Беспілотнік ударыў па аэрадроме ў Калужскай вобласці
Сёння на ваенным аэрадроме ў Калужскай вобласці адбыўся выбух. Пра гэта паведаміў губернатар рэгіёна Уладзімір Шапшын. Паводле папярэдняй інфармацыі, упаў беспілотнік.
«Сёння на вайсковым аэрадроме «Шайкоўка» на тэрыторыі Калужскай вобласці адбыўся выбух. Упаў беспілотнік, які, як мяркуецца, прыляцеў з боку мяжы», — заявіў ён.
Паводле чыноўніка, пацярпелых няма, інфраструктура аэрадрома і тэхніка не былі пашкоджаныя. На месцы працуе следча-аператыўная група.
Канал Mash назваў тое, што адбылося, «дыверсіяй». Па версіі тэлеграм-канала, дрон нёс снарад для гранатамёта. Яго цэллю нібыта была ўзлётна-пасадачная паласа.
Авіябаза «Шайкоўка» знаходзіцца ў Калужскай вобласці. Адлегласць ад яе да мяжы з Украінай — больш за 200 кіламетраў.
Мы не можам праверыць праўдзівасць інфармацыі пра наступствы ўдару гэтага беспілотніка.
З аэрадромаў на гэтым кірунку стартуюць расійскія бамбавікі, якія наносяць удары па Украіне ў тым ліку і з паветранай прасторы Беларусі.