Расія дазволіла вывозіць свае піламатэрыялы праз Беларусь
Расійскі ўрад дазволіў з канца студзеня 2023 года вывозіць піламатэрыялы, шпалы, бярвенне і груба апрацаваную драўніну праз Беларусь і Казахстан. Для гэтага вызначаныя чатыры пункты пропуску. Раней ён сам накладаў на гэта абмежаванні, піша Office Life.
Фота: Wikimedia Commons
На мяжы з Беларуссю правоз драўніны аўтатранспартам будзе магчымы праз пункт пропуску «Красная Горка». Канчатковай краінай атрымання лесаматэрыялаў могуць быць як дзяржавы ЕАЭС, так і трэція краіны. Пры гэтым дзеянне адпаведнай пастановы Кабінета міністраў Расіі не распаўсюджваецца на правоз лесаматэрыялаў у Калінінградскую вобласць і Арменію.
Раней паведамлялася, што ў лістападзе 2022 года расійскі ўрад абмежаваў экспарт лесаматэрыялаў чыгуначным транспартам. Пры гэтым дазваляўся вываз лесапрадукцыі толькі ў Казахстан, Кыргызстан і Беларусь.
У выніку гэтай меры пацярпелі самі расійскія лесапрамыслоўцы, бо не змаглі вывезці сваю прадукцыю ў дастатковай колькасці на экспарт.
