Čamu prahramist zdymaŭ videa, a siłaviki pryjšli biez broniekamizelek? Važnyja pytańni paśla stralaniny na Jakuboŭskaha
Pierastrełka na Jakuboŭskaha ŭ Minsku — ekstraardynarny vypadak. Nie pryhadvajecca, kab za apošnija 10 hadoŭ zabivali supracoŭnikaŭ KDB. Pry hetym paśla prahladu kavałkaŭ videa, što apublikavali praŭładnyja telehram-kanały, zastajecca šmat pytańniaŭ. Mahčyma, adkazy na ich źjavilisia b paśla prahladu poŭnaha, nie zmantavanaha, videazapisu. Adnak jaho na hety momant niama. Aŭtar «Našaj Nivy» Arciom Harbacevič vyvučyŭ apublikavanyja materyjały.
Ci vyhladaje situacyja praŭdziva?
Videa nie vyhladaje pastanovačna, ale my nie da kanca razumiejem, jak dakładna razhortvalisia padziei, bo hramadstvu pakazali ŭžo zmantavany kavałak. Stralanina adbyvałasia ŭdzień, apublikavali videa ŭviečary, na mantaž zastavałasia prynamsi 6 hadzin.
Jak minimum, vyrazali momant zabojstva prahramista — my nie viedajem, jak jon pamior.
Ci naležała kamiera ŭ kvatery Zielceru? Vyhladaje, što tak, inačaj by siłaviki viedali pra najaŭnaść zbroi i dziejničali inačaj, ale pra heta dalej.
Čamu, ułasna, prahramist uziaŭsia za zbroju?
Adkazu na hetaje pytańnie niama — nam nie pakazali arhumientacyju siamji, jakaja mahła być ahučanaja na videa z kvatery, što zapisvała žonka ci sam Andrej Zielcer.
Jak minimum, Zielcer zaniaŭ niavyhadnuju pazicyju dla taho, kab adstrelvacca: jon ničym nie byŭ prykryty.
Nieviadoma, ci płanavaŭ jon uvohule zabivać, ci tolki vykarystać arhumient strelby ŭ rukach dla viadzieńnia razmovy ź ludźmi ŭ maskach.
Čym stralaŭ minčanin, nieviadoma: jon moh zaradzić ružžo kulaj, karciečču, drobju. Ź videa niezrazumieła, što heta było, ale stralaŭ jon dupletam — dvajnym strełam. U roliku bačny momant strełu, addača zbroi, parachavyja hazy.
Adnak biez poŭnaha videa niezrazumieła, kolki ŭ realnaści vystrałaŭ zrabiŭ Zielcer.
U momant strełaŭ u padjeździe jašče čutny huk uklučanaj bałharki — jana mahła zahłušyć huk ad streła, hetym možna patłumačyć śmiełaść siłavika z kamieraj, jaki łamanuŭsia zdymać u kvateru.
Chto stralaŭ pieršy?
Ci možna pa apublikavanym mantažy videa vyznačyć, chto stralaŭ pieršy? Heta zrabić składana, pakul nie aznajomicca z poŭnymi videa. Pakazańni žonki i śviedak daduć bolš jasnaści.
Ci moža być takoje, što siłavik byŭ zabity ahniom svaich ža, a nie ŭ vyniku strełu Zielcera? Adkaz na hetaje pytańnie taksama dać nielha biez prahladu videa zdareńnia całkam z usich rakursaŭ.
Čamu sam Andrej i žonka zdymali padziei na videa?
My hetaha dakładna nie viedajem, možna zrabić zdahadku, što siamja vyrašyła strymić (abo prosta zdymać) videa ŭvarvańnia siłavikoŭ. Toje nieadnarazova rabili inšyja biełarusy, da jakich prychodzili ź pieratrusam.
Čamu siłaviki biez broniekamizelek iduć u kvateru z «imavierna datyčnym da teraryzmu»?
Vyhladaje, što traktoŭka «adpracoŭki adrasoŭ asob, imavierna datyčnych da teraryzmu», źjaviłasia post-faktum. Tłumačyć, čamu stolki ludziej uryvajucca ŭ kvateru niejak treba, ale vidavočna siłaviki nie viedali, što ŭ haspadaroŭ jość zbroja.
Praktyka zatrymańniaŭ uzbrojenych asob absalutna inšaja: da takich ludziej zvyčajna SACHR na śvitanku «zachodzić» praz vokny.
Toje, što ŭ kvateru łamilisia ludzi biez abmundziravańnia, havoryć pra zvyčajny rucinny vobšuk, jaki ŭžo staŭ dziŭnaj «normaj» u Biełarusi.
A taksama pra toje, što siłavyja struktury nie mieli apieratyŭnaj infarmacyi pra zbroju, a značyć — nie «viali» hetaha čałavieka.
Choć fakt najaŭnaści ŭ Zielcera zbroi možna było zrazumieć jak minimum praz analiz jahonych sacyjalnych sietak: jon publikavaŭ fota ružža.
Ich abo nie praviarali, abo, jak varyjant, ličyli, što ružžo znachodzicca pa miescy rehistracyi mužčyny ŭ Pieršamajskim rajonie.
Prynamsi, adzin z tych, chto stralaŭ, — nieviadomy siłavik u šeraj bajcy — dastaŭ zbroju, tolki kali pačuŭ streły. I pačaŭ stralać, kali jaho kaleha byŭ na linii ahniu. Ab prafiesijanaliźmie takich dziejańniaŭ u realnaj vostraj situacyi možna spračacca.
Samaje hałoŭnaje pytańnie
U suchim astatku my majem samaje hałoŭnaje pytańnie: što ŭ hetaj situacyi było takoha, kab jana kaštavała adrazu dvuch žyćciaŭ? I chto nasamreč vinavaty ŭ tym, što jana adbyłasia?
Situacyja vyhladaje vynikam raskručvańnia śpirali hvałtu, represij, biespakaranaści i radykalizacyjaj hramadstva: ad ruki ŭvierch Tarajkoŭskaha — «adčapisia ad mianie» Bandarenki — asadkaj sabie ŭ horła Łatypava — da ružža Zielcera.
Čytajcie taksama:
«Samy lubimy čałaviek, nie vieru, što jon teraryst». Što kažuć rodzičy zabitaha Andreja Zielcera?
