Znakamity arystakratyčny rod pačaŭ svajo uzvyšeńnie ŭ časy Vitaŭta Vialikaha. Imia Radzivił — bałckaje (paraŭnajcie: Montvił, Taŭcivił). Pačatak piśmovaj historyi Radziviłaŭ — Haradzielskaja ŭnija 1413 hoda, jakaja była padpisanaja ŭ nievialikaj krepaści na Buhu. Taja unija zamacavała za elitaj VKŁ šlachieckija pravy, a pradstaŭniki ŭpłyvovych rodaŭ atrymali familnyja hierby. Litoŭski bajaryn Kryścin Ościk atrymaŭ hierb «Truby». Mienavita jon ličycca zasnavalnikam dynastyi Radziviłaŭ.
Starejšaja halina Radziviłaŭ, kniazioŭ na Miadziele i Haniadzi, zhasła ŭ 1542 hodzie. A samaja mahutnaja, niaśvižskaja, adličvaje svoj pačatak ad 1513 hoda. Z hetych časoŭ Niaśviž stanovicca familnaj rezidencyjaj rodu. U vyniku dynastyčnaha šlubu Hanna z Kiškaŭ, abo Kiščanka, svajaki jakoj vałodali Niaśvižam, stanovicca žonkaj Jana Radziviła Baradataha. Ich syn Mikałaj Radzivił «Čorny», prazvany tak za koler barady, staŭ kancleram Vialikaha Kniastva — anałah ciapierašniaha premjer-ministra.
Paśla jaho śmierci kancleram stanie inšy vydatny palityk — jahony stryječny brat Mikałaj Radzivił Rudy. Jon ža, paśla śmierci brata, uznačalić pratestantaŭ VKŁ. Sučaśniki adroźnivali ich pa kolery vałasoŭ. Treba pamiatać, što Mikałaj Radzivił Čorny vałodaŭ Niaśvižam, a Rudy — Biržami i Župranami. Mikałaj Radzivił Čorny zachapiŭsia idejami pratestantyzmu, i pry im Niaśviž staŭ centram Refarmacyi ŭ Biełarusi.
Roskvitu Niaśviža dasiahnuŭ u časy kniazia Mikałaja Kryštafa Radziviła Sirotki, syna Mikałaja Čornaha. U 1586 hodzie źjaŭlajecca Niaśvižskaja ardynacyja Radziviłaŭ — niepadzielnaje ŭładańnie, jakoje pieradavałasia tolki ad baćki da starejšaha syna. Dziakujučy hetamu Niaśviž nie pierachodziŭ z ruk u ruki, a zastavaŭsia radziviłaŭskim ź vieku ŭ viek. Radziviłaŭski Niaśviž byŭ dziaržavaj u dziaržavie. Navat prymaŭka ŭźnikła: «Karali ŭ Varšavie, a Radziviły ŭ Niaśvižy». Upłyvovy mahnacki rod zajmaŭsia nie tolki architekturnym azdableńniem svaich uładańniaŭ, ale kuplaŭ ci zamaŭlaŭ šmatlikija tvory mastactva.