Jeŭrapiejskaja kinaakademija i dziasiatki kinafiestyvalaŭ z usiaho śvietu patrabujuć vyzvaleńnia Taćciany Hacura-Javorskaj
Jeŭrapiejskaja kinaakademija, Bierlinale, «Sandens» i IDFA, kinafiestyvali ŭ Raterdamie, Karłavych Varach i Lejpcyhu, mižnarodnyja kinaasacyjacyi i arhanizacyi dałučylisia da zaklika vyzvalić Taćcianu Hacura-Javorskuju. Pad adkrytym listom užo padpisałasia kala sta šaścidziesiaci pradstaŭnikoj mižnarodnaj kinasupolnaści, u tym liku jaje lidaraŭ. Pravaabaronca, kulturnaja aktyvistka i dyrektarka fiestyvalu WATCH DOCS Belarus utrymlivajecca pad vartaj z 5 krasavika.
«My zaklikajem ułady Respubliki Biełaruś nieadkładna i biezumoŭna vyzvalić Taćcianu Hacura-Javorskuju, taksama jak i inšych pazbaŭlenych voli abaroncaŭ pravoŭ čałavieka, — kažacca ŭ adkrytym liście. — Vialikuju tryvohu ŭ nas vyklikała infarmacyja ab uzbudžeńni suprać Taćciany kryminalnaj spravy. My zaklikajem urad Biełarusi pavažać prava Taćciany Hacura-Javorskaj na svabodu vykazvańnia i asabistuju svabodu. Hacura-Javorskaja zrabiła značny ŭniosak u biełaruskuju kulturu i prasoŭvańnie fundamientalnych kaštoŭnaściaŭ, jakija raździalaje naša suśvietnaja kinasupolnaść. Kinafiestyval WATCH DOCS Belarus źjaŭlajecca častkaj siamji kinafiestyvalaŭ ab pravach čałavieka. My nie zabudziem pra našu lubimuju kalehu Taćcianu. My vykazvajem ź joj salidarnaść».
Śpis tych, chto padpisaŭsia pad adkrytym listom, papaŭniajecca. Da jaho dałučylisia pradstaŭniki kinasupolnaści sapraŭdy z usiaho śvietu — Italii, ZŠA, Filipinaŭ, Narviehii, Han-Konhu, Hvatemały, Małajzii, Pieru, Paŭdniovaj Karei dy inšych.
Pravaabaronca, dyrektarka kinafestu WATCH DOCS Belarus, kiraŭnica arhanizacyi «Źviano» była zatrymanaja 6 krasavika, chutka paśla adkryćcia pryśviečanaj miedykam vystavy «Mašyna dychaje, a ja — nie». Taćciana pryznanaja palitviaźniem.
