Акупацыйныя ўлады адмаўляюць планы Расіі пакінуць Запарожскую АЭС
Акупацыйная адміністрацыя горада Энергадар, дзе знаходзіцца Запарожская АЭС, раніцай у панядзелак заявіла, што расійскія войскі не плануюць здаваць найбуйнейшую ў Еўропе атамную электрастанцыю, захопленую яшчэ ў лютым.
«СМІ актыўна распаўсюджваюць фэйкі пра тое, што Расія нібыта плануе выхад з Энергадара і пакіданне ЗАЭС. Гэтая інфармацыя не адпавядае рэчаіснасці», — гаворыцца ў паведамленні акупацыйнай адміністрацыі, апублікаваным у яе тэлеграм-канале.
Напярэдадні артыкул пра магчымы адыход, у прыватнасці, напісала агенцтва Reuters. Пра гэта абвясцілі ўкраінскія ўлады. Кіраўнік дзяржаўнай кампаніі «Энергаатам» Пётр Коцін гаварыў аб прыкметах таго, што расійскія вайскоўцы рыхтуюцца пакінуць электрастанцыю.
«У апошнія тыдні мы атрымліваем фактычна інфармацыю, што з'явіліся прыкметы таго, што яны, магчыма, збіраюцца пакінуць ЗАЭС», — сказаў Коцін у эфіры ўкраінскага тэлебачання. Пры гэтым кіраўнік «Энергаатама» адзначыў, што пакуль яшчэ рана гаварыць пра распачатае адступленне. «Можна сказаць, што расійскія вайскоўцы рыхтуюцца да такога варыянта», — сказаў Коцін.