Раскол мацнее. Праз вайну ўжо нават адзінаросы крытыкуюць расійскія ўлады
Расіяне ведаюць, што Мінабароны недагаворвае пра падзеі ва Украіне, а пра разбурэнні людзям даводзіцца даведвацца ад губернатараў і ваенкараў. З такой заявай выступіў кіраўнік камітэта Дзярждумы па абароне, генерал-палкоўнік Андрэй Картаполаў з «Адзінай Расіі», піша «Коммерсант».
Фота: АР
«Трэба перастаць хлусіць. Мы не раз пра гэта казалі. Але неяк не даходзіць да асобных кіраўнікоў. Я чытаў зводкі Саўінфармбюро за 1941 год, калі немцы прарываліся да Масквы. Там адкрыта казалі, што недзе мы адыходзім», — сказаў Картаполаў у эфіры праграмы «Салаўёў Live».
Ён заявіў, што ўсе прыгранічныя вёскі Белгарадскай вобласці практычна разбураныя. «Мы пра гэта даведаемся ад каго заўгодна — ад губернатараў і ваенкараў. Але зводкі Мінабароны не мяняюцца. Народ ведае. У нас народ не дурны. І ён бачыць, што яму не жадаюць казаць нават частку праўды. Гэта можа прывесці да страты крэдыту даверу», — адзначыў кіраўнік думскага камітэта па абароннай палітыцы.
Картаполаў і старшыня камітэта Дзярждумы па бяспецы і супрацьдзеянні карупцыі Васіль Піскароў звярнуліся да генеральнага пракурора з просьбай разабрацца ў забеспячэнні тылу.
«Два старшыні нашых камітэтаў — па бяспецы і па абароне — напісалі ліст генеральнаму пракурору з просьбай разабрацца, куды ж усё гэта ў тыле падзелася, таму што фінансаванне тылу праводзілася ў мінулым у поўным аб'ёме. Увага, пытанне: дзе?» — сказаў член камітэта Дзярждумы па абароне Андрэй Гурулёў у эфіры тэлеканала «Расія-1».
Мінабароны неаднаразова апошнім часам падвяргалася крытыцы шэрагу расійскіх афіцыйных асоб. Напрыклад, кіраўнік Чачні Рамзан Кадыраў раскрытыкаваў камандуючага Цэнтральнай ваеннай акругай генерал-палкоўніка Аляксандра Лапіна за страту Лімана.
