СМІ: Улады Украіны гатовыя ўзгадняць з ЗША цэлі ў выпадку атрымання ракет ATACMS для HIMARS
Улады Украіны папрасілі ЗША перадаць ракеты ATACMS з далёкасцю палёту каля 200 міль (300 кіламетраў) пры ўмове, што яны будуць узгадняць з Злучанымі Штатамі цэлі нанясення ўдараў гэтай зброяй. Пра гэта паведамілі крыніцы тэлеканала CNN.
Устаноўка HIMARS з ракетамі ATACMS. Фота ілюстрацыйнае
Адзначаецца, што такая празрыстасць фактычна дае ЗША права вета і дае магчымасць пераканаць Адміністрацыю прэзідэнта Злучаных Штатаў Джо Байдэна, што ўдары па расійскай тэрыторыі гэтай зброяй наносіцца не будуць. Бо ЗША асцерагаюцца, што нанясенне Украінай удараў па тэрыторыі Расійскай Федэрацыі можа прывесці да эскалацыі вайны.
У канцы верасня крыніцы Reuters паведамілі, што Злучаныя Штаты рыхтуюць новы пакет узбраенняў на суму 1,1 млрд даляраў у якасці дапамогі Украіне. Гэты пакет, па звестках агенцтва, уключае ў сябе пускавыя ўстаноўкі HIMARS, спадарожныя боепрыпасы, розныя тыпы сістэм барацьбы з беспілотнікамі і радыёлакацыйныя сістэмы, а таксама запасныя часткі, навучанне і тэхнічную падтрымку.
