Беларускі інстытут навукі і мастацтва абраў новага старшыню
21 студзеня 2023 года адбылося пасяджэнне Управы Беларускага інстытута навукі і мастацтва, першае пасля адыходу шматгадовага старшыні Інстытута доктара Вітаўта Кіпеля, які памёр 3 снежня мінулага года.
На пасяджэнні былі абмеркаваныя арганізацыйныя пытанні і творчыя планы. Аднагалосна выканаўчым старшынёй БІНіМа абраны доктар Юрка Кіпель.
Быў ухвалены план працы на 2023 год, абмеркаваныя ідэі на 2024-ы. Па-ранейшаму плануецца выданне альманаха «Запісы БІНіМ», кніг, прысвечаных беларускай эміграцыі і яе культурнай спадчыне. Прынятае рашэнне аб стварэнні інтэрнэт-сайта Інстытута.
Удзельнікі пасяджэння выказалі таксама падзякі за падтрымку і спадзевы на будучую супрацу Беларускай фундацыі Крачэўскага, Культурніцкай і адукацыйнай фундацыі Орса-Рамана, Згуртаванню беларусаў свету «Бацькаўшчына».
Управа БІНіМа і сям’я Кіпеляў дзякуе ўсім, хто даслаў ахвяраванні на Інстытут у памяць доктара Вітаўта Кіпеля.
Чытайце таксама:
Памёр Вітаўт Кіпель
