У Еўракамісіі патлумачылі сваю памылку пра нібыта 100 тысяч загінулых украінскіх салдат
У Еўрапейскай камісіі прызналі памылку адносна агучаных у сераду кіраўніком ЕК Урсулай фон дэр Ляен лічбаў пра страты ўкраінскіх вайскоўцаў, якія нібыта склалі 100 тысяч чалавек забітымі.
Непраўдзівыя даныя пракаментавала ў сваім твітары намеснік галоўнага прадстаўніка Еўракамісіі і дырэктар па пытаннях палітычнай камунікацыі Дана Спінант, паведамляе «Еўрапейская праўда».
Яна адзначыла, што ў папярэдняй версіі звароту фон дэр Ляен змяшчалася «недакладнасць» у лічбах, і падзякавала тым, хто паказаў на памылку.
Спінант патлумачыла, што ацэнка, агучаная фон дэр Ляен, узятая з вонкавых крыніц, і павінна была тычыцца страт забітымі і параненымі і была закліканая паказаць жорсткасць Расіі».
Пасля таго, як фон дэр Ляен у сераду паведаміла, што ва Украіне загінула больш за 20 тысяч мірных жыхароў і 100 тысяч украінскіх вайскоўцаў, яе зварот быў адрэдагаваны: з яго выключылі згадку пра страты.
На просьбу «Украінскай праўды» пракаментаваць ацэнку, агучаную фон дэр Ляен у першай версіі яе звароту, кіраўнік упраўлення сувязяў з грамадскасцю УСУ Багдан Сенік адзначыў, што Генштаб не можа пацвердзіць гэтую лічбу, а страты ўкраінскай арміі з'яўляюцца службовай інфармацыяй і падпадаюць пад грыф абмежаванага апублікавання.
