У Мінску безбілетніца пабіла кантралёрку
30-гадовая мінчанка, едучы без білета, пабіла кантралёрку з больш чым 20-гадовым стажам, якая спрабавала дабіцца ад яе аплаты за праезд. Цяпер парушальніца знаходзіцца за кратамі ў чаканні суда, піша агенцтва «Мінск-Навіны».
Фота ілюстрацыйнае
Па словах кантралёркі, у той дзень яна з калегай працавала па маршруце 36-га тралейбуса. Увайшоўшы ў салон, жанчыны заблакавалі валідатары і пачалі правяраць у пасажыраў праязныя дакументы.
На адным з сядзенняў спала нецвярозая жанчына. Калі яе пабудзілі, то аказалася, што праезд яна не аплаціла. Жанчыну высадзілі, але пазней яна, злавіўшы момант, зноў зайшла ў тралейбус. Кантралёрка, пабачыўшы гэта, пайшла зноў парушальніцу выганяць, на што тая адрэагавала агрэсіўна.
Нецэнзурна лаючыся, жанчына двойчы ўдарыла кантралёрку нагой у жывот, пасля чаго пабегла ў рэстаран хуткага харчавання, дзе села за столік. Калі ж ёй паведамілі, што на яе ўжо выклікалі міліцыю, то сарвала з кантралёркі акуляры і шапку, схапіла адной рукой за валасы, а другой — за шыю і моцна штурхнула.
Пасля гэтага безбілетніца накіравалася ў бок аўтавакзала «Цэнтральны», затым хацела схавацца ў метро, але ўрэшце была затрыманая. Усе яе дзеянні былі зафіксаваныя кантралёрскім відэарэгістратарам.
У пракуратуры адзначылі, што абвінавачваная раней да крымінальнай адказнасці не прыцягвалася. Тым не менш, адносна яе завялі крымінальную справу па ч. 1 арт. 366 КК (здзяйсненне гвалту ў дачыненні да службовай асобы, якая выконвае службовыя абавязкі) і змясцілі пад варту. Па гэтым артыкуле могуць пазбавіць волі нават на 7 гадоў.
