dva sensy, a 10 adrazu. I tady ničoha nie zastajecca, jak razumieć jaho litaralna, bo zanadta vialikaja varyjabielnaść. Dy nasamreč nichto z mužčyn nie razumieje dvuchsensoŭnaść. Heta stvaraje niapravilnuju kamunikacyju i razburaje lubyja adnosiny.

U zamknionych dziaŭčat časta nie składajucca adnosiny, bo jany nie prajaŭlajuć svaich pačućciaŭ, a partnior nie moža ničoha sčytać. Usie dobra sčytvajuć emocyi, jakija pieradajucca praź mimiku, žesty, pozy. A kali na tvary ničoha nie vyjaŭlajecca, mienš šancaŭ pabudavać adnosiny.

U ajcišcy jość pracent ludziej (jakich ja ŭmoŭna nazvaŭ bek-end raspracoŭščykami) z emacyjnym intelektam nižejšym, čym u astatnich. Im składana vykazvać svaje pačućci i razumieć čužyja.

«Papularny typ adnosin — ludzi sustrakajucca dva-try miesiacy, a paśla nastupny partnior»

«NN»: Ajcišnikam prypisvajuć viernaść. Supadaje z realnaściu?

CB: Ź viernaściu ŭ ich absalutna hetak ža, jak i ŭ inšych mužčyn. Chacia ja b adznačyŭ adnu tendencyju. Jość try papularnyja typy adnosin: kłasičnyja z adnym partnioram; palihamnaść, kali jość kachanki; i sieryjnaja manahamnaść. Apošniaje — heta kali ludzi sustrakajucca, ale tolki miesiacy dva-try. U ich zakančvajecca cukieračna-bukietny pieryjad, a paśla nastupny partnior.

Ilustracyjnaje fota

Heta trend ahulnasuśvietny, i ŭ ajcišcy jaho šmat stanovicca. Na moj hust, heta taja ž palihamnaść, tolki kali maralnyja pryncypy nie dazvalajuć być ź niekalkimi partniorami, tamu treba być z adnym, ale niadoŭha, kab paśla pieraklučycca na inšaha.

Dumaju, taki typ adnosin charakterny dla ludziej dastatkova ambicyjnych, jakija paźbiahajuć pryviazannaściaŭ. Jany zvyčajna mocna abapirajucca na svaich siabroŭ — jak viečnyja padletki, u jakich jość svaja kampanija, kab viesialicca.

Moža, heta źviazana z kulturaj, što my ŭsio bolš adryvajemsia ad miesca žycharstva, bo možna pracavać dystancyjna, ad pastajannaha doma, bo praściej źmianić zdymnuju kvateru ź pierachodam na novuju pracu.

Jość daśledavańnie, što ciapier siaredni šlub ciahniecca 10 hod, tamu raźličvać, što ty z čałaviekam praviadzieš usio žyćcio, nie davodzicca.

«NN»: Čamu prahramisty i teściroŭščyki zvyčajna razvodziacca?

CB: Praz roznyja kaštoŭnaści. Toj kiejs, kali pačali sustrakacca studentami, adzin čałaviek całkam źmianiŭsia, a druhi zastaŭsia takim ža, i jany nie mohuć znachodzicca razam, bo ŭ ich roznyja intaresy. Jany pačynajuć tady razdražniać adno adnaho. Mnie zdajecca, heta ahulny trend. Ludzi ciapier mianiajuć niekalki prafiesij za žyćcio, chutčej źmianiajucca sami, čym raniej, kali ŭsio žyćcio pracavali na adnym zavodzie.

«NN»: Jość łajfchaki, jak zakachać u siabie ajcišnika?

CB: U mianie niama adkazu — usie roznyja ludzi.

«NN»: Dzie čaściej možna sustreć supracoŭnikaŭ IT, kali nie ŭ ofisie?

CB: U cindary (uśmichajecca). Davoli zabaŭna bačyć ludziej, jakija surjoznyja siadziać na naradach u karparacyi i pad stałom hartajuć cindar. Ciapier, ja dumaju, hetaha jašče bolš, kali ŭsie pracujuć z domu.

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
Панылы сорам
Ха-ха
Ого
Сумна
Абуральна
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera