У Брэсце выставілі на продаж Чырвоную казарму
КУП «Брэсцкі гарадскі цэнтр па кіраванні нерухомасцю» абвясціў аб продажы так званай Чырвонай казармы. На электронныя таргі выстаўлены адміністрацыйны будынак з правам заключэння дамовы арэнды зямельнага ўчастка. Адбудуцца таргі 31 студзеня, паведамляе «Віртуальны Брэст».
Чырвоная казарма — гэта двухпавярховы цагляны будынак практычна ў цэнтры Брэста, каля Паўночнага сквера. Гэты будынак — частка комплекснай гісторыка-культурнай каштоўнасці «Казармы», і ён быў пабудаваны дзесьці на мяжы XIX і XX стагоддзяў. Плошча будынка — 3333 квадратныя метры.
У аб'яве пазначана, што пакупнік зможа размясціць у будынку усё, што заўгодна: офіс, музей, студыю і г. д. Пачатковая цана — больш за 900 тысяч рублёў.
Раней гэтую казарму ўжо спрабавалі прадаць, але беспаспяхова. Цяперашняя цана меншая за ранейшую ажно на 80%.