Праваабаронцу вінавацяць у правозе праз мяжу вялікай сумы грошай, будзе завочны працэс
Следчы камітэт папоўніў спіс асобаў, супраць якіх распачатая «спецыяльная вытворчасць», праваабаронцам з цэнтра «Вясна» Змітром Салаўёвым. Год назад ён эміграваў, ратуючыся ад рэпрэсій. «Гэта помста за эфектыўную праваабарончую дзейнасць і назіранне за выбарамі», — кажа Салаўёў.
Фота: Старонка Змітра Салаўёва ў Facebook
Як вынікае з апублікаваных Следчым камітэтам звестак, Салаўёва вінавацяць па двух артыкулах Крымінальнага кодэкса: «перавозка праз мяжу Еўразійскага эканамічнага саюза буйной сумы грошай» (частка 4 артыкула 282) ды «падрыхтоўка асоб для ўдзелу ў групавых дзеяннях, якія груба парушаюць грамадскі парадак, фінансаванне і іншае матэрыяльнае забеспячэнне такой дзейнасці» (частцы 2 артыкулу 342).
«Тое, што яны пішуць, мне абыякава, — адзначае праваабаронца.
— Гэта як у 1937 годзе людзей называлі шпіёнамі. Так было трэба, каб кагосьці пасадзіць, а кагосьці расстраляць».
«Я лічу цяперашнюю ўладу ў Беларусі злачыннай і ў яе няма ніякіх паўнамоцтваў адпаведных, бо закон быў парушаны ёю яшчэ ў 1996 годзе, калі быў сфальсіфікаваны рэферэндум, гвалтам змененая Канстытуцыя, разагнаны парламент», — кажа Зміцер Салаўёў.
Па яго словах выстаўленыя абвінавачванні, «хлуслівыя, бо праваабарончы Цэнтр «Вясна» кантрабандай не займаецца, як і фінансаваннем пратэстаў, а дапамагае людзям абараняць свае правы».
Абвінавачванне ў перавозцы «вялікай сумы грошай» новае. Што тычыцца другога, то паводле Салаўёва, пра яго ён даведаўся ў Следчым камітэце 1 сакавіка 2021 года. Тады яго даставілі ў цэнтральнае ўпраўленне ведамства з аэрапорта, адкуль ён збіраўся вылятаць.
Тады яго адпусцілі пад падпіску аб нявыездзе. Апынуўшыся на волі, ён пакінуў Беларусь.
У замежжы ён працягвае займацца праваабарончай дзейнасцю і як валанцёр дапамагае ўкраінскім бежанцам.
Следчы камітэт дадаў Аляксандру Герасіменю ў спіс тых, каго будуць судзіць завочна
