Збіраюцца павялічыць падатак на сабак
У Беларусі ў 2023 годзе плануюць падняць падатак для ўладальнікаў сабак. Гэта прадугледжваецца праектам зменаў у Падатковы кодэкс.
У дакуменце сказана, што з 2023 года падатак для ўладальнікаў сабак, старэйшых за тры месяцы, можа скласці 11,1 рубля, а для ўладальнікаў патэнцыйна небяспечных парод сабак — 55,5 рубля.
Падатак для ўладальнікаў сабак быў уведзены ў Беларусі з 1 студзеня 2010 года. У 2022 годзе стаўка падатку для ўладальнікаў сабак была ўстаноўленая ў памеры 9,3 рубля, а для ўладальнікаў патэнцыйна небяспечных парод — 46,5 рубля.
Гэты падатак выплачваецца раз на квартал. Так, за I квартал падатак неабходна аплаціць да 27 красавіка, за II квартал — да 27 ліпеня, за III — да 27 кастрычніка і за IV — да 27 студзеня.
Адзначаецца, што ад выплаты падатку вызваляюцца ўладальнікі сабак, калі шчанюк малодшы за тры месяцы, і інваліды, для якіх утрыманне сабакі-павадыра — жыццёвая неабходнасць. Акрамя таго, падатак не плацяць уладальнікі, якія жывуць у прыватных дамах, пры ўмове ўтрымання імі не больш за адну жывёлу.
