Новая праца Спенсера Туніка: 2,5 тысячы аголеных на пляжы Бондзі-біч у Аўстраліі

Фота: AP

Тунік фатаграфаваў сваіх мадэляў у промнях узыходу cонца. Гэты праект быў закліканы нагадаць жыхарам Аўстраліі аб неабходнасці рэгулярна рабіць праверку на рак скуры.

Па даных Міжнароднай арганізацыі World Cancer Research Fund, аўстралійцы пакутуюць ад гэтага захворвання часцей, чым жыхары ўсіх іншых краін свету.

Паводле прагнозаў, у 2022 годзе на рак скуры (меланому) захварэла каля 17,7 тысячы аўстралійцаў, прыкладна 1,3 тысячы ад гэтай хваробы памерлі. Фотасесія арганізавана сумесна з дабрачыннай арганізацыяй Skin Check Champions.

«У нас ёсць магчымасць прыцягнуць увагу да праблемы раку скуры, і для мяне вялікі гонар быць тут, займацца сваім мастацтвам і аддаць належнае чалавечаму целу і яго абароне», — сказаў Тунік агенцтву Reuters.

Адзін з удзельнікаў фотасесіі, 77-гадовы аўстраліец Брус Фішэр сказаў Франс Прэс: «Усё маё жыццё прайшло на сонцы, і ў мяне на спіне было выдалена некалькі злаякасных меланом. Мне здаецца, гэта годны праект, і мне падабаецца распранацца на Бондзі-Біч».

Для таго, каб фатограф змог рэалізаваць свой праект, у Аўстраліі было спецыяльна зменена заканадаўства, якое забараняе з'яўляцца на пляжы аголеным.

Спенсер Тунік ладзіць флэшмобы аголеных людзей для сваіх фотаінсталяцый ужо каля 30 гадоў. З 1992 года ён загадзя аб'яўляе аб месцы і часе наступнага праекта і прапануе ўсім ахвотным узяць у ім удзел.

У першых яго «аголеных інсталяцыях» удзельнічала не больш за паўтары тысячы чалавек, але паступова жадаючых зрабіць сваё цела часткай сучаснага мастацтва станавілася ўсё больш. Так, у Барселоне ў 2003 годзе Туніку пазіравалі ўжо сем тысяч чалавек, а ў 2007 годзе ў Мехіка — 18 тысяч.

Nashaniva.com

Хочаш падзяліцца важнай інфармацыяй
ананімна і канфідэнцыйна? Пішыце рэдактару
«Нашай Нівы» ў ТГ

19

3

1

3

3

2