ŚMI: Latalnym aparatam, što parušyŭ miažu Biełarusi, moh być bieśpiłotnik kantrabandystaŭ
U Polščy raspaviali, što latalnym aparatam, jaki ŭvarvaŭsia 12 krasavika ŭ biełaruskuju pavietranuju prastoru, moh stać bieśpiłotnik kantrabandystaŭ. Takuju vysnovu zrabiła vydańnie wyborcza.pl, piša Tut.by.
Ilustracyjnaje fota
20 krasavika stała viadoma, što tryma dniami raniej, 17 krasavika, patrul pamiežnaha pasta ŭ Kuźnicy-Biełastockaj zaŭvažyŭ bieśpiłotnik, jaki lacieŭ z boku Biełarusi, z prymacavanym pakietam — jon zalacieŭ u hłybiniu polskaj terytoryi prykładna na 400 mietraŭ. Vyśvietliłasia, što dron pierapraŭlaŭ kantrabandnyja cyharety na sumu kala 84 tysiač złotych (kala 21 tysiačy dalaraŭ). Atrymalnika kantrabandy zatrymali.
Nahadajem, 13 krasavika biełaruskaje Ministerstva abarony zajaviła, što niejkaje pavietranaje sudna parušyła dziaržaŭnuju miažu Biełarusi ŭ pavietranaj prastory z boku Respubliki Polšča.
U suviazi ź incydentam u abaronnaje viedamstva Biełarusi byŭ vyklikany ataše pa pytańniach abarony pry polskaj ambasadzie. Jamu zajavili pra toje, što nieabchodna pravieści raźbiralnictva pa fakcie incydentu i prainfarmavać ab vynikach biełaruski bok.
Uviečary taho ž dnia padčas pasiadžeńnia parłamienckaha kamiteta pa nacyjanalnaj abaronie namieśnik kiraŭnika abaronnaha viedamstva Polščy Vojcech Skurkievič zajaviŭ: «U nas niama takoj infarmacyi, i jaje varta razhladać jak fejkavuju navinu — choć my bačym u apošnija dni, miakka kažučy, aktyŭnaść bieśpiłotnikaŭ, jakija sprabujuć pierasiekčy miažu».
Vydańnie wyborcza.pl paviedamlaje, što kantrabandysty ŭžo daŭno vykarystoŭvajuć drony dla pierakidańnia tavaru praź miažu. Vierahodna, mienavita taki bieśpiłotnik moh być tym pavietranym abjektam, jaki parušyŭ miažu Biełarusi 12 krasavika.
