Мінабароны Расіі: У Херсонскай вобласці расійская армія за дзень адступіла на 30 кіламетраў
Міністэрства абароны Расіі падчас штодзённага брыфінгу паказала карту баявых дзеянняў ва Украіне. З яе вынікае, што паводле стану на 4 кастрычніка расійскія войскі практычна цалкам выйшлі з Харкаўскай вобласці і адступілі на поўначы Херсонскай вобласці. Пра гэта паведамляе выданне «Агенцтва».
Згодна з прадстаўленай картай, у Харкаўскай вобласці пад кантролем Расіі засталася зусім невялікая тэрыторыя на паўночны ўсход ад пасёлка Двурэчнае. Днём раней Мінабароны сцвярджала, што пад кантролем Расеі знаходзіцца ўся тэрыторыя вобласці на ўсход ад ракі Аскол.
З гэтага вынікае, што з 3 да 4 кастрычніка УСУ вызвалілі прыкладна дзве траціны падкантрольных Расіі тэрыторый вобласці.
«Агенцтва» таксама звярнула ўвагу на адступленне расійскіх войскаў на поўначы Херсонскай вобласці. Днём раней лінія фронту на карце праходзіла ў раёне паселішчаў Давыдаў Брод, Дабранка і Залатая Балка. 4 кастрычніка расійскае Мінабароны засведчыла, што пад кантролем расійскага войска знаходзіцца тэрыторыя прыкладна да лініі паміж Давыдавым Бродам і Дудчанамі.
Такім чынам, лінія фронту ў рэгіёне зрушылася на поўдзень прыкладна на 30 кіламетраў. Гэтае адступленне нават больш істотнае, чым сведчаць расійскія вайсковыя блогеры.
