Яшчэ адзін добраахвотнік памёр у лагеры для мабілізаваных. Яго маці паведамілі, што ён атруціўся алкаголем
35-гадовы Аляксандр Коўтун з Брацка памёр у новасібірскім лагеры для мабілізаваных. Пра гэта паведаміла яго маці Алена Гудо (Заусаева) у сацсетцы аднакласнікі.
«Аляксандр 28 верасня пайшоў добраахвотнікам па мабілізацыі зусім цвярозы. А ў Навасібірску 2 кастрычніка сканаў як быццам ад сардэчнага прыступу, калі на сэрца ніколі не скардзіўся і на ўліку не быў», — кажа жанчына.
Паводле слоў Гудо, Аляксандр апошні раз тэлефанаваў ёй другога кастрычніка і расказаў, што мабілізаваным не выдаюць форму і не кормяць. Таксама яе сын паведаміў, што вайскоўцы «хістаюцца і п'юць».
«Мне спрабуюць распавядаць нейкія людзі па тэлефоне, што ён памёр ад няякаснага алкаголю, што ён некалькі дзён там піў. Цяпер кажуць пра сардэчную недастатковасць. Але справа ў тым, што мой сын ніколі не злоўжываў алкаголем. Ён паехаў ва Украіну абсалютна свядома, добраахвотна, па сваім жаданні. Ён тэлефанаваў з вучэбнай часці і казаў, што там поўнае бязладдзе, за мабілізаванымі ніхто не сочыць, усё робяць тое, што хочуць», — цытуе жанчыну тэлеграм-канал «Братчане».
Алена Гудо таксама паведаміла, што цяпер высвятляецца дакладная прычына смерці яе сына.
«Забраць цела мы не можам, улады нам не садзейнічаюць, сядзім тры дні ў няведанні. Падумайце добра, перш чым адпраўляць сваіх сыноў», — напісала Гудо.
Жанчына таксама расказала, што Аляксандр Коўтун гадаваў шасцярых дзяцей. Ён жыў з жанчынай, у якой чацвёра дзяцей ад мінулага мужа. Таксама ў іх ёсць агульнае дзіця, а ў Коўтуна ёсць яшчэ адно дзіця ад першага шлюбу.
Раней стала вядома пра смерць на прызыўным пункце пад Цюменню, гібель мабілізаванага краснаярца ў Омску і смерць траіх мабілізаваных у Свярдлоўскай вобласці.
