Aŭtuchovič: Ja nie emihravaŭ
Napiaredadni novaha hoda Mikałaj Aŭtuchovič źmiaściŭ u svaim fejsbuku nieadnaznačny dopis.
«Situacyja skłałasia tak, što z krasavika miesiaca ja pierastaŭ karystacca pasłuhami suviazi našych biełaruskich apierataraŭ», — pisaŭ Aŭtuchovič. «Zvanočkam», pavodle jaho słovaŭ, staŭ incydent na łatvijska-rasijskaj miažy ŭ sakaviku 2018. Mikałaj Aŭtuchovič ź lidaram prafsajuza REP Hienadziem Fiadyničam viartalisia z Łatvii i mašynu, u jakoj jany jechali 12 hadzin praviarali na najaŭnaść schavanych narkotykaŭ.
Aŭtuchovič ličyć heta pravakacyjaj: pavodle jaho słovaŭ, supracoŭniki FSB, jakija ich abšukvali, niekalki razoŭ źviazvalisia z kimści pa telefonie, a paśla spytali, kamu jany pierajšli darohu ŭ Biełarusi.
«Pakolki ja dvojčy pierakonvaŭsia, što dastatkova być dasiažnym i ty lohka možaš znoŭ trapić u turmu, ja pazbaviŭ ich mahčymaści tak prosta znajści siabie», — napisaŭ Aŭtuchovič. Vidać, hetyja słovy dali padstavu častcy čytačoŭ paličyć, što jon vyjechaŭ ź Biełarusi.
Karespandentu NN udałosia źviazacca ź Mikałajem Aŭtuchovičam.
«Ja ŭ krainie», — karotka adkazaŭ jon na pytańnie pra emihracyju.
Mikałaj Aŭtuchovič — pradprymalnik i hramadski aktyvist. Naradziŭsia ŭ Vaŭkavysku, słužyŭ u Afhanistanie, adkul viarnuŭsia z bajavymi ŭznaharodami. Z nula stvaryŭ słužbu taksi ŭ Vaŭkavysku. U 2003, jak śćviardžaje, nie pahadziŭsia davać chabar padatkavikam i tyja pačali dušyć jaho biznes. Ładziŭ publičnyja akcyi pratestu. Razam z Aŭtuchovičam haładali bolš za 30 čałaviek, i ŭłady išli na sastupki. U 2004 bałatavaŭsia ŭ Pałatu pradstaŭnikoŭ. Atrymaŭ pieršy turemny termin pa abvinavačańni va ŭchileńni ad vypłaty padatkaŭ i za niezakonnuju pradprymalnickuju dziejnaść. Vyjšaŭ na volu ŭ 2008, u 2010 znoŭ byŭ asudžany na 5 hadoŭ i 2 miesiacy źniavoleńnia pavodle artykuła «Niezakonnyja dziejańni adnosna ahniastrelnaj zbroi, bojeprypasaŭ i vybuchovych rečyvaŭ»: u jaho doma padčas pieratrusu znajšli niekalki nabojaŭ dla palaŭničaj strelby.