Праект эўрапейскай канстытуцыі
4 кастрычніка пачалася завяршальная фаза працы над праектам эўрапейскай канстытуцыі. Плян амбітны: асноўны закон Эўропы мае быць прыняты ў пэрыяд італьянскага старшынства на сьнежаньскім саміце ў Брусэлі. Таму кожны з удзельнікаў дэбатаў мусіць ужо цяпер ясна акрэсьліць сваю пазыцыю, прыярытэты й межы кампрамісаў.
У мінулы аўторак гэта зрабіў польскі ўрад. Ён мяркуе, што эўрапейскі Канвэнт зрабіў шмат і што над праектам можна працаваць далей. Ніводзін з 25 суаўтараў праекту ня выкінуў эўрапейскай канстытуцыі на сьметнік. Гэта прадракае пасьпяховае завяршэньне, але шлях да яго будзе няпросты.
На сёньня ўжо можна заўважыць выразныя разыходжаньні й спрэчныя моманты. Францыя й Нямеччына націскаюць, каб хутчэй завяршыць працу. Яны разьлічваюць, што паправак да праекту ня будзе. А тых, хто прапануе папраўкі, адразу вінавацяць ледзь не ў сабатажы супольных дзеяньняў.
Аднак нядаўнія праскія кансультацыі больш як дзясятка малых і сярэдніх дзяржаваў паказалі, што такія націскі не дапамогуць Францыі зь Нямеччынай. У канстытуцыі ёсьць некалькі надзвычай важных пунктаў, дыскусія па якіх несумненна ўзновіцца.
Поўны варыянт артыкула глядзіце ў газеце "Нашa Ніва".
